رواية : ماذا لو عاد معتذراً ؟
💔🙍♀️🚶♂️💔
بقلم : سوسن الأزهر ......
.......
الحلقة التاسعة .....
.......
****
( وفي زحام المياة نحتاج إلى عناق بلا سبب ..
وردة بلا مناسبة .. لقاء بلا موعد .. كلمات تنعش الروح وتستقر في عمق القلب .. نظرة دافئة ممن نحب .. عودة بعد غياب طال أنتظاره ..؟ ) .
*****
وعند مفتاح ومنير :
اليوم عقد البنت اااخ ولو نقدر نخطفها قبل لاتنقري فاتحتها .
مفتاح : اوووه منك منير .. احنا وين وانت وين .. والا نسيت صاحب البضاعة اللي قاعد يهدد فينا
منير : مهو نبي نعيش يومين حلوين في حياتي زيك انت وسمعه .
مفتاح : اصلا انت من لما شفت البنت حالتك حالة .. معاد مركز ولاهامك شي
منير : انا مفكر نمشي نخطفها والا ايصير ايصير
مفتاح : لو ماتزوجت قتلك حلال عليك بس توا خلينا في الاصحاب لان البنت طارت خلاص وربي يعوضك خير منها بألف مرة .
منير : عليك حظ .. تمام ياصاحبي .. ها شنو الخطة ؟
مفتاح : تخطف صاحب معتز .. العريس في ليلة عرسه .. وبالمرة انحصلوا فلوس الفدية ونخلصوا البضاعة .. بس من غير مايعلم ان ليا يد في الموضوع
منير : كيف يعني 🤔
مفتاح : نبيك تقنعه انه انفصلنا عن بعض وانك تشتغل بروحك واني انا خلاص انتهيت .
منير : ااااخ من افكارك الجهنمية يامفتاح
انا ماشي انفد طول
مفتاح : ردبالك .. معتز مش ساهل
ولا يهمك .
.
.
.
وعند وتين وصاحبتها سلوى وهي تجهز فيها في دارها .. وسلو. بمرح :
كنك حزينة
وتين بقلق : مانبيش نتزوج
سلوى : هبلة .. انا بس لو رجع ولد عمك حنعرض عليه الزواج طول .. مانبيش خطوبة
وتين بضحكة خفيفة : هههه مجنونة
سلوى : وتوه اتشوفي راجلك كيف ايجن ويهبل عليك
وتين بآسف : بدر متغير مش زي زمان .. يمكن خلاص نساني
سلوى : لو نساك ماكانش واقف معاك في المستشفى وخايف عليك حتى اخر لحظة
وتين : انا حسيت بيه زي الحلم قالي وتيني .. بس في لحظة نسى كل شي
سلوى : مش حيقدر ينسى بسهولة صدقيني
وخشت امل :
يلا وتين اهل بدر جوا ولازم اطلعي الضيافة بعدما تسلمي عليهم هكي العادات .
وتين بإرتباك : شنو هكي حلو فستاني وتسريحتي .
امل : ماشاءالله عليك روووعة طالعة تهبلي .. يسلموا ايديك مزينة سلوى
سلوى : تعرفي اكيد انفكر فيها نفتح مزين وخلاص
امل : باردة .. يلا اطلعوا خليني انلحق انغير ونستقبلهم حتى انا .. حتى يزن قعد يضحك على منظري كيف امبهدلة روحي من الصبح .
وطلعت وتين سلمت على اهل بدر امه واخواته وقعدوا ايشوفولها باعجاب وانبهروا بجمالها .. وهي من الخجل كانت خاشة في روحها .. واشرتلها سلوى عشان يقدموا الضيافة .. وساعدتها في التقديم .. وقعمزوا يتعرفوا على وتين اكتر .. لعندما وقف يزن عند الباب وقاللهم قروا الفاتحة وقعدوا ايزعرتةا وايباركوا ل وتين واهل العريس .. ووتين اعيونها دموع فرحة وخوف وحزن كلهن اختلطن عليها ف مرة واحدة .. وكانت تتوقع في اي لحظة ايخش بدر ويشوفها وفي نفس الوقت خايفة منه ومن ردت فعله خصوصا انه كان رافض فكرة الزواج .. وناضت سلوى وامل وهناء معاهم ضيفوا حلويات الفاتحة والمشروبات .. وقربت هناء من وتين وفي يديها طاقم الزواج وهمسلتها :
بدر داير روحه متحشم .. قالي لبسيها انتي .. وطبعا انا ليا الشرف انلبس مرت خوي الطاقم .
ابتسمت وتين بمجاملة : الطاقم حلو .. عجبني
هناء : ايحلي ايامك ذوقي .. واخترتلك لبسة ان شاءالله تعجبك واشوية هدايا من بدر .
