-قولتلك مسافرة يعني مسافرة هو علشان أنت جوزي هتتحكم فيا؟
لقيت مخدة الأنتريه لبست في وشي وهو لابس لبس الخروج والكوتشي وقاعد قدامي في الصالون:
-أومال أنتِ متحكمة فيا ليه ومش مخلياني أنزل على القهوة مع صحابي؟!
ابتسمت وأنا بوطي راسي شوية وبصاله، لقيته ضحك وبيتلفت علشان يضربني بمخدة تانية:
-لا مبقاش ينفع الوش البريء ده مبقاش ياكل معايا، أنا مش فاهم قاعد بتكلم معاكِ ليه يا فريدة أنتِ عايزة تجلطيني يعني ولا أيه سفر أيه اللي مع صحابك ومن أمتى ده أنتِ معملتيهاش في بيت أبوكِ أهدي بقى وأنا هخلص الشغل اللي ورايا وهخرجك أنا.
انفعلت وأنا عارفة أن صعب يوافق، بس لازم أحاول لأني فعلًا عايزة أطلع الرحلة دي:
-يا مازن أديك قولتها أهو، معملتهاش ولا مرة علشان خاطري يا مازن أنا نفسي أوي أطلع رحلة وهما تلت أيام تخييم في أسوان بالله عليك وافق بقى.
تعبت معاه وحسيت أني خلاص فشلت في إقناعه، بس برضو كأي زوجة مصرية أصيلة اشتغلت على ودانه شغل النحلة الزنانة لحد موقف وهو على وشك أنه يصرخ:
-غوري يا فريدة على الأقل هرتاح من زنك ده يا شيخة، بس متلومينيش على اللي هعمله بقى وأنتِ مش موجودة وخلي صحابك ينفعوكي.
سابني ومشي وأنا كان نفسي أرد عليه بس خوفت يرجع في كلامه، مكنتش مصدقة أنه وافق بس لحظة! هو أزاي يقولي غوري؟ ويا ترى هيعمل أيه الباشا ده في غيابي؟!
بالفعل طلعت الرحلة وأنا مشاركة معاه الموقع المباشرة على الواتساب زي مطلب وهو عامل فيها زعلان، كنت حاسة بضيق أوي وأنا طالعة بدون إرادته، إحنا صحاب قبل منكون زوجين وبنتشارك حياتنا سوا، قولتله يطلع معايا بس هو مش فاضي وعنده شغل كتير.
فوقت على صوت صاحبتي حنان:
-مالك يا فريدة مش بتغني معانا ليه؟
رديت عليها وأنا ببتسم:
-معلش يا حنان حاسة أني مش رايقة، يمكن لما نبقى هناك مزاجي يتحسن أكتر.
بصيت في التليفون لقيته فاتح الواتساب، قررت أبعتله:
"مساء الجمال فاضي ولا شغال"
شاف الرسالة ومردش عليا وده خلاني مخنوقة أكتر ومش عارفة أنا عايزة أيه، بس عايزة أسمع صوته، عايزاه يشجعني أستمتع بوقتي زي مبيعمل دايمًا.
وصلنا وضحك الكل كان مالي المكان، تقريبًا أنا النكدية اللي فيهم، كله بينصب الخيم بتاعته وبيساعدو بعض وأنا كل محاول أعملها تقع فوق دماغي، هو أيه الحظ المنيل ده؟
ربنا انقذني أخيرًا ولقيت شاب ابن حلال جه بهدوء ونصبها، كان زيه زي معظم الشباب لابس كمامة ونضارة علشان الشمس، قولتله برسمية:
أنت تقرأ
اسكريبتات (بالعامية).. للكاتبة ندى محسن
Nouvellesاسكريبتات بقلمي/ندى محسن، ميكس بين الكوميدي، الرومانسي، الحزين.. بالعامية زي مطلبتوا على جروب الفيسبوك، هستنى رأيكوا. ✨❤ ممنوع النشر والإقتباس. الكاتبة ندى محسن|White Rose
