طريق الهداية 🌙مكتملة🌙

الجزء 1 🌙

🌙........طريق الهداية.......🌙
🌸بقلم :سعيدة🌸
👑الجزء 1👑

رحمة: مريم فينك
مريم: ماما بغيتي شي حاجة سمحي ليا كنت كنقرا القران دكشي علاش متكلمتش
رحمة: ماشي مشكل ابنتي بغيت نقول ليك سيري سخني غير لعشا نتعشاو قبل ميجي باباك يحررها فينا
مريم: مزال مغيهديهش الله
رحمة:هداك شيطان مصاحب معاه راه غيدخل مصحيش مكيعرفش اش كيدير
مريم: كون غير تخليني نهضر معاه
رحمة: فين غتهضري معاه ياك كتخرجي كتخليه ناعس ومكتجي من قراية حتى كتلقايه خرج وخا كاع تهضري معاه يقول ليك الله يهديني او يرجع لحالتو علاه هوا كيسمع
مريم: ملي يدخل دبا نحاول معاه
رحمة: علاه هوا فين عمرو دخل عاقل ولا حيت كتنعسي مكتشوفيهش راه شراب دا ليه عقلو
مريم: وهضري معاه نتي راه حشومة هدشي
رحمة: لقلت ليه شي كلمة يعايرني او يقول ليا ياك نتي كنتي غير شوافة دبا باغية ديري فيها فقيها
مريم: قولي ليه هداني الله او رجعت طريق كل بن ادم خطاء او خير خطائين ثوابين الله يهدينا جميعا نمشي نجيب لعشا
حطت لعشا تعشاو جمعت دكشي او دخلت تنعس
كانت كتفكر في اب ديالها او طريق لي غادي معاها

سمحو ليا على هاد دخلة نعرفكم على مريم 21 سنة طالبة بالكلية العلوم حافضة القران محجبة رحمة ام ديالها 49 سنة او جمال باباها 56 سنة تزادت وسط عائلة غريبة كان عندها 2 خوتها كبار او هي صغيرة رحمة كانت شوافة او جمال قمار او كايسكر
غير تزادت او عطاتها لخالتها بسباب خدمتها بغات تبعدها عليها راجل خالتها كان إمام رباها بحال بنتو قراها حمدلله رباها على طريق صحيح من بعد مدزت 15 سنة ماتو خوتها بجوج ضرباتهم طنوبيل او فاش جات خالتها تعزي جابتها معاها او قالت ليها رحمة تخليها عندها من بعد مفقظات ولادها
حاجة وحدة لي وصاها عليها راجل خالتها هي تردهم لطريق صحيح او تعلمهم كيف معلمها
حمدلله رحمة من بعد موقع دكشي لولدها بعدات على داك العمل الخبيت او رجعات لطريق الله او كل نهار كتعلمها شي حاجة اما جمال لي عمرو عطاهت فرصة ترجعو لطريق صحيح فاش كتنصحو كيقول ليها الله يهديني ولا الله يرد بيا هي عزيزة عليه ولكن مكيقدرش يبعد من داك ويل واهي مزال كتحاول معاه او دير بوصية راجل خالتها الله يرحمو توفا من بعد مجات عند مها بعام هي حلمها تولي متنقبة بغات تكمل هاد عام في الكلية او تلبسو حافضت كتاب الله باحكام او بتجويد او تفسير او هدشي بمساعدة راجل خالتها لي دخلها لدار القران ملي كانت عندهم

داها نعاس او هي كتفكر

فاقت مع فجر صلاة قرات متيسر من القران او ناضت لبسات حواجها او تسنات حتى بان ضو عاد خرجات لكليلة

مراد: ختي مريم ممكن نسولك
مريم: مرحبا تفضل
مراد: اب ديالك بارح كان مناقش مع شي رجال او ضربوه لقاه غير بابا داه لمستشفى واش فراسكم هدشي
مريم: لا مفراسناش إنا مستشفى كين فيه هوا
مراد : نخرحو او نديك عندو بلا متخلعي راه ولا شوية
مريم: جزاك الله خيرا إن شاء الله نسالو نمشو عندو
سمية: واش باباك باقي سكاري او كايقمر
مريم: الله يتوب علينا جميعا
سمية: زعما بنتو ديانية او باها سكاري مدخلش لعقل داك نصائح لي كتبقاي تعطي لبنات فدي بيهم غير باباك
مريم: نصيحة منا او هداية من الله
مراد :لا حولة ولا قوة إلى بالله

هدا هوا مشكل لي كتلقا مع كلشي باك سكايري او مك كانت شوافة او نتي باغية تمتلي فيها عفيفة ولكن مكترد على حتى واحد
من بعد مسلات خرجت هي او مراد
وصلو لقاتو حالتو باينة فيه مكرفس عيطات على مها قالتها ليها او دخلات عندو
مريم: بابا شكون دار فيك هاد حالة
جمال: بنتي مريم بلا متخلعي
مريم: كفاش منتخلعش او نتا شوف حالتك الله يهديك على نفسك
جمال: سمحو ليا انا كنحاول نكون كيف بغيتيني ولكن مقدرت الله يهديني
مريم: باركة عليك غير قول ليا اش كتستافد

قرات عليه قران او نعس جات رحمة
رحمة: مالو اش وقع ليه
مريم: يمكن ضربو شي حد هدشي لي عرفت
رحمة: شكون غيكون ضربو
مريم: معرفتش انا يلاه قالها ليا واحد ولد كيقرا معاية لقاه باباه او جابو هنا .