ماذا لو عاد معت‍‍ذرا ؟

معتذر 3

رواية : ماذا لو عاد معتذراً
💔🙍‍♀️🚶‍♂️💔
بقلم : سوسن الأزهر

......
الحلقة الثالثة .....

*** لايك قبل القراءة وتعليق لو عجبتكم الحلقة ***

من بنى لنا في القلب بيتا اقمنا له في الروح وطنا .
.... عبارة مؤثرة من ذكريات الماضي .
****

وعند أمل من لما رجعت من خطبة يزيد ولد خالتها وهي صافنة في دارها وكل ما اذكرت شن دار فيها جسمها كله يرجف في تقزز وخوف ودموعها ع خدها :
واللهي مش حنسكتله الحقير .. بس مانبيش تصير مشكل بين ماما وخالتي .. واللي حبيته مش ليا .. الكل يتجاهل في مشاعر .. حتى وتين اقرب الناس ليا .. وانا انحبها ومقدرة مشاعرها .. بس خايفة عليها وخايفة حتى انا نضعف قدام قلبي 
وجت خشت عليها امها :
خير إن شاءالله .. كنك مامشيتي للعمل
امل بوجه دابل : بس تاعبة اشوي حاسة بصداع
عزيزة : خديتي دواء
امل : اي خديت حبة اشوي ويهدا .
عزيزة : اهو جاتك صاحبتك حنين انزلي شوفيها وانتي محوسة هالدنيا هكي .. كان قلتلها تخشلك .
امل : لا خليها في دار الجلوس  اشوي انغسل وغيري دبشي وانجيها .
عزيزة : باهي سقدي روحك .. خلي نمشي انديرلها قهوة .
امل بتعب وتكاسل : باهي هي نضت  .
ناضت غسلت ولبست توتة سماوية في الرصاصي كم  ولفت شعرها فوق ونزلن منها خصلات على جبينها وحطت كريم للوجه وتعطرت وطلعت .
.
.
.
وعند وتين وهي فالطريق .. ويزن صوت الاغاني على حدها ويدندن واخر انسجام .. وتين طارتلها ونقصت الصوت :
شن هالاغاني اللي صارعنا بيها عالصبح .
يزن : تبي انحطلك قرآن تسمعي وانتي ساكتة .
وتين : اي حط عادي .. ع الاقل كلام ربي خير من هالضجيج اللي حاطه لينا .
يزن : يوووه .. حتى الشريط انسيته فالحوش .. اصلا انا عندي الجماعة مانرقدش الا على القرآن
وتين : بسم الله منك ومن شيطانك
يزن : راهو بنوصل غادي اتزبطولي الغدا  .. مانبيش سفرة ناشفة  .. قولي لبنت عمك اتكتر اللحم والبطاطا المقلية والفلفل .. نبي حاجة ناشطة ومفحفحة .
وتين : جيت غير تاكل .. اصلا انا ماقلت لحد ع جيتنا  .. نبيها مفاجئة .
يزن : ايه مفاجئة وخليني انا جيعان .
وتين : ولا يهمك توا انعوضها لك فالعشاء
يزن : هكي تمام .. اصلا انا بنبات مع خيري فوق في حوشه .
وتين : باهي وقف جنب المحل هذا جيبلي امية اعطشت .
يزن : حاضر وانتي ديمة عطشانة .. بلكي عندك جفاف وماتدري .
وتين : جفاف في عينك .. هيا انزل بنموت من العطس .
يزن : تي باهي اهو نازل .. شن مش قادرة تصبري كلها ربع ساعة ونوصلوا  .
.
.
.
.
عزيزة ادير فالقهوة فالطبخ  .. خش خيري وقعد ينادي عليها .. وجا صوتها من المطبخ :
تعال انا في المطبخ  .
وخش خيري المطبخ :
شني مفيش فطور ؟
عزيزة : فطور شنو هالوقت توه بطيب الغدا  .
خيري : باهي توه نفطر في حوشي .. شني امل معاها ضيوف .
