رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
الساعه 3:49م 🍦
طلعت رويدا من غرفة جدة مها بعدما كانت تتطمن عليها ، خذت نقالها ورنت ع سماح بنت جيرانهم
رويدا : اهلا سماح
: اهلين
رويدا بتوتر : عندي مشوار ضروري عادي تجي تقعدي مع جديده
: تمام عادي
رويدا :خلاص انا نبي نطلع مستعجله ونخليلك باب الحوش مفتوح عشان تقدري تخشي للحوش
سكرت رويدا الخط ،ومشت بسرعه فتحت باب الحوش
وخشت للحمام وسكرت ع روحها وهي تبكي وماسكه حاجه ف يدها
قعمزت رويدا ع الارض وهي منهاره بالبكاء ، بس اتحاول انها مااديرش صوت عشان ماتحسش بيها سماح وتعرفها ف الحوش .
حطت يدها ع بطنها وهي تبكي وقالت بهمس : انا اسفه لاني بندير هكي ....بس انا ماعنديش حل ثاني ....انا مانبيش اندير كيف امي جابتني وعزقتني ....مش حنخليك اتحس بنفس الشعور ..ابداً
خذت السكين اللي ف جنبها وقطعت اوردت يدها ، وقعدت تنزف حتى الموت .....
ــــــــــــــــــــــــــــــــ
الساعه 5:00 م 💜
كان زيد ف داره يرن ع رويدا يبي يطمن عليها لانه لاحظ انها الفتره اللي فاتت نفسيتها تاعبه وامورها ملخبطه ، بس كانت المكالمه تفصل ورويدا ماتردش .
طلع زيد من داره بسرعه بعدما سمع عياط امه وباته
وصل للصاله وشاف باته وامه يتعاركوا و كان باته يضرب ف امه ، قدم زيد بسرعه وهو ف قمة غضبه باعد باته عن امه وخواته ادخلن وهنا يهدن ف امهن ، لكن باته رد وكان بيتهجم ع امه من جديد
دفه زيد بكل قوته ، طاح باته ع الطاوله اللي وراه وخشت حديدة الطاوله ف راسه من لاوره .....ومات
ــــــــــــــــــــــــــــــــ
- لانه زيد كان يرن ع رويدا ، وريدا كانت واخذه نقالها امعاها ف الحمام وكان النقال صوته عالي ، سمعت سماح صوت النقال وحاولت انها تفتح الحمام لكن كان مقفول ، فعرفت انه رويدا ف الحمام وممكن صايرلها شي ...❄
ــــــــــــــــــــــــــــــــ
الساعه 6:34 م🍯
خشت ليال للشقه وف يدها شكاير .
شافلها مهاب اللي كان راقد ع الكنبه بتعب ويشوف للتلفزون : ليال كم مره قتلك معش تقعدي بره الحوش لعند الوقت هضا
ليال حطت الشكاير ف المطبخ وشافت للساعه : الساعه سته مازال بدري!
مهاب بعصبيه : لامش بدري مغرب توا
ليال قعمزت جنبه وحطت يدها ع جبهته اتشوف ف حرارته : باه خلاص معش انديرها بس ليش متعصب انت توا ؟
مهاب بعصبيه : لاني قاعد ف الحوش هنا مانقدرش اندير شي وانتي تخدمي فيه بكل شي وحتي حاجات الحوش مش قادر انجيبهن وزياده كملتي فلوسك عليه وعلي دواياتي وع حياتي المعفنه
ليال ابتسمت بعدما عرفت السبب اللي امخلي مهاب متعصب طول اليوم قربت وباساته ع خده وهي تقول : ياحياتي انا ماكانش حيكون عندي فلوس ومكان نقعد فيه كان انت ماعطيتنيش شقتك و حصلتلي شغل ، يعني الفلوس اللي قاعده نصرف فيهن عليك هنا منك اصلاً ، وبعدين انت خلاص صحتك تحسنت وكم يوم وتقعد تتحرك و تقعد تخدم فيه وانا اللي نشحط عليك ....كملت ليال كلامها بضحكه
خلت مهاب يبتسم
ليال مسكت يده وهي تمشي ف صبعها ع عروقه وقالت : جعان ؟!
مهاب هز راسه وقال : لا
ليال ضحكت : بس انا جعانه ...هيا صبي امعايه للمطبخ ناكلوا
مهاب ضحك : تمام ووقف مع ليال ومشت ليال قدامه للمطبخ
ومهاب لحقها وهو يقول : ع فكره انا ماعطيتكش لا شقه ولا خدمه انتي اللي حصلتيهن ...معش تحسسيني اني داير حاجه كبيره
ليال بدون ماتشوفله : انت عطيتهن ليه ....وهي فعلاً حاجه كبيره
مهاب قدم عليها وحضنها من لاوره بقوووووه لعند مزطها وبعدها طلقها وهو يقول : انتي كنك ماتسمعيش ف الكلام ؟!
ليال تلفتت عليه وهي تضحك : طالعه لحبيبي مانسمعش ف الكلام وراسي يابس !
مهاب حضنها من جديد وهو يضحك ، وليال خشت ف حضنه وتشبثت فيه بقوه وهي فرحانه انه مهاب ردت صحته وقعد كويس
وقعدوا دقائق وهما حاضنين بعض بقوه وكل واحد فيهم يبتسم بعشق ويتنفس الاخر🔥♥
ــــــــــــــــــــــــــــــــ
الساعه 8:00 م 🐾
