⚜️🎲 كــــازيـــــنـــــو 🎲⚜️
🔥⚔️ نِــــزال الزَّعـــامــة ⚔️🔥
♣️♦️ الحـلـقـة 34♦️♣️
فالسويد...عند ألين لي كانت تدور فالدار و تتفقد فيها باقية مصدومة فلي صار معاهم ليوم...
ألين:أما مفهمتش كيفاش مشاو هكذا في لحظة زعما ميكونش شي واحد منهم تخبالناا و فالليل يطلعلنا و يقتلناا
عقدت حواجبها مستغربة سكوتو و تمشات للكوزينة وين كان يطبخ فالعشا...
ألين:آرثر...سمعت واش قلت!!
هزلها براسو و هو يحرك فالصوص بعدين هز مغرف مقربها من شفافو باش يذوقها...
آرثر:سمعت
ألين:جاوبني مالا لاه تخليني نحكي وحدي
حط لغطى على المقلة يتنهد...
آرثر:جاوبتك ستين مرة على السؤال هذا و قلتلك يمكن البوص تاعهم طلب منهم ينسحبو
ألين:و أنا؟ علاش مهزونيش معاهم!!
آرثر:توحشتي القعدة عندهم؟ حابة تمشي هاي الباب
ألين:لااا منحبش أكيد أما غريبة فيه البوص تاعهم هذا
عوجت فمها على جنب و قربت منو طلعت فوق الرخامة قعدت عليه تتنهد...
ألين:تعرف...للحظة فكرت أنو ماش راح نقدر نخرج من القصر هذاك مرة اخرى
كتف يديه مطول الشوفة فيها...
آرثر:انتي من وين!!
ألين:أمريكا...و مش عارفة زيماه وصلت هنا خرجت من دارنا باش نشري الخبز لقيت روحي فالسويد
آرثر:و أهلك متحيروش عليك؟
ألين تبسمت بوجيعة:متوفيين و أقاربي تخلاو عليا حد ما رضى يخليني نعيش عندو...فالفترة لي كنت نقرا فيها كنت قاعدة فالإقامة الجامعية و نخدم فرد وقت باش نلم مصروف حق لقراية...و بعدين وقت تخرجت كريت دار مشتركة مع طفلة نتشاركو الإيجار و المصروف مع بعض
آرثر هزلها براسو:فهمت عليك
ألين:و انت؟ منين
آرثر:دبي
ألين:إسمك إسباني
آرثر:بابا أصلو إسباني و درك متوفي
ألين:و أكيد وقت توفى ضطريت تدخل لعالم لمافيا هذاا باش تعيش أمك
قلب شفافها حزنانة عليه هزلها براسو لا يضحك على تفكيرها...
آرثر:ولدت هكذا أنا...يعني من وقت وعيت على الدنيا لقيت روحي في عايلة إجرامية بالسيف نولي منهم
ألين:من طرف بوك ولا أمك؟
آرثر:لثنين...بابا كان تاجر أعضاء و درك خويا ليوناردو عوضو
بلعت ريقها بخوف مرعوبة...
ألين:ش.شوف أني الشهر لي فات عملت تحاليل و قالي الطبيب أعضائك ميصلحوش و بقالك أيامات و تموتي
هز حاجبو لفوق كاتم ضحكتو...
آرثر:تحبي نهزك عند ليوناردو يداويك؟
ألين حلت عينيها فيه:لااا اني قلتلك ميصلحووش خلااص ماتوو
آرثر:متأكدة!!
ألين:اممم متأكدة ديجا نمشي نرقد خيرلي
آرثر:و لعشا؟
ألين:ش.شبعانة شبعانة كول انت
قرب منها هاز صبعو في وجها...
آرثر:تااكلي ولا نهزك عند ليوناردو
ألين هزتلو براسها مرعوبة:اوكاي هاني نستناك فالصالة
و نزلت من بلاصتها تمشي و تزرب في خطواتها...
ألين:ويلي معامن طحت أنا
ضحك عليها و قرب من الفرن طفى على النار و جبد زوز صحونة يحط فالماكلة عليهم.
👑#مينوش👑