عزيزة : اي صاحبتها حنين .. ابنية ماشاءالله عليها تفتح النفس  جمال ودلال وطيبة ماتشوف كان ابتسامتها ديمة على فمها  .
خيري فهم طول تلميحات امه وغير الموضوع : باهي احسبيني في فنجان قهوة بنعدي انكسد في المربوعة اشوي .
عزيزة : اااخ منك بس .. باهي ان شاءالله .. اشوي وانجيك .
وكلمت امل اتجي ترفع القهوة لصاحبتها .. ورفعت قهوة لخيري في المربوعة وقعمزت بحداه بحدية :
ها .. شن رايك نخطبلك هناء بنت خالتك .. ماشاءالله عليها .. البنت سمحة وتهبل ومفيش حاجة ماتعرفش اديرها .
خيري بإصرار : لا مانبهاش
عزيزة : ياولدي حرام عليك لامتى بس بتقعد هكي لا مرا لا عيلة .. حتى ربي ماقال بيه
خيري : يامي لما نحس الوقت مناسب انجي انقولك  بس توه لا  .
عزيزة : باهي عالاقل نعطوا فيها الكلمة .. حتى يزيد ولد خالتك هالطايش اهو اعقل وخطب وعرسه قريب .
خيري : يامي انا مادخلنيش في حد وحياتي اتخصني بروحي لو مضايقين مني كلها اسبوع او اسبوعين وانسافر .
عزيزة : لا ياولدي خلاص .. ياسر غايب عليا خمس سنين ومش داري بحالي كيف صاير فيا في غيابك .. خلي انوض انطيب الغدا خيرلي وخلاص .
.
.
.
وامل في دار الجلوس هي وصاحبتها حنين  وحكتلها كل شي صار معاها في حوش خالتها يوم خطبة يزيد .. وحنين عصبت عليها وقعدت اتهزب فيها بزيادة :
لامتى بس بيتمادى معاك وانتي ساكتة عليه .. اصلا هذا اللي زايده .. كان ع الاقل شكيتي فيه خوه .
امل بحزن : بدر لا  .. انتي عارفة معزته ومكانة عندي .. صح هو قلبه متعلق بوتين .. بس قاعد .. وسكتت .
حنين : قوليها وكملي عليها .. قاعد حبيبك ياهبلة .. تبي ادمري بنت عمك على ماهي مدمرة .. اصلا حتى هو زيه زي خوه .. مايعرفوش معنى الحب الحقيقي .. معقولة ايخلي البنت من غير سبب لايقوللها لاطابت لا انحرقت .
امل : تعرفي .. انا مانبيش نساله ليش .. لاني خايفة يرجعوا لبعض واني نرجع للعذاب .. برغم اني حاسة انه وتين تعرف .. بس ماتبيش تخسرني ولا انا نبي نخسرها .
حنين : واللهي حيرتيني معاك  .. وجا صوت وتين من عند باب الصالة :
السلام عليكم .. ماما عزيزة .. امولة .. وينكم .. انا جيت .
وطلعت عزيزة من دارها وخدتها في حضنها وضمتها بقوة :
اهلين وتين والله استحشناك .. اكيد بتقعدي معانا كم يوم .
وتين : بفرح .. اي جدي قالي يومين تلاتة مش اكتر ايكمل يزن شغله ونرجع .
عزيزة : جابك يزن وكنه ماخش سلم علينا .
وتين :  رقى لعمو خيري فوق .. قال ايريح اشوي وينزل ايسلم عليكم .
عزيزة : باهي براحته .. حظكم حلو .. داير كسكسي باللحم الوطني والخضرة .. باهي مزال ما رقيته بيش نحسبكم فيه .
وتين : ياريت ياماما .. يزن وتعرفيه يتحمل كل شي الا الجوع .. مش عارفة لمن طالع مفجوع .