وتين : تسلمي
هناء : الله يسلمك يارب .. بدر مسافر بعد يومين بلكي يرفعك معاه .
وتين برتباك : مش عارفة .
هناء : بكرة فاتحة خوي يزيد .. والخميس وليمتكم مع بعض يوم واحد .. اشوي انكلم بدر انخليه ايخش ايشوفك
وتين ارتعبت : لا .. قصدي بلكي مايبيش ايخش ف الزحمة
هناء : زحمة شنو وانتي مرته .. وبعدين احنا خلاص ولين عيلة وحدة
وحطت عليها عبايتها ووشاحها وطلعت عند الممر .. شافت معتز واقف على جنب . وبدر واقف بعيد مع يزن .. اول ماشافها معتز جاها طارتله :
شن اديري هنا مش شايفة الرجال واقفين برا
هناء بإرباك : لا بس نبي بدر
معتز معصب : باهي خشي توه انكلمه لك .. وغطي وجهك لان زينتك فاضحتك .
هناء انحرجت وغطت وجهها عالسريع وخشت .. وفي نفس الوقت فرحت لانها حست انه معتز غيران عليها .. كان مجرد احساس حلو بس فيسع ماتبخر
واشوي واتصل بيها بدر :
قولي لامك واخواتك هيا
هناء : مش حتخش اتسلم على مرتك وتشوفها
بدر : لا .. ويلا اتاخرنا .. وصكر .
شافله يزن بعدم ارتياح بعدما سمع مكالمته وخداه على جنب ماسك بدراعه :
تعال بدر نبيك اشوي
بدر : نعم تفضل
يزن : انت شن برنامجك
بدر : منعديش برنامج
يزن : وتين ختاخدها معاك او لا .
بدر : لا
يزن : كيف وهي توه مرتك
بدر : مرتي بس انا مسافر شغل مش سياحة
يزن : باهي مش حتشوفها قبل ماتمشي هي توه مرتك
بدر إصرار : لا
يزن : خايف تضعف قدامها صح
بدر : يزن انا يمكن نسافر ومانرجع
يزن : لا لازم ترجع .. وتين مش ناقصها وجع قلب وعذاب اكتر من هكي
بدر : صعب تفهمني .. بس يمكن ننزل في الاجازات وطلع مفتاح من جيبه ومده له :
هذا مفتاح شقتي لو تبي هي اطل عليها او تقعد فيها وانا خصصتله مصروف يوصلها كل شهر وان شاءالله مش حنقصر معاها في شي .
يعني هذا كل شي .
للاسف مانقدرش انقدملها اكتر من هكي حاليا
انت غريب .. تحبها وتضعف قدامها ومع هذا مش قادر تتقبل وجودها في حياتك .
ماتبيش اتشوفها باهي على الاقل كلمها في التليفون
تمام توا لما انروح انكلمها
لا توا قبل ماتروح
بسسس .. تليفوني بيفصل شحن
اهو تليفوني شحنه فل .. ورصيده كافي .. واتصل بيها يزن .. ومد التليفون لبدر .. وخش .. بدر بتوتر لما سمع صوتها :
انا بدر .. بصراحة انا مانقدرش انخش انشوفك .. بس يزن اصر انكلمك
اه فهمت .. وبتنرفيز ؟:
تصور حتى بكرة مفيش داعي اتجيني .. خليني في حوش جدي خير .
بدر اسكت وبعدين رد بعفوية :
انا خليتلك مفتاح الشقة ومصروفك مع يزن
شكرا مش محتاجة منك شي
هذا واجب لان توا اسمك ارتبط باسمي ومفيش مفر منه .. وجدك اشترط اني ماانطلقك مهما صار بينا .. بس لو جت منك يكون افضل
وتين : بدر انا ..
بدر : اسسسسس مش وقت انا لا انتي .. انا مسافر وربي يسعدك مع عيلتك
وتين : باهي ليش😥 باس جبينها بإبتسامة ألم وحزن :
نبي انكون ذكرى حلوة في عيونك وفي حياتك .
وبعد وقت روح عيلة بدر .. والتموا نساوين العيلة ايجهزوا ليوم الحنة .. والبنات مع وتين ايجهزوا فيها للحنة بالليل ودايريلها جو مش عادي .. وامل حايسة مع نساوين العيلة .. لعندما شافت تليفونهة يرن بالصدفة وردت عليه :
انا برا
امل : باهي خليني انبات مع وتين اليوم .. بكرة زفتها بايخة انخليها ابروحها .
