أصول التربيه الصحيحة

🌺الحلقه الثانية والثلاثون🌺

حياتي دعوة
السيرة_النبوية_للأطفال

الحلقة الثانية والثلاثون

غزوة خيبر

🌻كان يا ما كان وما يحلي الكلام إلا بذكر النبي عليه الصلاة و السلام ....

🌼عليه الصلاة والسلام

🌻سيدنا محمد عليه الصلاة والسلام ...رجع للمدينة ..
🌼ومعاه المسلمين المؤمنين الطيبين رجعوا بعد لما عملوا اتفاق الصلح مع الكفار في مكّة

🌻بس بعد لما رجع المسلمين للمدينة ....عرفوا خبر جديد ....
خبر مش حلو أبدا .... اليهود ..أيوه اليهود تاني

🌼بس المرادي اليهود اللي عايشين في مكان اسمه خيبر ....

🌻يهود خيبر بيجمعوا الكفار برضه ... كفار من بلد اسمها غطفان ...

🌼وأشرار "خيبر و غطفان" بيجمعوا أسلحتهم عشان هيهجموا علي المسلمين ... و يقتلوهم

🌻سيدنا محمد أخد المؤمنين الشجعان بسرعة ... و اتحركوا فورا ...

🌼وأخدوا أسلحتهم و أحصنتهم و جمالهم ....و راحوا عند يهود خيبر ...

🌻أول لما سيدنا محمد و المسلمين قربوا يوصلوا عند يهود خيبر ....

🌼سيدنا محمد وقف كل جيش المسلمين ....و فضل يدعي ربنا ...

🌻يدعي ربنا بالنصر و الخير للمسلمين ... و بيدعي ربنا كمان يمنع شر اليهود عن المسلمين ...

🌼الوقت كان بليل ...
فسيدنا محمد قال للمسلمين ...

🌻هنستني لغاية الصبح ... عشان ما نفجأش أعداءنا ...

🌼ومنهجمش عليهم و هم مش عارفين إننا جايين للحرب ...

🌻ممكن نعمل خدع و إحنا بنحارب ...
بس ما نغدرش و نهجم علي أعداءنا وهم مش مستعدين للحرب

🌼وفيه ستات وأطفال وشيوخ نايمين في أمان ما نهجمش عليهم فجأه حتي لوكانوا أعداءنا

🌻سيدنا محمد أحسن واحد في الدنيا .. حتي وهو بيحارب أعداءه

🌼بيعاملهم برحمة ...
ومش راضي المسلمين يهجموا إلا لما يدوا أعداءهم إنذار ..

🌻ما يهجموش أبدا بغدر علي ناس نايمين حتي لو أعداء ... يااااااااااه ...

🌼سيدنا محمد فعلا أعظم إنسان في الدنيا حتي في معاملته لأعداءه ....

🌻المسلمين استنوا لغاية الصبح ....
الصبح .. يهود خيبر صحيوا... و خرجوا راحوا لشغلهم و زرعاتهم ....

🌼قاموا شافوا مييييييييين ؟

🌻شافوا جيش المسلمين ..قلوبهم مليانة جبن ..

🌼قاموا جريوا بسرعة علي الحصون بتاعتهم و قفلوا البوابات الضخمة ....

🌻طبعا اليهود عايشين زي ما قلنا في حصون كبييييييييرة ....

🌼يعني مباني ضخمة و ليها بوابات كبيييييرة و مقفولة ....

🌻اليهود عرفوا إن المسلمين جايين يحاربوهوم جزاءا علي مكرهم ...

🌼وجزاءا علي جمعهم للكفار .. كفار غطفان واتفاقهم مع بعض علي حرب المسلمين ....

🌻سيدنا محمد و المسلمين الشجعان ...
اتجمعوا حوالين الحصن .... حصن يهود خيبر ...

🌼عشان يمنعوا أي حد من الأشرار يدخل أو يخرج....

🌻بس الكفار الأشرار من غطفان عرفوا إن المسلمين راحوا يحاربوا يهود خيبر ...

🌼فقالوا لازم نروح نساعد يهود خيبر ... دول كفار و اشرار زينا ...

🌻وممكن المسلمين يجوا يحاربونا...

🌼كفار غطفان أخدوا أسلحتهم ....و راحوا عشان يحاربوا المسلمين ...

🌻بس وهما في الطريق ماشيين ...قعدوا يفكروا في جيش المسلمين...

🌼فحسوا إنهم خايفين ومرعوبين من قوة المسلمين و شجاعتهم ...ربنا ملي قلوبهم ذعر وخوف

🌻فرجعوا بسرعة من غير ما يحاربوا ..وقالوا لأ المسلمين أقويا أوي مش هنقدر نحاربهم ....

🌼سيدنا محمد والمسلمين متجمعين حوالين حصون اليهود ....واليهود استعدوا لحرب ...وجهزوا أسلحتهم ....

🌻المسلمين هجموا بكل قوة علي أول حصن في خيبر .. ...

🌼وعرفوا يدخلوه وحاربوا اليهود ...و اليهود الجبناء استخبوا في الحصن التاني ...

🌻المسلمين هجموا علي الحصن التاني ودخلوه برضه و حاربوا اليهود اللي فيه ...وكسبوهم ....

🌼وكل لما اليهود يستخبوا في حصن ... المسلمين برضه يعرفوا يدخلوه و يحاربوهم ....ويكسبوهم ....

🌻لغاية لما اتبقي شوية حصون ... مقفولة بأبواب جامدة .. و أسوارها عالية المسلمين مش قادرين يفتحوهم ولا يكسبوا اليهود ....

🌼فضل المسلمين متجمعين حولين الحصون القوية و محاصرينها ... بس مش عارفين يدخلوها ....
حصون عالية و أبوابها قوية جدا ...

🌻سيدنا محمد قال للمسلمين ... بكره هدي الراية "العلم " لواحد من المسلمين ...
بيحب ربنا و بيحب الرسول ..

🌼وهو هيبقي القائد اللي هيقدر يفتح الحصون القوية ...و ربنا هيخليه يكسب وينتصر .

🌻كل المسلمين ناموا بليل و كل واحد قاعد يقول لنفسه ...يا رب أكون أنا ... يا رب أكون أنا ...

🌼وبكرة إن شاء الله هنشوف سيدنا محمد اختار مين‼️

🌼اللهم صل علي سيدنا محمد

🌼 تصبحوا على خير يا حلوين

أسالكم الدعاء لي فضلاً 🥺♥