وطلعت امل واول ما شافتها مشت تجريلها ضمتها بقوة وتعبوا اعيونها دموع .. وتين حست بيها انها صاير معاه شي  .. بس تجاهلتها قدام امها عزيزة :
كذابة هذا كله شوق ليا ومستاحشتني  .
دفتها امل عنها :
خزي عليك .. الحق في اللي جاي يرحب ويستقبل فيك .
حنين : تي غير خليلنا حصة في السلام بس .. وجت ضمت وتين وسلمت عليها بالخد :
واللهي ليها حق امولة تستاحشك .
وتين : وانتن عاد كنتن شاداتها قرمة عليا  اعترفن .
عزيزة : يلا خشن قعمزن داخل خلي انوتي الغدا  .
حنين : لالالا ياعمتي صحيتي .. حتى غدايا عالنار وماما تستنى فيا .. وتعرفي بوي ديمة فاصل .. لو الغدا ماجا في وقته ماياكلاش .. يتكبر ويزعل وعنده السكر .. وماناش عارفين كيف نتصرفوا معاه .. اهو قاعدين انراضوا فيه وخلاص .
عزيزة : معاك حق  بوك واعر وعنيد ويمة متغشش .
حنين : اهو عرفتي بروحك .. يلا مع السلامة .. نتلاقوا ع خير  .
عزيزة : إن شاءالله يابنتي سلمي عليهم هلك .
وطلعت معاها امل توصل فيها لعند الباب البري ..
وتين : انا خاشة نرتاح شوي .
عزيزة : اي بري ارتاحي .. يلا نص ساعة ويكون الغدا واتي .. وخشت امل اشرتلها اتجي اتخش معاها المطبخ ادير حاجة مالحة ع السفرة وسلطة ورق وخيار اتزين بيها الاكل .
.
.
.
وبعد يومين  ..
بدر قاعد في داره مدمن قهوة ودخان .. خش يزيد يشوفله بطرف عينه مش راضي ع وضعه .. يزيد بطبعه غيور وخاصة من خوه بدر :
بدر اعطيني مفتاح سيارتك طالع .
بدر : وكنه سيارتك .
يزيد : سيارتي مافيهاش بنزين .
بدر : باهي وين ماشي ؟
يزيد : للنادي وين عندي بنمشي .
بدر : باهي ارفعني معاك لحوش خالتي .. نبي انشوف خيري .
يزيد : بتنرفيز وكأنه اضايق منه :
باهي يلا سقد روحك اتاخرت راهو .
بدر  يده مزال في الجبس ومايقدرش ايسوق بيها :
هدي روحك شنو النادي بيطير .. تعال ساعدني انغير دبشي وانت واقف تتفرج عليا .
يزيد بتذمر : اوووف منك .. مش وقتك بكل راهو .. اتاخرت بدر وانت تبيلك ساعة عشان تلبس وتأنق وهذي تمشي وهذي لا .. بتهبلها المرا بعدين معاك .
بدر بنزعاج : يزيد .. مش حيكون فيه مرا .. وسكر عالموضوع .
يزيد : وانا شن دخلني فيك .. حياتك وحر فيها .. ويلا سقدني قولي اي قميص تبي انطلعه لك .
اشرله على بدلة طلعها له من الدولاب وساعده يلبسها .. كان قميص امريكاني ازرق خافت بنفس لون البنطلون :
ها هكي تمام .
بدر : تمام يلا .
.
.
.
وعند خيري فوق في حوشه مع يزن وهو يجهز في روحه للسفر واتصل ب وتين :
ها ياهم .. واتية ولا لا .
وتين بنزعاج : استنى اشوي وين طاير  دوبه الوقت .. عشية خلي الشمس تبرد  .. وبعدين نديرلك في حاجة تاكلها فالطريق ولا ماتبيش .
يزن بهدوء : ااااه .. لو هكي نستنى ليش لا ...وكتري من قتلك عليه واحنا جايين .. مانبيش ننفضح قدام عمو خيري  ... وصكر .. وشاف لخيري وهو يضحك عليه .