يزن بغمزة : بايخة ولا خايفة مني اعترفي
امل سكتت وادموعها نزل كلما تذكر اللي صار معاها
يزن بهدوء : تمام على راحتك .. باهي شوفيلي عشى وتعالي تعشي معاي .
امل : حاضر ..
يزن لوح التليفون بتنرفيز : الحقير مزال قاعد بينا زي الكابوس .. اكيدة حتذكره كلما انفكر انقرب منها .. بس هي توا مرتي ومن حقي انا وبس .
ودقايق سمع صوت الباب ايطق .. توثع امل جايبة العشاء وفتح بسرعة .. وتفاجى بأمه غالية واقفة قدامه وبين ايديه صينية الاكل .. خداها منها :
ليش متعبة روحك يامي .. امالا وين امل
فالية : امل اتحني فالعروس .. خليتها اتحني فيها هي وصاحبتها .. شافتني جاية للحوش قالتلي ارفع معاك عشى ليزن .
يزن : اه باهي
غالية : هاشن داير معاها .. شفتك هاداك اليوم راقد فالصالة
يزن بدعابة : يعني شن بندير يامي .. المفروض ماتساليش زي هالسؤال .. بس غلبني النوم رقدت ف الصالة
غالية : بارد .. يلا خود عشاك وخش تعشى وانا خاشة انشوف دبش في داري .
.
.
.
وفي اليوم التالي .. كانوا متفقين كل واحد له يوم حفلة .. بس جد وتين اصر ايكون كل شي في يوم واحد .. كان يوم حنة وحفلة لوتين
و فرح عروس يزيد . وطبعا ماقصروا معاهم في حاجات العرس وكل شي جهاز وهدايا واكل ومشروبات وحلويات ..
ومشت وتين مع سلوى صاحبتها وهناء اخت بدر للمزين .. وكل شي بالنسبة لوتين زي الحلم كيف اتزوجت بدر وانكتب اسمها على اسمه .. ومن ناحية تانية كيف ايفكر فيها بدر .. وكأنها مش الحلم اللي كان يتمنى انه يخقق من قبل خمس اسنين .. وخدت هناء وسلوى معاها لقطات :
يلا ياعروسة استعدي للتصوير .. بدر دقايق ويوصل
وتين برتباك : وليش كلمتيه .. كان خليتني صورت بروحي
هناء : هذا احلى يوم في حياتك المفروض يكون موجود معاك .
سلوى : اه بس لو مكانك مستحيل انفوت تانية بدونه .
وتين ضحكت : الحمدلله ماني زيك .
وخشت جود اللي كانت لابسة ومتأنقة لهناء :
هناء .. خوي بدر برا .. سلوى ناضت لبست بالطوها ووشاحها واستأذنتهن :
يلا انا بنطلع لسيارتي .. انتي مرته وانتي اخته وانا ماليش لزوم بيناتكم .. نتلاقوا في الحفلة وطلعت
هناء شافت لجود : قوليله ايخش يلا وقت .. مزال بنمشوا مع عروسة خوك يزيد .
وخش بدر وتفاجئ بوتين وهي بالفيلو والطرحة وتسريحتها والميكب .. طالعة في قمة الروعة .. قرب سلم عليها ومسك ايديها بين ايديه وباسهن وعيونه كله حب :
وتين
وتين برجفة :
انا قلتلها ما اتكلمك انصور بروحي عادي .
بدر زاد قرب منها اكتر : وليش
وتين بنفس عميق : لانك .. وفجأة قطع كلامها ببوسة :
اشتقتلك .
هناء : احم احم نحن هنا .
وتين ماقدرتش تتمالك مشاعرها وجتها رغبة مجنونة انها اضمه وضماته بقوة وكان نفس احساسه وزاد ضمها ليه بحرارة وقعد يبوس فيها ويهمسلها : خلاص حبيبي اهدي .. وقعد ايصور هو وياها .. ورن تليفونه وطلع طول .. فجأة لقى روحه محاصر بسيارتين .. وفي لحظة هجوم سريع حاول ايقاوم بس فقد الوعي من المخدر .. وحطوه فالسيارة وانطلقوا واتصل منير بمفتاح بفرحة وانتصار :
ايوه يامفتاح .. تمت المهمة بنجاح .. العريس في الحفظ والصون .
مفتاح بضحكة هستيريا :
يلا كمل باقي الخطة واتصل بمعتز خليه ايجن .
منير بخبث : اطمن انا لعيب ماهر ونعرف نلعبها صح .......
أنت تقرأ
ماذا لو عاد معتذرا ؟
Mystery / Thrillerرواية :ماذا لو عاد معتذرا ؟ 💔🙍♀️🚶♂️💔 _ بقلم : سوسن الأزهر _ رواية بلهجة ليبية🇱🇾
