رواية 🌟 تلبيس إبليس 🌟
🔅(الحلقة 11 ) 🔅
📩الحلقة الحادية عشرة 📩
انتهى الامتحان وتجمعت الشلة ولكن أميرة فضلت ألا تكون معهم لكي يكونوا أكثر ارتياحا في الحديث واوصت منى بان تكون لينة في القول معهم وهادئة ..
منى : ها بقى احكولي بالتفصيل ايه اللي حصل بالظبط
دينا : الاول فين أميرة وللا هي بقى عندها دم فجأة وحست باللي عملته
منى : دينا من فضلك مش حنبتدي الكلام كده من اولها ... مش حسمح الكلام يكون بالطريقة ديه على اميرة
دينا : لا والله من امتى ده ان شاء الله
منى : من انهاردة .... انا مش عارفة هي مضايقاكي في ايه ... ديه محترمة ومؤدبة ومتدينة و..
دينا مقاطعة : ومتذمتة ومعقدة وعايزة تأثر على الناس بأفكارها والدليل انتي اهو
منى : انا مالي يا دينا ... انتي عارفة ان ما حدش يقدر يأثر عليا غير لما اقتنع
دينا مستهزئة : اه بدليل انك اول لما كلمتنا عن الاغاني علطول بطلتيها ... ثم عادت لتقول باستهزاء: بس اكيد عن اقتناع طبعا
ردت منى بكل حزم وقوة : طبعا عن اقتناع ... كلامها كان صح وكان يحرك قلب اي حد ويخليه يخاف
دينا وهي تهز رأسها وكأنها لا تريد ان تسمع هذا الكلام : بصي من الأخر يا أنا يا أميرة ها اختاروا دلوقتي
عندما يأس الشيطان من الوسوسة لمنع منى من الالتزام حاول ان يؤثر عليها بشياطين الانس ليرجعوها عما هي فيه فالتهديد بفقد احدى اعز صديقاتها قد يؤثر على قرارها ولذلك ترك لـ دينا التصرف في هذا الحوار ......
منى : يا سلام هي بقت كده ... انتوا الاتنين اصحابي يا دينا مش حتخلى عن حد فيكم
رنا : ما ينفعش اللي انتي بتعمليه ده.. بجد انا مش فاهمة على ايييييييييه كل ده ..الموضوع مش مستاهل اصلا
دينا : بصي انا اصلا ما بقتش استريحلها خالص ...انا مش فاهمة بجد انتو اللي مكبرين الموضوع فيها ايه لما اسمع اغاني او اعمل اي حاجة طالما اهلي موافقين انا اصلا مش بعمل حاجة حرام واهم حاجة اللي جوايا مش برضه فيه حديث بيقول" إن الله لا ينظر إلى أجسامكم ، ولا إلى صوركم ، ولكن ينظر إلى قلوبكم وأعمالكم " خلاص يبقى ما فيش مشكلة
منى : يا سلام ... انتي حتفسري الكلام على مزاجك ... كل إناء ينضح بما فيه .... لو انتي فعلا اللي جواكي كويس زي ما بتقولي كان حينعكس على تصرفاتك ... على لبسك ... على كلامك على كل حاجة .... انا قولتلكم اخر مرة انا نفسي كلنا نتغير بجد.. مش شرط عشان نبقى ماشيين في طريق ربنا نبقى معقدين ومقفلين ومتذمتين ومش بنضحك ابدا ومش بنخرج والكلام ده كله مين قال كده ... احنا حنعيش حياتنا بس من غير ما نغضب ربنا... من غير ما نعمل حاجة غلط