يزن يبرر في موقفه بإحراج : ماتفهمنيش غلط  راهو  .. هذي شفرة بيني وبينها .
خيري : شفرتك تبي رمز قوي بيش ماتنفضحش .
يزن : قصدك فضحتني .. عليك حالة 😁 .
خيري وهو يفكر وشاغل تفكيره بجده :
ماقالكش جدي شن يبيني .
يزن : واضح ياغالي .. اكيد يبي ايزوجك ويفرح بيك .
خيري بتعصب : يوووه مش وقته بكل .. امي من جيهة وجدي من جيهة .. ومزال جاي دور بوي يختمها .
يزن : انت لو فيه وحدة في عقلك قولي عليها وانا نقنع جدي بيها .
خيري : لاوحدة ولا تانية .. قوله توه انكمل شغل وانجي انكسد معاه يومين فالحوش .
يزن : تمام ياغالي .. انا بنزل شنطتي .. وعندي حاجات بنمشي انجيبهم من المحل ونرجع نرفع وتين .
.
.
.
وعند بدر  وصله يزيد لحوش خالته عزيزة ولف طول كمل طريقه للنادي  .. خش بدر بكيس فواكه  لقى خالته تسقي في جنان .. سلم عليها ومدلها كيس الفواكه .. عزيزة :
وليش متعب روحك ياوليدي
بدر : مفيش شي من واجبكم .. اكيد خيري قاعد
عزيزة : ايه قاعد وين عنده بيمشي .. تعرفه انت لاطلعة ولاخشة .. حتى فتحتله موضوع العرس طارتله وقال كان هذا انسافر .
بدر بتوتر : خليه على راحته ياخالتي .. يلا خلي نمشي انكسد بحداه اشوي .
عزيزة عارفة انه بدر يتهرب من الموضوع زيه فسكتت .. ورقى بدر لخيري .. فتحله الباب .. لقى الدنيا ضباب من الدخان  .. وبدر مشى طول يفتح ف النوافد وباب البلكونة ويهوي فالحوش :
انت طبيعي عايش في هالخنقة هذي  .
خيري بعصبية :
ايه طبيعي امالا تشبح فيا صناعي  .
بدر : باهي غير هدي روحك .. عندك قهوة .
خيري : مش عارف .. شوف المطبخ كان فيه  ديرلي معاك  .
بدر : تمام .. ومشى بدر طول للمطبخ  .. كان كله حايس ومقلوب راسا على عقب .. حاول اينظف حاجات خفيفة وعالسريع ودار قهوة وطلع قعمز جنب خيري :
تي معقولة مخلي المطبخ زي الكناسة .
خيري : توه بعدين ترقى امل اتنظفه وتنظف الحوش كله .
اهو مانستها بنت عمها هاليومين واخدة راحة من شغل الحوش .. ماتصدق ايجي حد ياخد مكانها .. بدر شرق من القهوة وتبزعت عليه .. خدا منديل وقعد يمسح في دبشه بتوتر وقلبه قرب يطلع من مكانه وتغيرت ملامحه وفي عيونه لمعة حزن .. وطبعا خيري كان عنده علم بموضوعه مع وتين .. بس تجاهله تماما :
كنك انخطف لونك  .
بدر : لا بس حسيت وخزة في ظهري .. تعرف من لما طحت من الفرس قعد ايشد عليا مرة مرة .
خيري : اي فاكر .. لانك عنيد وماتبيش اتكمل علاج .
وجا بين عيونه شريط ذكريات طيحته من الفرس ..
كانوا العيلة كلها طالعين زردة في المزرعة مع حوش خالتهم عزيزة  .. والبنات دايرات جو :
جود اخت بدر  : بنات شن رايكن نلعبوا كرة طايرة
هناء : يلا يابنات نحبها الطايرة
امل : ها شن وتين تخشي معانا
وتين : لالالا انا مانعرفش نلعبها الحق
هناء : ولو انا معاكن خلوهم عليا بس  .. امولة شفتي يزيد عيونه عليك
امل : بلاهي فكيني منه .. اصلا هذا ليش مانبي نلعب معاكم
هناء : تي غير تعالي  فوتيه وخلينا انرفهوا عن نفسنا
ناضت وتين : اني ماشة نتمشى اشوي .
