أصول التربيه الصحيحة

🌺الحلقة الثالثة والأربعون🌺

السيرة_النبوية_للأطفال
الحلقة الثالثة والأربعون

تابع غزوة تبوك

🌿الصادق هو الفائز

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼عليه الصلاة والسلام

🌼فاكرين طبعاً يا ولادي إن فيه 3 رجالة مؤمنين طيبين

🌻دول ما راحوش مع الجيش ...

🌻فاكرينهم ؟

🌼كعب بن مالك
🌼مُرارة بن الربيع
🌼هلال بن أمية

🌻كعب بن مالك و أصحابه... مؤمنين صادقين ...

🌼معقول يروحوا يقولوا كلام كذب لسيدنا محمد عشان يسامحهم ؟

🌻تفتكروا يا ولاد هيعملوا زي المنافقين ويكذبوا ولا هيعملوا إيه؟؟

🌼كعب بن مالك وأصحابه كانت ظروفهم كويسة وأغنيا 

🌼وعندهم فلوس يشتروا أكل وسلاح ...

🌻ومفيش أي حاجة كانت تمنعهم انهم يروحو يجاهدو مع سيدنا محمد ...

🌼طب يقولوا لسيدنا محمد إيه ؟؟ يكذبوا زي المنافقين ؟

🌻ويقولوا عندنا ظروف منعتنا من الجهاد؟؟

🌼ايه اللي ممكن يقوله كعب و أصحابه يخلي سيدنا محمد ما يغضبش منهم؟ إيه الحل يا أولاد ؟

🌻الحل حاجة واحدة بس .... الحل هو الصدق ...

🌼كعب بن مالك فكر ... و قال مش هخلي الشيطان يكسبني ...

🌻الشيطان عاوزني أكذب عشان سيدنا محمد ما يزعلش مني ...

🌼الشيطان عاوزني أعمل زي المنافقين ...
بس أنا هقول الصدق مهما حصلي ...

🌻راح كعب بن مالك لسيدنا محمد في المسجد ...

🌼ولقي سيدنا محمد قاعد.... فسيدنا محمد قاله تعالي ....

🌻كعب بن مالك راح قعد قدام سيدنا محمد
🌼سيدنا محمد سأله : ليه مجتش معانا ؟؟

🌻كعب بن مالك قال لسيدنا محمد :

🌼يا رسول الله ... أنا ممكن أقول اي كلام مش حقيقي عشان ترضي عني ....

🌻بس أنا مش هقول غير الصدق ...
لأن اللي بيكدب ربنا هيبين كدبه و يفضحه .....

🌼أنا مجتش معاك الحرب و الجهاد يا رسول الله و مفيش أي سبب يمنعني كل ظروفي كانت كويسة ..

🌻ومعايا فلوس و صحتي كويسة ...
مفيش عندي أي عذر يمنعني ..

🌼سيدنا محمد قاله : كلامك صدق ... بس مش أنا اللي هحكم عليك ... ربنا اللي هيحكم .

🌻(ربنا هيحكم عليك ...يعني هيعلمنا جزاءك إيه ).

🌼ونفس الكلام حصل مع أصحاب كعب بن مالك .