9:00am
سلمى وعت البنات و قالت لهم ينزلون تحت
نزلت مهرة اخر وحده كل عادة
الكل كان متجمع الا حمد مب موجود
راحت قعدت عنهم
مهرة : ليش قايمين الحين؟
ريم : عندي موضوع لكم
الكل لف على ريم
ريم : اليوم ميلاد حمد اخر مره احتفل بيوم ميلاده لما كان عمرة 13 ، هو ما يحب يحتفل وايد.. بس بما انه نحن متجمعين قررنا انه نحتفل فيه
ميرة : فكرة حلوه بس شو الخطة؟
ذياب : بما انه حمد ما يحب الرسميات وايد قررنا نتيمع فالبر نحن و الاهل عشان نحتفل فيه.. + نلتقي فيهم لانه من زمان ما شفناهم
مهرة : هيه والله الفكرة حلوه
منصور : انزين و غيث وصل؟
مهرة : غيث؟
ريم : نحن كلمناه و قال انه امس وصلو
منصور : زين
سلمى : حاولنا نقنعه انه هو و اهله يباتون هني بس اصر انه يتم فالفندق و قال انه المفاجاة بتخترب لو هو بات هني
ميرة : يعني الحين غيث هني فالامارات؟
ريم هزت راسها "هيه"
مهرة ابتسمت : و حمد ما يدري صح ؟ ما يدري عن ولا شي؟
ذياب : هيه ما يدري ... لما ينش بقوله انه بنسير البر و من هناك بنفاجاه
ريم : خلاص اتفقنا؟
الكل : اتفقنا
بعد النقاش هذا الكل راح يتريق
و ريم راحت توعي ولدها عشان يتريق معاهم
.
.
.
5:00pm
الكل جاهز
انقسمو على سيارتين و كلهم راحو البر
وصلو بعد مسافة 45 دقيقة
الكل كان موجود هناك
وقفو سيارتهم و بدو ينزلون الاغراض
يت ام ريم من بعيد
مريم : هلا و غلا هلا هلا بعيالي
ريم راحت عند امها و حضنتها بقوة : اهلين امي
ريم باست راسها و هي تصيح
ريم : اشتقت لج
مريم و هي تحاول تمسك دموعها : و انا اكثر حبيبتي
ذياب من وراهم
ذياب : و انا مرت عمي؟ مالي حضن؟
مريم : هلا هلا بوليدي "حضنته"
ذياب باس راسها : كيف حالج امايه
مريم : بخير بشوفتكم يا حبيبي
بعد الحضن الطويل مريم لفت و شافت حمد واقف بعيد و منزل راسه
مريم : حمد؟
حمد رفع راسه
مريم لفت على ريم : هذا حمد!؟
ريم هزت راسها : هيه يمه هذا حمد
راحت له مريم و حضنته
حمد بادلها الحضن و هو ساكت
مريم : كنت صغير و كتكوت و الحين ما شاءالله عليك ريال