امل : يلا انا جاية معاك .
هناء : ماتبعديش واجد
والشباب :
يزيد : بدر شنو بتلعب معانا
بدر : اهو خيري انا ماشي انجيب دبشي من السيارة
وشاف ل وتين وامل ماشيات جهة المسبح  ومشى وراهن : امل
وتين التفتت برعب :
بسم الله ..
امل : ءءء نعم .. خلعتنا استغفرالله
بدر : وين ماشيات بروحكن
امل : انفسح ف وتين ف المزرعة
بدر وعيونه على وتين : بروحكن
امل : اي عادي
بدر : هذه مزرعة كبيرة وفيه بقر وخرفان ماتخافوش منهم
وتين رتعبت وطلعت اعيونها : بجد ولا ابصر
بدر : تبي اتشوفيهم تعالي معاي
وتين شدت في امل : لا امل .. خلينا نرجعوا
بدر : باهي فيه اسطبل للاحصنة في الجهة التانية شن رايكن
وتين بتردد وهي تشوف لنظرات بدر ليها :
لا انخاف حد يشوفنا يفهم غلط .
امل : كنك مش شايفتني وتين وانا شن اندير معاك يعني  وبدر ولد خالتي مش ولد جيرانا
بدر : اطمني الكل مشغولين  .. وبعدين احنا بنتفرجوا بس والا خايفة مني
وتين : لا
بدر : باهي تعالي  .. ومشوا للاسطبل الاحصنة واشرلها بابتسامة حلوة :
هذا الحصان امتاعي اسمه ورد .. تعالي قربي حطي يدك عليه .. ماتخافيش مايعضش
وتين : لا خليني انشوفه من بعيد وخلاص
بدر : تعالي بس ياخوافة اهو انا بحداك
وقربت وتين وكانت مترددة اتمد يدها عليه ومسك بدر بيدها وحطها عليه  وتين حست برجفة بمجرد ما لمس يدها :
خليه يتعرف عليك
وتين : يعني هكي هيعرفي
بدر : اكيد  وح يسألني عليك لو طولتي وغبتي عنه
وتين : اصلا انا معادش ح نشوفه لاني مش حنجي هنا مرة تانية
بدر : ويمكن اتجي ماتقولي شي
وتين : خلينا نرجعوا توا اكيد ح ينتبوه لغيابنا
بدر : عادي قوليلهم كنت مع حبيبي بدر ..
كنك خفتي انصبر عليك  ولو اني نتمنى .
وتين تشوف جاي وجاي :
وين امل اختفت .
بدر : ماتخفيش اهي قاعدة قريب .
ومشى بدر ركب على حصانه وقعد يجري بيه بسرعة جنونية ويلف ويدور ويرفع الحصان في رجليه الامامية فوق و طاح بدر من الحصان وحصل ضرب ع ظهره ورفسة على صدره  وانتبهن امل ووتين ليه ومشن يجرن  .. امل سنداته من ظهره :
بدر انت اكويس
كان واضح انه يتألم ومش قادر ياخد نفس
بدر بنفس ضعيف وصوت متقطع :
صدري  كلميلي يزيد او حد من العيلة
امل بخوف : تمام  وتين خليك معاه
وتين بتردد وخوف : بس
بدر : تعالي .. مش قادر ناخد نفس .. ومد يده ليها
و مسكت بيده وقعمزت جنبه ع الارض وهو اتكى براسه ع كتفها :
نفس .. مش قادر نتنفس
وتين بخوف : خلص اهدأ بدر  .. وشد على يدها بقوة لعند ما جا يزيد وخيري ورفعوه وسعفوه .
