رواية 🌟 تلبيس إبليس 🌟
🔅(الحلقة 19 ) 🔅
📩الحلقة التاسعة عشر📩
عادت رنا إلى المنزل وهي في حالة لا يعلم بها سوى الله ... كان الألم والندم يعتصران قلبها ... تمنت لو عاد بها الزمان للوراء بضعة أشهر ...فقط بضعة أشهر كانت من الممكن أن تكون سببا في تغيير حياتها بالكامل...كانت تتذكر ما مرت به في تلك الشهور وتشعر بالحسرة .... وبينما هي كذلك إذا بدعاء تتصل بها ...
دعاء:الو..... ازيك
رنا : الحمد لله ...انتى عاملة ايه؟؟؟
دعاء : انتوا اللي عملتوا ايه من غيري انهاردة ؟؟
رنا : يا سلام يعني انتي ما تعرفيش ؟؟؟
دعاء: ما اعرفش ايه ؟! هو فيه حاجة حصلت ؟؟
رنا : فيه حاجة حصلت ؟؟ده حصل بلاوي !!
دعاء: خير فيه ايه ؟؟؟
قصت رنا كل ما حدث بالتفاصيل ....لم تستوعب دعاء ما حدث فقالت : انتي بتتكلمي بجد ؟؟؟!! انتي عاملة فيا مقلب مش كده ...
رنا : مقلب ايه وبتاع ايه ؟؟هي الحاجات ديه فيها هزار انتي كمان
دعاء: طب لما دينا قالتلك كده عمرو قال ايه ؟
رنا : حيقول ايه يعني ...
دعاء : وازاي دينا تقبل اصلا ؟؟؟ وبعد الموقف اللي انتي عملتيه معاه ده المفروض كانت تسيبه وتمشي
رنا : اقولك على حاجة ... احنا اللي غلطانين من الأول طول عمرنا عارفين موقف الشباب من البنات اللي بيقفوا معاهم وبرغم كده برضه ما فيش فايدة عملنا نفسنا ولا كأننا عارفين حاجة ..وقلنا فيها ايه يعني ما كله كده ...
دعاء وقد بدأ يتسلل الندم إلى قلبها : عندك حق ... طب ومنى ما كلمتكيش من ساعتها ؟؟
رنا : لا ما اتصلتش ...وبصراحة انا من كتر ما انا مكسوفة منها مش عايزة اتصل بيها ...زمانها دلوقتي مفكرة اننا كلنا بقى مصاحبين ... انا بجد ندمانة اوي
دعاء: لا يا رنا انتي عارفة منى لا يمكن تفكر كده ابدا ... وحتى لو فكرت احنا حنشيل الفكرة ديه من دماغها
رنا : ازاي بقى ؟؟؟
دعاء : وديه محتاجة تفكير يعني احنا مش حنقف معاهم تاني ابدا بعد كده ...وكده هي حتفهم اننا سيبناهم بسبب الموقف اللي حصل معاها ...بس المشكلة بقى في دينا وندى .. انتي عارفة ان ندى لا يمكن تسيب دينا
رنا : وانتي عارفة اني لا يمكن اكلم دينا تاني بعد اللي حصل انهاردة ...
دعاء : بس انا خايفة يقولوا علينا كلام من ورانا وانتي عارفة دينا تعملها ..
رنا : انا مش عارفة ازاي انا كنت كده وازاي كنت مصاحباها وانا عارفة انها كده ..
دعاء: خلاص يا رنا ما تزعليش نفسك سيبيها كل حاجة على ربنا
