طريق الهداية 🌙مكتملة🌙

الجزء 8 🌙

🌙........طريق الهداية.......🌙
🌸بقلم :سعيدة🌸
👑الجزء 8👑
رحمة: الله ياربي بنتي يعلم الله فين بايتة واش واكلة اش جاري بيها
فاطمة: الله يدير شي تاويل ديال الخير ملي قلتيها ليا او انا بحالة كالسة فوق جمر جمعت حوايجي وجيت في اول كار
رحمة: وحلها بو زبايل بقا تابع حرام حتى خرج على بنتو
فاطمة: الله يهديك مكتاب الله كيتصرف حنا مبيدنا حيلا خلي املك فالله
رحمة: ياربي يحفض ليا بنتي او يرجعها سالمة او يبعد عليها ولاد الحرام
فاطمة: امين ياربي فين مشا دبا جمال
رحمة: تا دارها قد راسو لي قال ليك تاب راه في جامع
فاطمة: متعرفي هدشي فيه خير راه أن مع العسر يسرا..
رحمة: الله يفرجها من عندو
فاطمة: امين ونوضي باركة من لبكا او خليها فيد الله

# خارجة من كوزينة من بعد مجمعاتها حتى تلقات مع مراة قبالتها تكون عندعا ديك 26 عام باينة معصبة
مريم: سلام عليكم
فدوى: وعليكم سلام شكون نتي واش كديري هنا
مريم: انا مريم اش كندير هنا والله معرفت
فدوى: كفاش معرفتيش فنهوا خويا
مريم: شكون خوك اجي بعدا رتاحي راكي حاملة
مشات معاها لصالون
مريم: نجيب ليك شي حاجة تشربيها
فدوى: لا شكرا اش كديري نتي هنا واش خدامة
مريم : انا براسي معرفتش مزال مكملتش هضرتها حتا دخل ياسين حيت علموه لي كارد بلي جات عندو
ياسين: فدوى مالك
فدوى:( تفرشخات بلبكا )خويا عييت من هدشي زواج مميسرش دبا انا واحلة في روحي او هوا يعلم الله في بايت او ملي نهضر معاه يقول ليا خدمة مدخليش فهدشي قهرني بالإهمال ديالو
ياسين: (بعصبية) فنهوا انا غنوريه اش كيسوا نسا راسو معامن

شافتو شحال تعصب او ممكن يقتلو في لحضة غضب عرفات شحال ختو عزيزة عليه او مكيبغيش لي يبكيها باين هدشي من ملاميحو ملي سمع كلامها يمكن غير نقاش بسيط يولي خصام كبير او حبات دخل

مريم: مشاكل مكتحلش هكا نتي دبا حاملة او هرمونات عندك متقلبة او يقدر من ابسط لحوايج تعصبي هدشي عادي ولكن ماشي تجي او طلبي حل مشاكلك بلعنف مفيها باس تجلسي معاه او تفاهمو او توضحو حوايج لي كتاتر على زواجكم حسن متولي معقداها كتر
ياسين: لي دار دنب يستاهل لعقوبة خطأ او خاصو يتعاقب
مريم: منحكموش على واحد مسمعناش منو يقدر يكون بصح عندو مشاكل او نبغاش يشطنها معاه عرف اش كين عاد حكم
فدوى: عييت اختي عييت بغيت نرتاح مليت من حياتي
مريم: علاش مالكي خاصك تفرحي هنتي قريبة تولي ام شعور لي بزاف كيحلمو بيه او ملقاوهش حمدلله نتي بصحة جيدة او حياتك مزيانة علاش بغيتي تعقدي الامور عيطي على راجلك او تفاهمي نتي وياه او مدخلي تواحد بيناتكم باش متعقدش الامور دبا رتاحي او خودي وقت فكري او عاد تصرفي
فدوى: خويا ممكن نبقى هنا
دار ليها اه براسو او خرج
مريم: اجي معاية لبيت ترتاحي شوية
دخلو بيت او تكات جات حداها او بدات كتقرى حليها سورة مريم صورة لحفض الحمل قراتها بترتيل او صوتها لي مشاء الله عليه خلاتها تحس براحة كفاش مترتاحش
وبدكر الله تطمئن القلوب
فدوى: صوتك زوين اشمن سورة هادي
مريم: هادي صورة مريم لحفض الحمل مزيان لمراة الحامل تقراها كل نهار دبا نتي فهاد وضعية قراي سورة الزمر كتحل مشاكل الزوجية
فدوى: كفاش غتحل ليا مشاكلي غير بالقراءة
مريم: ماشي قرأة عادية هادا القران شفاء لصدور هاكي جربي او يكون خير واش موضية ياك
فدوى: علاش
مريم:حيت قال تعالى في الاية الكريمة[إنه لقرآن كريم في كتاب مكنون لايمسه إلا المطهرون .] يعني لكنتي على جنابة ولا حيض مخاصكش تهزيه حتى توضاي
فدوى:صراحة لا
مريم: انا نخدمو ليك في تلفون نتي غير رتاحي
فدوى: من إمتى او نتي هنا
مريم: من بارح
فدوى: علاش نتي هنا
مريم: وقع مشمل بين بابا او خوك او معاه شي رجال او جيت هنا ولكن لاش جابوني معرفتش
فدوى: فراسك ستغربت ملي شفتك هنا
مريم: علاش
فدوى: بنت بحالك هنا مع خويا نتي إنسانة باينة من احسن نساء تربية هوا شخص عصبي او غامض وخا مع عائلتو مكيحملش لي يقيسهم ولكن مكيبينش ليهم حب ديالو وأعدا حاجة عندو يناقشو شي حد فشي قرار خداه وخا يكون غلط ولكن ملي هضرتي نتي قبيلة مدارش شي ردت فعل او حتى انهو سمع ليك ومقاطعكش
مريم: يمكن عرف بانه على غلط او خاصو يتمعن في قرارو ولا دار بحال هكاك غير باش يحسسك بالامان او بلي راه يقدر يقتل على قبلك حيت كنتي خايفة
فدوى: ممكن
مريم : رتاحي دبا نمشي نجيب ليك شي حاجة كوليها راكي حاملة
خرجات او خلاتها