وصحى من ذكرياته على صوت خيري :
بدر انت حكيت مع الدكتورة اسيل
بدر عض على شواربه :
ايه كلمتها الاسبوع اللي فات
خيري : اها .. يعني مزال ماحكيت لاهلك
بدر : لا .. بس اطمن هي والبيبي بخير
خيري : المهم انت اتكون مطمن .. وماتنساش انك
بدر : خلاص .. سكر عالموضوع ياخيري
هيري : على راحتك .. بس ماتنساش تبعتلهم مصروف .. هما توا مسؤلين منك
بدر : اكيد .. امفكر انسافر في اقرب وقت .
خيري : ع فكرة جدي يبي يضغط عليا يبيني نتزوجها
بدر بتوتر : تتزوج من ؟
خيري : وتين بنت عمي من يعني .. هو لمحلي عليها مرة بس .. ؟؟؟؟
بدر سكت بوجع وغضة في داخله وكمل خيري كلامه :
بس انا مستحيل انوافق .. هي متربية معانا من الصغر .. يعني اختي الصغيرة
بدر ابتسم برتياح : هي فعلا هكي مدام متربية معاكم .. وناض .. انا ماشي .. ورفع مفاتيحه وتليفونه ووقفه خيري :
استنى
بدر : خير
خيري : انت مش حتقولي السبب
بدر : مفيش سبب .. يلا سلام  وطلع ونزل بسرعة هارب من نظرات خيري ليه .. وتلاقى مع خالته مقعمزة في الجنان مزال تسقي في الزرع :
بدر .. شن حالك ياولدي
بدر : الحمدلله ياخالتي
عزيزة : وينك معاد اتجي اتكسد معاي زي قبل
بدر : لا بس مشغول هالفترة
عزيزة : باهي عالاقل اقعد اشوي اشرب معاي قهوة
بدر : لا ياخالتي منقدرش توا .. خليها مرة تانية
عزيزة : لاتانية ولا تالتة تعال قعمز بس .. توا انقول لامولة اديرلنا قهوة .. بدر قعمز جنب خالته وكان متوتر ومتلبك وخايف تطلع وتين ويشوفها في اي لحظة .
.
.
.
وتين اتحوس في المطبخ قالتلها ادير قهوة عالسريع وطلعت وفي عقلها وقلبها اللي قاعد مع عمتها عزيزة من ؟ .. وكأنها حست بيه بس تبي تتأكد انه هو او لا لعند ماخشت امل  :
كنك هكي سارحة
وتين : امك قالتلي جيب قهوة وفيه معاها حد .. ويزن قالي اشوي وانجيك خلاص مروحين .
امل : باهي تمام .. خليك توا انا نرفعها .
وتين : بس عادي لو
امل : لو شنو
وتين : يعني لو مشغولة نرفعها انا
امل : لا مش مشغولة . كانت عارفة انه اللي فالجنان بدر .. وطلعت امل القهوة ولقت بدر قاعد مع امها فالجنان  سلمت وقعمزت معاهم ومدتله القهوة :
قهوتك وسط صح
بدر : ايه بس هذه حلوة اشوي
عزيزة : اكيد دارتها وتين هي تحبها حلوة اشوي
ارتبك وحط الفنجان بمجرد ما سمع اسمها وناض فجأة : معليش خالتي منقدرتش نشربها مرة تانية اني توا مستعجل
وكنك نايض اتقولك راكبك عفريت الشغل مابيطير
بدر : بس عندي مواعيد ملتزم بيهم
امل : خليه ماما ع راحته  .. وقعد ايشوف في جيهت المطبخ لعل وعسى ايشوف خيالها ولو صدفة او لمحة عابرة .
.
.
.
وتين وهي طالعة للسيارة .. تفاجئت ببدر راقي فوق راجع لحوش خيري .. وعينها جت في عينه بعد غياب خمس سنين .. في لحظة حس بمشاعر مختلطة وغريبة  .. وتفاجئت بصوت خيري وهو واقف فوق عند الدروج :
بدر .. تعال نبيك
بدر نزل راسه ومشى طول لخيري ورقى معاه فوق من غير مايلتفت للخلف .. وهو راقي مع خيري الدروج .. خيري بفضول بعدما شاف نظراتهم لبعض :
شن صار ؟
بدر ببرود : لالا .. مفيش شي .
