أصول التربيه الصحيحة

🌺الحلقه الثامنة عشر🌺

🌼السيرة_النبوية_للأطفال

🌼الحلقة الثامنة عشر

🌼من سيرة الرسول للأطفال

🌼كان يا ما كان و ما يحلى الكلام إلا بذكر النبي عليه الصلاة والسلام
🌼 حبايبي دايما لما بيسمعوا اسم سيدنا محمد يردوا علطووووووول.....عليه الصلاة و السلااااااااااام

🌼ممتازييييييييييييين

🌼وبعد لما رجع الخزرج للمدينة ...و عرفوا أهلهم إن ربنا إختار النبي زي ما اليهود كانوا بيقولوا و علموا أهلهم الإسلام ....فبقوا كام مسلم؟؟ 12 مسلم

🌼وبعد سنة كاملة اتقابلوا تاني في الحج ١٢راجل من المدينة قابلوا سيدنا محمد ... قابلوه فين ؟
...في مكان اسمه العقبة !

🌼سيدنا محمد اتفق معاهم علي اتفاق ....اتفق معاهم على إيييييه؟؟؟
🌼سيدنا محمد قالهم أوعدوني انكم تعبدوا ربنا و بس ....
🌼ما تسرقوش وما تقتلوش
ولا تعملوا حاجة وحشة و لا تقولوا كذب أو شر وأوعوا ما تسمعوش كلام سيدنا محمد لو أمركم بخير

🌼واللي هيعمل الاتفاق ده ربنا هيكتبله حسنات تدخله الجنة

🌼الاتفاق ده سموه بيعة العقبة الأولى .... و اتفقوا يتقابلوا برضه بعد سنة .... في وقت الحج برضو

🌼ال12 راجل اللي من المدينة وافقوا طبعا على الاتفاق...
🌼وكمان سيدنا محمد بعت معاهم مصعب ابن عمير
🌼عشان يعلمهم إزاي يقروا القرآن صح ....و يعلمهم الإسلام ..دين ربنا

🌼مصعب ابن عمير سموه بعد كده "مقريء المدينة" عشان هو اللي علم أهل المدينة قراءة القرآن ... و المسلمين كلهم بيحبوه أوي

🌼بعد لما عدت سنة ...
🌼جه وقت الحج ... وكل الناس راحت عشان تحج ....
🌼وكان في وسطهم المسلمين الطيبين من أهل المدينة
🌼عارفين بقوا كام واحد ؟؟
بقوا 73 مسلَّم

🌼جايين عشان يحجوا برضه و يشوفوا سيدنا مُحَمَّد

🌼بس كانوا مقررين قرار ... إيه هو؟

🌼اتفقوا إنهم مش هيسيبوا سيدنا محمد في مكة وسط الكفار اللي بيؤذوه و يضايقوه

🌼فاتفقوا إنهم هايقابلوا سيدنا محمد في السر
في نفس المكان اللي اسمه العقبة

🌼كل الحجاج كانوا نايمين في الخيمة .....
🌼وقام المسلمين بشويش
و راحوا عند العقبة عشان يقابلوا سيدنا محمد

🌼قابلهم سيدنا محمد و كان معاه عمه العباس ....
🌼عمه العباس مكنش لسه مؤمن ...
🌼بس كان بيحب سيدنا محمد و بيدافع عنه ضد الأشرار الكفار
🌼بس سيدنا العباس هيسمع كلام سيدنا محمد في الآخر ويبقى مسلم

🌼المسلمين راحوا عند العقبة .... و قابلوا سيدنا محمد و عمه العباس

🌼عم سيدنا محمد .... العباس أول واحد اتكلم و قالهم :
🌼أنا عارف إنكم بتحبوا سيدنا محمد ... وعايزينه يروحو معاكم المدينة
🌼بس أنا عاوزكوا تعرفوا إن أنا كنت بحميه من الكفار الأشرار ... و لو مش هتقدروا تدافعوا عنه زي أقرب الناس ليكوا
🌼يبقي خلاص خليه في مكة و بلاش يروح معاكم

🌼وقف واحد من المسلمين و قال :
🌼هندافع عنه بأرواحنا .... و بكل قوتنا

🌼سيدنا محمد .... قام .... و بدأ يكلم
🌼الناس .... عن الإسلام .... دين ربنا
🌼اللي فيه كل الخير لكل الدنيا
🌼واتفق معاهم علي اتفاق تاني:

1- إنهم يعبدوا ربنا ..... ربنا بس

2- إنهم يعملوا أوامر ربنا و يطيعوه

3- يدفعوا فلوس للمساكين و الغلابة و يهتموا بيهم

4- إنهم يعرفوا الناس إيه الخير و الصح ... عشان الناس تعمله ...
و يفهموا الناس إيه الحاجات الوحشة عشان يبعدوا عنها

5- إنهم يتحركوا بسرعه لأي عمل أو طلب يرضي ربنا من غير ما يخافوا من أي حد

6- إنهم يدافعوا عن دين ربنا ....الإسلام .... و يدافعوا عن النبي اللي ربنا أختاره

🌼فوقف واحد من المسلمين و قال :
و الله .... هندافع عنك بكل قوتنا ! ... و هنفذ إتفاقنا

🌼بس فيه واحد من المسلمين ...
🌼وقف و قال

🌼يا مسلمين المدينة ...
🌼أعرفوا إن لو انتم عملتم الإتفاق ده ... وأخدتم سيدنا محمد معاكم للمدينة ...ودافعتم عنه

🌼ساعتها كل أشرار الأرض هتحاربكم .... فلو مش هتستحملوا ... و هتخافوا...يبقي بلاش

🌼لكن لو هتكونوا شجعان ...و عندكم قوة و صبر و استحمال خلاص يبقى خدوه معاكم .... و بكده هتبقى كسبتم في الدنيا و الآخرة كمان .🌼

🌼فرد المسلمين :

🌼كلنا هندافع عن سيدنا محمد بكل قوتنا ...ومش هيهمنا أي حد ...ولا هنخاف من أي حاجة

🌼وبعدين بصوا لسيدنا محمد
🌼وسألوه :إحنا كده هيكون جزاءنا إيه ؟

🌼رد عليهم : ..الجنة ..

🌼فقالوا :مد إيدك ...

🌼وقاموا كلهم يسلموا علي سيدنا محمد ...
🌼وهما بيقولوا إنهم هيعملوا كل كلمة حصلت في الاتفاق ده ...

🌼والاتفاق ده كان اسمه بيعة العقبة التانية

🌼يا تري بقه سيدنا محمد هيسيب مكة ويروح المدينة إزاي ؟
🌼والكفار هيسيبوه ؟ هنشوف الحلقه الجايه ان شاء الله إيه اللي هيحصل بعد كده
اللهم صل علي سيدنا محمد

أسالكم الدعاء لي بصلاح الحال🥺♥