KINALUNG SAMPUR
Dening : A.P. Noegraha
Udakara dwi candra kawuri
Kanthi sidhem, sira ngunjara aku jro netramu
Sasolahku njalari reseping atimu
Iku kandhamu
Marang lathi kang prapti asung warti
Aku jenggirat, banjur ngawiyat
Nglaras warta kang merdu ing karna
Dina lumaksana ngrakit crita
Manuhake aku marang sira
Kala nunggal labuh budaya
Aneng sawijining desa ing perenging arga
Nyata pakulinan dadi jalaran
Kang maune adoh, dadi cedhak
Kang cedhak, saya cedhak
Banjur jenak
Nuju puwaraning candra
Kalamun saliring karya dumugi purna
Sira nyerat patra ing sandyakala
Kebak pisungsung awit bisa tepung
Puja rahayumu nguntapake lungaku
Kang awrat ninggal crita
Awit cinandhet mangsa
Surakarta Hadiningrat, oktober 2022
*Kapacak ing Panjebar Semangat No. 53 31 Desember 2022
KAMU SEDANG MEMBACA
U W U H
PoetryIki mung jugangan kanggo gurit-guritku. Kang dadi uwuh kalamun aku wis bisa rujuk lawan kaanan rikala iku. Nanging, ya lumantar uwuh-uwuh iki aku ora lali marang lelakon kang wis dumadi.