خيري : بصوت عالي .. وتين .. سلمي على جدي والعيلة .
وخش يزن مسك وتين من يدها وخدا منها شنطة دبشها وشافلها كيف اتشوف لفوق ودموعها نازلات :
تي هي .. مانبيش نتأخروا على جدي .
واين : يزن .. هذا هو . يزن فهم عطول .. وسيب يدها ومشى يرقى وراهم :
لحظة بس توا انجيك
وتين : يزن لا .. ماتتكلمش معاه
يزن : اطمني .. انا بس نبي ناخد رقمه ونتعرف عليه  .. يلا امشي اركبي استنيني فالسيارة
ورقى يزن وكان طايرتله منه كيف ماعبرها ولا بكلمة
طق الباب وخش .. كانوا مقعمزين فالصالة .. اول ماشافه وقف قدامه والدم يغلي في عروقه :
انت بدر
بدر باستغراب ناض واقف مقابله :
ايه .. تفضل  .
وعطاه بوكس على وجهه :
بس حبيت نتعرف عليك .. قوي وتتحمل الوجع ولا لا  .
خيري ناض ووقف بيناتهم :
شن هالمهزلة هذه يزن  .. كيف تضرب الراجل في حوشي
يزن : اطمن خيري .. احنا حنكون اصدقاء .. ومشى يزن مد يده ليه عشان ايصافحه .. وبدر ردله نفس البوكس وضحك عليه : اكيد حنكون اصدقاء ومد يده وصافحه : انا بدر
يزن صافحه بإبتسامة غامضة : وانا يزن .. ممكن تعطيني رقمك .
بدر : اكيد ممكن
خيري يشوفلهم بأستغراب :
واللهي انتم مجانين .
يزن : يلا نستأذنكم  .. بيناتنا تليفون ياصاحبي
بدر : اكيد
ونزل يرن .. وخيري مزال مصدوم ومش فاهم حاجة :
انت تعرف يزن من قبل
بدر : لا .. وهذه اول مرة انشوفه
خيري : غريبة .. المهم خلينا في موضوعنا .. لو حاس بوجع من البوكس انجيبلك تلج
بدر : لا انا اكويس ..  بس ياريت اتأجل الموضوع لوقت تاني  انا ماشي
خيري : تمام . ونزل بدر وهو طالع شاف يزن حاضن وتين في سيارته .. وغلى الدم في عروقه لما عرف انها وتين ومشى وقف تاكسي واتصل بيه :
من البنت اللي معاك فالسيارة
يزن : وانت شن دخلك
بدر : مش حلو منظركم هكي فالشارع .. الناس حتفهمك غلط
يزن : غلط ولا صح .. محدش دخله بيني وبين حبيبتي يلا سلام وصكر .. وشاف لوتين بضحكة :
صاحبك غيران .. يعني فيه منه امل
وتين : شن تقصد يزن
يزن : يعني شافنا مع بعض وشاطت نار الغيرة
وتين بعدم اهتمام : باهي خلينا نمشوا
يزن : شنو ماعجبك الوضع
وتين : هو مش غيران .. هو بس فهم الموقف غلط وماحبش لقطتنا فالشارع
يزن : يانكدية انتي .. اصلا شن فهمك كيف ايفكروا الشباب .
وتين مالت براسها على نافدة السيارة ومزالت مصدومة مش مصدقة اعيونها انها شافاته وشافهامن غير مايحكوا ولا كلمة .. وحست بوجع تجاهلها ليها  .. وفي راسها ألف سؤال وسؤال ؟؟؟
***
لن أقول لك أحبك لأن قلبي ممتلئ بكأس وجعك حتى الثمالة .***

........ يتبع .........

/ ماذا لو عاد معتذرا ؟؟؟ / بقلم : سوسن الأزهر /