"وقد كانت صدفة"
ما بيه حيل من الجديد اني ابدي
شو هيه هيج وحظي واگف ضدي
گمت انعرف مو بالشكل بالظلمه تعرفني البشر
تلزمني ناگع خدي
عايفني هيج بلا سبب
احجيلمن من اختنگ
بس انت!.
تفهمني جنت لمن اضل وحدي...
____________________________
ايلاف:شعور الامومه شعور غريب يجمع خليط من المشاعر الحب العاطفه الحنيه كل هاي جانت مشاعري واني انتظر ابني يولد واني احسب اله يوم بعد يوم...
جنت دائماً اسولف وياه اخلي ايدي على بطني واسولف اله على اي شي يصير وياي طول اليوم سواء مضوجني أو شي يفرحني أحسه يسمعني يحس دا احجي وياه بحيث تجيني ضربات خفيفه اضحك ومن يدخل عليه امير ويباوعلي يهز بيده ويضحك عليه يگلي تخبلتي لو هرموناتج صاعده اليوم...
دخلت بشهر السادس وهنا الحمل زادني تعب وبطني حيل كبرت حتى رجليه ورمت،تمشي الايام واني مكيفه لان حخلصه هذا الشهر وابدي اجهز الابني جنت ازاغل عن امي لان متقبل اله بالسابع ابدي اجهز ف اشتري شغلات كل ما اطلع يعجبوني واشتريهم شغلات مثل اوڤر أو خرخاشه هيج شي...
ف مره جنت طالعه شفت حذاء صغيروني متت بيومه عليه بس ما شتريته تندمت تالي أكلت راس امير اله اشتريه وثاني يوم رحنه جبناه واجينه يالله رتاحيت...
جنت خالتهم بالكنتور كل ما افتحه يصيرون گبالي ابوسهم وارجعهم لمكانهم،جنت ما مصدك وانو اخير رح يتحقق حلمي واصير ام جنت اموت على الأطفال رغم التعب والم الابر والعلاج الاخذه، بس كل هذا يهون يوم الي يجي وافرح بشوفته يمكن البعض يشوفني أبالغ بفعلي تره حقي جان امنيتي يصير عندي طفل من القهر الشفته والكلام الي اسمعه جنت اموت قهر بداخلي صح كلام ينسمع بس يأثر حيل بيه مهما كان اني بشر وعندي مشاعري...
بيوم من الايام جان الاوف مالتي نزلت مثل عادتي كل مره الساعه باله 7 الصبح لان متعوده اگعد من وقت الباقين كلهم بالدوام بس اني وخالتي وايناس جانت يمنه البارحه اجت،بس ما ادري ليش مراحت اليوم لدوامه،المهم اني ما الي دخل بيه...
سوت الي گلاص حليب الصبح تريگت بي لان بعده تلعب نفسي من البيض وعلمود العلاج شربته لان الصبح اول مااگعد ما أشتهي ف أجبر نفسي اكل او اشرب اي شي .
المهم مشه الوقت وبديت بتنظيف البيت ركبت الغده وخالتي بالعشره سويت اله ريوگ أكلت وگامت طلعت مدري وين طبعا اني منو وتگلي وين تروح وبعده اجت ايناس أكلت وراحت ، اني هم ماالي علاقه كل الي عليه اسوي شغلي وبس ما الي دخل بيهن...صار الظهر وتصل عليه امير يسأل عليه وگال اجي من وقت لان ماعنده هواي شغل...
خلصت الطبخ وصارت الساعه12 جان تجي ايناس للمطبخ...
ايناس:اگلج خالتي وصتني اگلج بردات الطابق الثاني تنزليهم وتغسليهم زين وتنشريهم بالسطح...
أنت تقرأ
وقد كانت صدفة
ChickLit"ربما تقودك الصدفه لم تكن لتبالي بها إلى واقع لم تكن لتفكره به" بقلمي أنا غدير عبدالله
