أصول التربيه الصحيحة

🌺الحلقة الثانية والعشرون🌺

السيرة_النبوية_للأطفال

الحلقة الثانية والعشرون

🌻كان يا ما كان و ما يحلى الكلام إلا بذكر النبي عليه الصلاة والسلام

🌻ولادي حبايبي دايما لما بيسمعوا اسم سيدنا محمد يردوا

🌻علطووووووول.....عليه الصلاة و السلااااااااااام

🌻ممتازييييييييييييين

سيدنا محمد أخد الطبق الفاضي و بدأ يحلب الشاه "المعزة " تاني ....
ونزلت لبن كتير تاني ...و الطبق الكبير أتملى لبن تاني ...
سيدنا محمد أخد الطبق الكبير و إداه لأم معبد و قالها ده ليكي ...
ومشى هو و أصحابه ...

🌻وأم معبد واقفة و مستغربة و مش مصدقة اللي حصل ....
🌼إزاي الشاه "المعزة " الضعيفة بتاعتها اللي مش بتاكل خالص تنزل كل اللبن ده ....
فيه حاجة عجيبة !
أم معبد ما كنتش تعرف إن ده سيدنا محمد ...و إن ربنا بيساعده ...
وبيخلي فيه بركة و خير من عند ربنا في كل مكان بيكون سيدنا محمد فيه ....
بعد شوية جه جوز أم معبد و شاف الطبق الكبير اللي مليان لبن و استغرب
🌻وسألها إيه ده ؟
منين اللبن ده ؟ احنا الشاه بتاعتنا مش بتجيب لبن خااالص ....
فحكت له الحكاية ....
🌻جوزها قال : ايوة انا عرفت مين ده .... ده أكيد النبي اللي بيقولوا عنه في مكة ...
أنا لو شوفته هسمع كلامه و هعمل كل الخير اللي يقولي عليه ..

🌻سيدنا محمد و أصحابه كملوا طريقهم ... خلاص قربوا يوصلوا المدينة ...
وصلوا مكان اسمه قبااااء ....اسمه إيه ؟ قباااااء ...
🌻وبنوا مسجد ....اسمه مسجد إيه ؟؟؟ مسجد قبااااء....

🌼وبعد كده كملوا طريقهم
لغااااااااااااية لما وصلوا المدينة ....
🌻وهناك كان كل المسلمين الطيبين مستنييين
🌼مستنييين سيدنا محمد ...اللي بيحبوه أكتر حد في الدنيا ....
🌻سيدنا محمد اللي ربنا اختاره عشان يعلم الدنيا كلها
🌼يعلمها الخير و الحق و الأعمال الطيبة ....
🌻عشان يكونوا مؤمنين طيبين صالحين
وربنا يدخلهم الجنة

🌼أخييييييييييرا أهل المدينة الطيبين شافوا سيدنا محمد ....
جاي من بعيد ....
بقوا فرحانين ..... فرحانييييين أوي وندهوا علي بعض
وجريوا علي سيدنا محمد و اصحابه ....

🌻أخيرا ! أخيرا ! سيدنا محمد وصل المدينة

🌼وكل واحد من المسلمين الطيبين بقه يشد الجمل بتاع سيدنا محمد عند بيته
🌻عشان نفسه سيدنا محمد ييجي و يعيش معاه
🌼بس سيدنا محمد قالهم سيبوا الجمل و ربنا هيوقفها عند المكان اللي هعيش فيه ...
🌻فكلهم سمعوا كلام سيدنا محمد و بعدوا عن الجمل ....
ففضلت ....ماشيه ...ماشية .... لغاية فييين ؟؟؟

🌻سبحان الله !!!
فضلت ماشية لغاية بيت أخوات مامة
🌼سيدنا محمد (يعني خيلانه )
يعني قرايب سيدنا محمد

🌻والجمل قعد في الأرض ....
فعرفوا إن ده المكان .....
🌼عند بيت أبو ايوب
أبو ايوب الأنصاري ...
🌻هو ده البيت اللي عاش فيه سيدنا محمد ....
🌼وجنب المكان ده بنا سيدنا محمد و المسلمين مسجد ....مسجد الرسول عشان كل المسلمين يصلوا فيه ....
وكمان بنا بيت عشان يسكن فيه ...

🌼وسيدنا محمد عرف كل المسلمين إنهم إخوة ....
🌻مسلمين من المدينة (الأنصار) أو مسلمين من مكة (المهاجرين) ...كلهم إخوة
🌼المسلمين من أي مكان .... إخوة ....
يخدوا بالهم من بعض
🌻ويساعدوا بعض و يحبوا بعض .
فبقى كل واحد مسلم معاه حاجة يديها لأخوه اللي مش معاه ...
وكمان كان فيه يهود في المدينة .....
🌻سيدنا محمد قال لليهود إنهم في أمان طول ما هما مش بيؤذوا المسلمين .
🌼سيدنا محمد بيعلم الناس الأخلاق الطيبة اللي ربنا يحبها تكون فينا ...

🌼هنكمل بكرة إن شاء الله

🌻اللهم صل علي سيدنا محمد