رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
أدم شاف للروشن وكان يشوف للمطر والعاصفه اللي كانت بره وقال : مها ورضا اليوم حيجوزوا
جهان ابتسمت : والله .... فرحتلهم انحس فيهم يحبوا بعض واجد ومايقدروش يتخلوا ع بعض
أدم هز راسه وهو يولع ف دخانه وقال : موضوع تافه
جهان عقدت حواجبها : شن الموضوع التافه ؟!.....الزواج
أدم وهو يشوف للروشن : لا انه مايقدروش يتخلوا ع بعض
جهان نزلت كرعيها من ع الكنبه بصدمه وعدلت جلستها : انت تقدر عادي انه اتفارق حد بسهوله ؟
أدم رشف خشمه وهز كتوفه : شن فيها يعني
جهان ضحكت بهزوه وسكتت ثواني وبعدها شيرت ع نفسها وقالت : وانا؟
أدم شافلها بستغراب وعقد حواجبه وقعد ساكت
جهان شافتله شويه وبعدها وقفت وقالت : تمام
ومشت جهة الباب وخذت كبوطها من المدخل
أدم وقف : جهان شن اديري ؟
لبست جهان كبوطها وحذائها وخذت شنطتها وطلعت
وأدم قعد واقف ف مكانه مصدوم
لعند ماسمع صوت نقاله يرن📱
طفا السبسي اللي كان ف يده وبعد شعره بيديه وهو يتنهد
خذا نقاله اللي كان يرن "رضا"
أدم وهو مغمض عيونه وحاطه يده ع جبهته : ايوا
انصدم وقال بصوت عالي : كيف؟!....تمام تمام جايك
سكر أدم الخط ومشى لداره لبس جاكيته بسرعه وخذا مفاتيحه وطلع
ــــــــــــــــــــــــــــــــ
الساعه1:00 م⭐
ف شقة مهاب 🏠
ليال مقعمزه ع الكنبه وتفرج ع التلفزون وهي ملتفه ف بطانيتها
ومهاب مصبي عند راسها وماسك كوره
ليال تنهدت : يامهاب كنك ع الصبح ...اخطاني
مهاب هز راسه : مش صبح توا قايله ،صبي العبي امعايه
ليال تثاوبت : انا نعسانه معناته مازال صبح
مهاب حذف فيها الكوره : باهي صبي
ليال حطت يدها ع راسها وتوجعت من ضربة الكوره وقالت : مريضه بنموت
مهاب ضحك : اللي زيك مايموتش حبيبتي
ليال شافتله بتفنيصه وقعدت تقلب ف قنوات التلفزون
مهاب قرب منها : بتصبي توا ولا انصبيك انا
ليال تنهدت : ياااااربي ،توا وقت لعب كوره ف الصالون وانا مريضه
مهاب ضحك وحرك حواجبه
ليال وقفت وهي حاطه البطانيه عليها وقالت : واخذ حاجه انت ؟!
مهاب ضحك : ماتخطريش عليه قريب يكمل مفعولها
ليال هزت راسها يمين ويسار وضحكت
مهاب حول من عليها البطانيه ومسكها من يدها : هيا هيا
ليال : بشويه خلي انحول التحف راه تكسرلي الدنيا
حولت ليال التحف وحركت هي ومهاب الكنبه ووسعوا الصاله
وقعدوا يلعبوا بالكوره مع انه ليال كانت مريضه وماعندهش جهد اتحرك
ليال تضحك : بشويه عليه راه مانعرفش نلعب كوره
مهاب ضحك وخبط فيها الكوره : واضح واضح
ليال قدمت وكانت بتاخذ من مهاب الكوره لكن مهاب تخطاها
طاحت ليال وهي صايخه من الضحك ومسكت مهاب من كرعيه وطيحاته امعاها
مهاب قعمز وهو ماسك راسه وقال : اااااه يابنت الكلب
ليال وهي راقده ع الوطا ضحكت : كسرتني الله يكسرك وزياده مريضه
مهاب قرب منها وطبس عليها : وين مريضه مانشوفش فيك مريضه
ليال انحرجت ودفاته : مريضه وخلاص لازم تعرف كل حاجه انت
مهاب ضحك بعدما فهم عليها ورقد ف جنبها ع الوطا
قعدوا ساكتين وهما راقدين ف جنب بعض
مهاب شاف لليال اللي تشوف للسقف وهي سارحه ابتسم وقال : في شن تفكري ؟!
ليال تنهدت : شي
مهاب شاف للسقف حتي هو وقرب يده من يد ليال ومسكها
ليال حست بيده غمضت عيونها وخذت نفس
مهاب كيف بيدوي سمع صوت نقاله يرن "أدم"
ناض من مكانه ورد
مهاب : الو
مهاب انصدم : كيف كيف ...اهو جايكم
ليال قعمزت بخوف : شن في ؟!
مهاب خذا مفاتيحه ونقاله وطلع بسرعه وهو يقول : لازم نمشي
ــــــــــــــــــــــــــــــــ
ف المستشفى 🏥
