رواية 🌟 تلبيس إبليس 🌟
🔅الحلقة الثالثة والعشرون
وقبل #الاخيره🔆
عملت منى بنصيحة أميرة وكانت تهتم برنا كثيرا ...توقظها لصلاة القيام والفجر ....تخبرها بمواعيد الدروس الدينية ... وتذاكر معها ايضا ...كانت رنا تتقدم في العبادة بسرعة شديدة فكانت تفعل من الطاعات ما يفعله الملتزمون منذ زمن ....
كانت تريد ان تلتزم كل من ندى ودينا وكانت دائمة الحرص على الاتصال بندى واسداء النصح لها لما علمت ما بداخلها من خير ...اتصلت بها في يوم ....
رنا : السلام عليكم
ندى : وعليكم السلام
رنا : ايه يا بنتي عمالة اتصل بيكي بقالي اكتر من اربع ساعات يقولولي لسه ما جتش ورصيدي خلص ما عرفتش اكلمك على الموبايل...كنتي فين كل ده انا سايباكي من بدري في الكلية...
ندى : لا عادي زهقنا شوية من الكلية فخرجت انا ودينا وعمرو و... ارتبكت ندى ولم تكمل
قالت رنا بدهشة : انتي ودينا وعمرو وحسام مش كده
ندى : اه وفيها ايه ؟؟؟
رنا : طب في البيت يعرفوا
ندى : لا ما يعرفوش
رنا : طب لما يعرفوا حيعملوا ايه ؟؟؟ حيتضايقوا وللا عادي
صمتت ندى قليلا ثم قالت : عادي يعني ..ما هي ماما عارفة عمرو وحسام
رنا : بس تعرف انهم زمايلك في الكلية مش بتخرجي معاهم بره
ندى : رنا انتي كذا مرة تلمحيلي على عمرو وحسام وانا اعديها.. انا مش بعمل حاجة غلط.... انتي كنتي كده انتي كمان وللا نسيتي ؟؟
ابتلعت رنا تلك الكلمة ثم عادت لتقول بنبرة فيها شئ من الحزن والندم : ماشي يا ندى كنتت بكلمهم واهزر معاهم بس ما وصلتش اني اخرج معاهم بره الكلية وانا دلوقتي ربنا يعلم انا ندمانة اد ايه على كل لحظة وقفت معاهم فيها ...وبعدين افرضي كان بابكي بالصدفة شافك وللا حد من قرايبك ...ربنا سترها المرة ديه الله اعلم المرة الجاية ايه اللي حيحصل
ندى : رنا قفلي على الموضوع ده بقى ....انا راجعة تعبانة وعايزة انام ....سلام
رنا : ماشي يا ندى زي ما تحبي ....سلام
انهت رنا المكالمة وشعرت بحسرة شديدة لكل ما فعلته في السابق ...ومن تلميحات ندى ..
رنا :يا رب ... يا رب استرني يا رب وما حدش يعرف اني كنت بكلم ولاد ..
الشيطان موسوسا : ربنا ممكن يكون بيذلك بسبب اللي انتي عملتيه
رنا : لا لو اي حد عرف يبقى السبب مني انا ... انا اللي عملت كده في نفسي ... انا اللي اتجاهلت شوفي كام رسالة جاتلي من ربنا ...كام مرة منى كلمتني ونصحتني ... وكام مرة ماما تدخل عليا وانا بكلم حسام او عمرو على النت وربنا يسترها معايا وما تعرفش حاجة ....بس يا رب والله انا ندمانة اوي ما تفضحنيش بذنوبي
