📩الحلقة الثانية عشر📩
جاءت إجازة نصف العام الدراسي الدراسي ومنى تجتهد في الطاعات وتعاونها في ذلك أميرة ...أما رنا ودعاء فمن الواضح أن موقفهما تجاه منى لم يكن إلا حالة مؤقتة أو نتيجة لتأنيب الضمير ... اتصلت دعاء برنا ودار بينهما الحوار الآتي ...
دعاء : ايه يا بنتي ايه اخبارك
رنا : تمام الحمد لله ... وانتي عاملة ايه ؟؟
دعاء : اهو الحمد لله ... بس مخنوووووقة جدا
رنا : وانا كمان جدااااااا .... كلمتي منى
دعاء : لأااااااا .... بصي يا رنا من الاخر انا بدأت اتخنق انا بقالي اسبوع بحاله كل ما اكلمها تقولي شوفتي الحلقة الفلانية على القناة الدينية ديه .. طب سمعتي الدرس ده
رنا : وانا كمان ... انا زهقت انا مش متعودة على كده .. بقولك ما تيجي نخرج
دعاء : يا ريت ... نروح فين طيب
رنا : تيجي نروح سينما .... فيه فيلم جديد نازل تحفة
دعاء : ماشي بس حنروح لوحدنا ... انتي عارفاني بحب اخرج في شلة
رنا : ما هو ما ينفعش اكيد نقول لمنى وأميرة
دعاء : طب ما تيجي نكلم ندى ودينا
رنا : يا سلام عشان منى تعرف وساعتها ما تعرفناش تاني .... وبعدين انتي عايزة دينا تستلمني بكلامها بقى انتي عارفة لسانها ... انا مش عايزة اطلع عيلة قدامها
دعاء : اولا ايه اللي حيعرف منى ... ثانيا بقى وده الاهم انا بجد صعبان عليا صحوبيتنا تروح كده ده احنا بقالنا سنين مع بعض ما افترقناش نيجي في كام يوم كده نهد كل حاجة
ردت رنا وقد تاثرت : ماشي خلاص ... بس كلمي ندى انتي وخليها تكلم دينا ... بكره كويس عشان دلوقتي مش حنلحق نخرج وكمان عشان اقولهم في البيت
دعاء : خلاص ماشي
اتفقت الشلة وفي اليوم التالي تقابلت رنا ودعاء وذهبتا سويا إلى ندى ودينا ....
رنا : عارفة لو دينا قالت كلمة ...
دعاء : لا ما هي حتقول .. بس انتي عدي بقى وبلاش خنقة
تجمعت الفتيات واستقبلتهم دينا بنظرات الشماتة ....
دينا : طب مش كنتوا تقولوا كده من الاول
دعاء : بس يا بت بطلي رخامه
دينا : وانتي يا ست رنا .... مش كنتي من كام يوم عاملالي فيها محامي عن منى وبتاع
.... طب استأذنتي منها وللا لا
رنا : ما تعدي يومك يا بت خلاص انا مش عايزة اتكلم في اي حاجة حصلت ... بس برضه انتي كنتي غلطانه
دينا بعند : لا مش غلطانة ... هي اللي عملت فيها شيخة فجأة
رنا : بصي من الاخر يا دينا هي صح وانتي من جواكي عارفة انها صح ... بس انتي مش حتقدري تعملي زيها ... وانا برضه مش قادرة اكمل كده على الاقل دلوقتي لاني مش عارفة اتغير كده فجأة
