ငါက တကယ့်ကို အမှိုက်ကောင် shou system! (Arc-1)

Chapter 1.1 ( Unicode)

[အဆင်သင့်ဖြစ်ပြီလား]

ချီကျောင်း တက်ကြွစွာနဲ့ခေါင်းငြိမ့်ပြလိုက်တယ်။
"အဆင်သင့်ပဲ"

နံပါတ်စဉ်စတင်ရေတွက်ကြောင်း အချက်ပြတဲ့စက်ရုပ်သံကျယ်ကျယ်ကိုကြားလိုက်ရတယ်။ နံပါတ်စဉ်တစ်ရောက်သွားတာနဲ့တပြိုင်နက် သူ့မျက်လုံးထဲမှာ အလင်းတန်းတစ်ခုကို ဖြတ်ခနဲမြင်လိုက်ရတယ်။ ထို့နောက် ကောင်းကင်ပေါ်ကနေကမ္ဘာဆီကျလာသလိုမျိုးခံစားချက်ကြီး သူ့တစ်ကိုယ်လုံးကို ပျံ့နှံ့သွားလေတော့တယ်။ သူမျက်လုံးမဖွင့်ရသေးခင်မှာပဲ ချီကျောင်းဟာ သူ့အစာအိမ်တစ်ခုလုံး ဇောက်ထိုးမိုးမျှော်ဖြစ်နေပြီလို့ ခံစားလိုက်ရတယ်။

System က သူ့ကို အိမ်သာရှိတဲ့နေရာကို အမြန်လမ်းညွှန်ပေးလိုက်တယ်။

ချီကျောင်းတစ်ယောက် အိမ်သာခွက်ကို ကျစ်ကျစ်ပါအောင်ဆုပ်ရင်း သူ့အစာအိမ်တစ်ခုလုံး ဗလာကျင်းသွားတဲ့အထိ ထိုးအန်နေရတော့တယ်။ နောက်ဆုံးသူစကားပြန်ပြောနိုင်တဲ့အချိန်ထိ နေ့တစ်ဝက်လောက်ကြာသွားတယ်လို့တောင် ထင်မိလေတယ်။
"ကမ္ဘာကူးပြောင်းတာကဘာလို့ဒီလောက်တောင်မအီမလည်ဖြစ်ရတာတုန်းဟ?"

[ပထမဆုံးအကြိမ်ဆိုတော့မအီမလည်ဖြစ်တာပုံမှန်ပါပဲ။ နောက်ပိုင်းဆိုရင်တော့အဆင်‌ပြေသွားမှာပါ။ ]

[ဒါကဒီကမ္ဘာအတွက်ပို့ထားတဲ့အချက်အလက်တွေပါ။ သေသေချာချာကြည့်ပြီးတော့ဇာတ်ကြောင်းအတိုင်းအတိအကျလုပ်ဆောင်ပေးပါ။]

ချီကျောင်းဟာ ခပ်တိုးတိုးသာ အသံပြုလိုက်နိုင်တော့တယ်။ ထို့နောက် ထိုင်နေရင်းနဲ့ပဲ မျက်လုံးကိုမှိတ်ကာ system ပို့ထားတဲ့အချက်အလက်တွေကို စတင်ဖတ်ရှုလေတော့တယ်။

System ရဲ့ နာမည်အပြည့်အစုံက အမှိုက်ကောင်system။ ချီကျောင်းဟာ လေလွင့်‌တစ္ဆေဖြစ်နေပြီး system နဲ့ချိတ်ဆက်လိုက်ရတာမျိုးမဟုတ်လေဘူး။ သူတစ်နေ့မှာရုတ်တရက်သေသွားခဲ့တာ။ သူလူဝင်စားစရာနေရာရှာရမလား ဒါမှမဟုတ် အဖြူ‌ရောင်အလင်းတန်းလိုမျိုး တစ်ခုခုပေါ်လာတာကိုစောင့်ရမလား မသိဖြစ်နေတဲ့အချိန်မှာပဲ system ရောက်လာခဲ့တာ။