رواية 🌟 تلبيس إبليس 🌟
🔅(الحلقة 17 ) 🔅
📩الحلقة السابعة عشر📩
مرت أيام طويلة ومنى تشعر باليأس والإحباط فلقد صدمت من أقرب الأقربين إليها ... كانت تؤدي العبادات بفتور شديد وضعف همة بلا خشوع بلا حب بلا شيء..وبالطبع فشيطانها يلعب الدور الرئيسي في ذلك ....
الشيطان : يا سلاااااااام بقالي كام يوم مستريح على الاخر.. هي اي نعم بتصلي فروض ونوافل وده اللي مضايقني حبتين .. بس وايه المشكلة طالما من غير تركيز ومن غير دعاء زي ما كانت خانقاني ومن خير خشوع ولا عياط بقى زي ما كانت مموتاني يعني عادي ولسه المرحلة الجاية كمان حخليها تسيب النوافل شوية بشوية كده ..بلاش اخد المواضيع معاها كده قفش احسن تقفشني هي.. وكل اللي اعمله يروح ... لا وانهاردة كمان حزود معاها جرعة اليأس والاحباط كده حبتين عشان ابدأ بقى في المرحلة الجديدة ...
حان وقت صلاة العشاء فقامت منى بتثاقل شديد لأدائها ..صلت وهي شاردة الذهن حزينة ... بالطبع لم يتركها شيطانها فلم تدري كم صلت ...
اخذت تحدث نفسها اثناء الصلاة : هو انا صليت كام ركعة بالظبط ...تلاتة وللا اربعة يعني ديه الاخيرة وللا ايه
الشيطان موسوسا : لا اربعة يللا بقلا خلصي ..
منى : بس انا مش فاكرة اني صليت اربعة انا حعمل زي ما سمعت بالظبط اصلي على اقل عدد وبعد كده اسجد سجدة سهو ...
الشيطان موسوسا : لا سهو ولا حاجة انتي مصلية صح يللا بقى عشان لسه السنة كمان ...و شكلك تعبانة ونفسيتك مدمرة بلاش تصليها احسن كده كده مش حتتحاسبي لو سبتيها ..
افاقت منى ووجدت نفسها واقفة لا تتحرك اثناء الصلاة وغارقة في التفكيرفاستعاذت بالله على الفور وانهت الصلاة وسجدت سجود السهو وصلت السنة ... ثم جلست تفكر : ياااااااااه للدرجادي وصل بيا الحال وتذكرت حديث الرسول صلى الله عليه وسلم ((ان احدكم اذا قام يصلي جاءه الشيطان فلبس عليه حتى لا يدري كم صلى فاذا وجد ذلك احدكم فليسجد سجدتين وهو جالس))
الشيطان بقى في صلاتي وسيطر عليا وكمان كان حيضيع عليا السنة رحمتك يا رب وانا اللي من اسبوع واحد بس كنت بخطط لحفظ القران والدعوة كمان انا ايه اللي جرالي للدرجادي شيطاني سيطر عليا ..
الشيطان موسوسا : لا ده مش شيطانك ديه نفسك ... انتي اللي كده.. لانك شكلك ما كنتيش ملتزمة بحق وحقيقي كان كله كلام على الفاضي والدليل اهو ... واصلا اللي انتي فيه ده ما كانش التزام ده كان تعقيد ... ضيعتي اصحابك منك حتى امك بتقولك عليكي معقدة يعني المفروض بقى تشوفي الصح فين وتعمليه ..
واخذ الشيطان يزيد جرعة الاحباط فجعلها تتذكر جميع المواقف المحزنة في حياتها ... او تتخيل مواقف محزنة لم تحدث من الاساس.. وجعلها تتذكر سخرية اصحابها منها ...
