📩الحلقة الرابعة عشر📩
تبقى يوم واحد على انتهاء الإجازة ومنى تشعر بقلق شديد من اول ايام الدراسة فهي كانت تخشى كثيرا تلك المواجهة بينها وبين اي من افراد "شلتها القديمة " وبالطبع فشيطانها ينتهز فرصه اي ضعف او قلق ليزيد من حزنها ....
منى في نفسها : اكيد حقابلهم طبعا .... بس اعمل ايه اروح اسلم عليهم واكلمهم وانصحهم وللا بلاش
طب لو جت عيني في عين واحدة منهم لازم غصب عني اروح اسلم اومال يفتكروني ضعيفة ... انا زي ما اميرة قالتلي لازم انصحهم بس ما اختلطش كتير زي الاول ..
الشيطان موسوسا : بس انتي ناسية دينا ... ديه حتشمت فيكي شماتة ... ده غير كلامها بقى ... وعوجة رقبتها ...ومش بعيد يضحكوا عليكي تاني زي الاول
منى : يضحكوا عليا ليه ... وحتى لو ضحكوا ما يهمنيش حاجة ... وانا معايا اميرة ربنا يخليهالي ...
الشيطان موسوسا : بس افرضي روحتي الكلية واميرة لسه ما جتش وشوفتيهم حتعملي ايه ؟؟؟
منى وقد زاد قلقها : اه صحيح اعمل ايه ؟؟؟ يا رب خليك معايا انا مرعوبة ....
زاد قلقها وحيلاتها فاتصلت على الفور بأميرة .....
منى : السلام عليكم
أميرة : وعليكم السلام وحمة الله وبركاته
منى : ازيك يا مرمر اخبارك ايه
أميرة : انا الحمد لله تمام بس انتي مال صوتك ؟؟؟
منى : عادي ما فيش ... انتي عارفة الاجازة بقى خلصت والدراسة حتيجي بقى وحترجع تاني ايام المذاكرة والمحاضرات والسكاشن ... كده يعني
أميرة : مممممممممم بس كده يعني ما فيش حاجة تانية
منى : لا عادي يا بنتي
أميرة : طب عيني في عينك كده
ضحكت منى ضحكة تخفي ورائها شئ من الحزن والقلق ففهمت أميرة ما يجول بخاطر منى ..
أميرة : طب اقولك انا .. انتي خايفة من بكرة صح ؟؟؟
منى : بصراحة اه ... بس كنت مش عايزة اقولك وانكد عليكي بمشاكلي كفاية انتي تعبتي معايا الكام يوم اللي فاتو دول
أميرة : تصدقي بجد انا زعلت منك وانا اللي قولت خلاص احنا عدينا مرحلة الصحوبية ديه وبقينا اكتر من الاخوات
منى في محاولة لاسترضاء أميرة : والله ابدا يا أميرة انتي عارفة غلاوتك عندي اد ايه ... بس انا لما بكون مخنوقة الدنيا بتسود في وشي ومش بعرف بقول ايه
أميرة : تسود ليه بس .. بالراحة كده وكل حاجة حتتحل ان شاء الله وما فيش أي مشكلة ... انا دلوقتي عايزاكي كده تستسعيني بالله وتستعيذي من الشيطان لان كل حالة القلق ديه بسببه هو
منى : مش حكاية شيطان يا اميرة بس انا فعلا مخنوقة
أميرة : بيتهيألك ده شيطان لانك في بداية قلقك ده لو كنتي استعنتي بالله وفكرتي شوية بس.. ان اللي معاه ربنا يبقى ما يهموش حد ابدا كنتي بقيتي كويسة وتمام التمام لكن انتي سيبتي نفسك للتخيلات بقى .. طب حعمل ايه ... طب حكلمهم وللا لا ... طب حيرضوا يكلموني والشيطان بقى بيزودها والدليل كلام ربنا سبحانه وتعالي (إنما النجوى من الشيطان ليحزن الذين أمنوا وليس بضارهم شيئاً إلا بإذن الله )
يعني ممكن يكون اللي في دماغك ده اوهام مش حيحصل منها حاجة وتنكدي على نفسك وخلاص
