رواية 🌟 تلبيس إبليس 🌟
🔅(الحلقة 13 ) 🔅
📩الحلقة الثالثة عشر📩
حزنت منى كثيرا لما حدث بينها وبين صديقاتها ولكنها استعانت بالله وحاولت ان تنسى هذا الموضوع وانشغلت كثيرا في العبادة ... وجاهدت نفسها في البعد عما يغضب الله .... لاحظ أهلها تغيرها كثيرا فلقد انتظمت على الصلاة في اوقاتها ... ولا تكاد تترك المصحف من يدها ......
دخلت الأم على منى فوجدتها جالسة أمام "الكمبيوتر "
الأم : ايه يا منمن انتي علطول حابسة نفسك في الاوضة كده مش تيجي تقعدي معايا شوية .. بقولك شوية وجاي فيلم في التلفزيون شكله حلو اوي تعالي اقعدي اتفرجي معايا
ترددت منى قبل ان تقول : معلش يا ماما مش حقدر.. ثم قالت بسعادة : اصلي الحمد لله نويت بعد كده نما اتفرجش على افلام ولا اسمع اغاني تاني
تعجبت الام وقالت : من امتى ده ... غريبة يعني
منى : اصلي لما عرفت انها حرام فقلت لااااااااازم ابطلها
الام في لهجة محذرة : اوعي يا منى تكوني بتعرفي حد من الجماعات اياها .. ملا دماغك بالحاجات ديه
منى : جماعات بس ايه يا جميل وبعدين يا ماما العصفورة قالتلي انك عارفة انه حرام بس عاملة نفسك مش عارفة مش كده وللا ايه ؟؟؟
ضحكت الام وقالت : ما انا بتسلي يا بنتي بدل ما انا طول النهار مش لاقية حاجة اعملها
منى : مش لاقية حاجة تعمليها القنوات الدينية كتير اتفرجي عليها او تعالي سلي وقتك على الكمبيوتر
الام : ما انتي عارفة اني ما ليش فيه اوي
منى : بلاااااااااش الكمبيوتر .... حسأل سؤال وعيني في عينك كده واوعي تدوري وشك انا شايفايكي .... اخر مرة مسكتي فيها المصحف امتى ؟؟؟
شعرت الام بالاحراج واطرقت رأسها
منى مداعبة : شوفتي بتدوري عينك ليه بقى
قالت الام باحراج : يوووووووه انتي بقيتي رغاية اوي كده ليه .... انا حمشي واسيبك ما حدش يعرف ياخد منك حق وللا باطل
منى : حتروحي فين... الفيلم برضه ؟؟؟
ابتسمت الام ولم تجب وغادرت الغرفة
فصاحت منى مداعبة : انا حشفر القنوات ديه على فكرة وححرمك من المصروف واخليكي تغسلي المواعين كل يوووووم
سمعت منى ضحكات أمها من الخارج ولم تشأ ان تطيل الحديث معها ..فهي تعلم انها تحتاج للصبر
اخذت منى تفكر في زيادة الطاعات فهي بالكاد انتظمت في اداء الصلاة في اوقاتها ...ولكن بالطبع لن يدعها شيطانها تفعل ذلك بكل سهولة ...
منى في نفسها : انا بفكر بقى اخلي عندي دم واصلي النوافل
الشيطان موسوسا : النوافل ... بس انتي يا دوب لسه منتظمة في الفروض ... اتعودي شوية على الوضع ده وبعد كده ابقي ابتدي صلي النوافل
