في ناس فراقها ميهزكش وفي ناس فراقها بيدبح الايام
وانا عندي حد فارقني من فتره ومازلت اشوفه ف كل مره بنام
يوحشني صوته وشكل تجاعيده
يوحشني منه هزاره وسط الجد
اما ناوي تمشي وتصعب الموضوع لي علقتني بحاجات هاتبقي دموع
اديك اهو نايم وانا صاحي بيك موجوع
كانت زفتك حلوه والناس حزينه ب قلب
الناس بتقول اني هقابلك طب لي انا مرتحتش قبلك.......
ممكن مكناش قريبين من بعض كفايه
و بمعنا اصح مكناش بنعبر عن حبنا لبعض قد اي
انا كنت بعيده عنك زي اي واحده بعيده عن ابوها
عادي يعني..
بس كنت بقول بكره هنقرب بكره هانبقي صحاب لما اكبر هاجي واحكيلك
هو بكره فعلا جيه بس وانت...
تصدق اني حتي مش قادره اقولها انك مبقتش موجود
عشان والله العظيم لسه مش مصدقه فعلا انك مش موجود
عمرك مغبت عن بالي لحظه وانت عايش وحتي بعدت ممشيت
معايا ف احلامي كل يوم بحلم بيك وانا ف حضنك وبعيط
لما كنت تعبانه وكان التعب شديد عليا فاكر
جيت وسلمت واطمنت وبعدها مشيت طب كنت خدني معاك طيب
كان حلم جميل وكنت اتمنا ميخلصش كان نفسي افضل عايشه ف الحلم الباقي من عمري
بس احنا فعلا مش بنحس ب قيمه الحاجه غير لما تروح
ونقول ترجع لو دقيقه
مكنتش قريبه منك كفايه عشان احس بحانك بس الغلط عليا انا عشان انا الي كنت ببعد نفسي عنك معرفش ليه
بس كنت عيله صغيره لسه محستش بقسوه الي حواليا وكنت عايشه عادي
بس انا فعلا محتجاك دلوقتي محتاجه اترمي ف حضنك واعيط
اكتر حاجه بتمناها انك تيجي تأخدني واعيش معاك
عشان بجد الناس بقت قاسيه علي بعدها جامد محدش بقا يراعي شعور الي حواليه
كله ماشي يجرح ف اي حد قصاده بكلام ب افعال تحس ان قلوبهم بقت حجر
فاكر لما كنت تحب تعصبني او تدايقني تقولي اي
كنت بتقولي انتي ف سنه كام.....
كنت اتعصب عليك واقولك والله يعني مش فاكر انا ف سنه كام ي بابا
تروح شاددني لحضنك وتضحك وتبوسني ف خدي وتقولي بهزر معاكي
وفاكر لما كنت تمسك خدي وتشده وتقولي اي دا انتي خسيتي ي بت
امك مش بتوكلك ولا اي
اقولك لاء والله باكل
تروح ضاحك وتقولي منا عارف دي حتي اكلها حلو
مع ان احتكاكي بيك مكنش كتير وزكرياتي وتفاصيلي معاك
مكنتش كتيره بس فاكره كل حاجه فاكره كل التفاصيل اكنها امبارح
فاكره يوم 16 سبتمبر كان ف الصيف علي صلاه الفجر كدا
انت كنت تعبان بقالك فتره وكنت ف المستشفي
لقيتك جايلي ف الحلم
الحلم مكانش في تفاصيل كتيره انت حتي مكنتش بتتكلم
كنت واقف ساكت وانا صحيت علي اذان الفجر وكنت صاحيه
مخنوقه وكنت عايزه اعيط ساعتها
قولت اعوذ بالله من الشيطان الرجيم ونمت تاني
الساعه7 كدا تقريبا صحيت ولاقيه حركه ف البيت غير طبيعيه
ماما في اي وممشتيش علي شغلك لي
مي انا عايزه اقولك حاجه بس خليكي هاديه واعرفي ان ربنا عايز كدا وهو طبعا ارتاح عشان هو كان عيان وتعبان جامد وربنا ريحه من عذاب المرض
ف اي ي ماما متتكلمي
مي ابوكي اتوفي...........
انت عارف الخبر دا نزل عليا ازاي
صخره نزلت علي دماغي
وبعدها عرفت انك مشيت علي الفجر ضحكت من وسط
دموعي وبقول يااااه كنت جاي تودعني وماشي
ربنا يرحمك ويجعل قبرك روضه من رياض الجنة
واشوفك قريب علي خير
أنت تقرأ
♥كلام موووج♥
Ficción Generalمزيج بين الحزن والفرح بين الشعر والقصائد للشعراء المختلفين ببن النصائح والحكم من جميع الحكماء ادخل واقرا وامشي ورايا ومش هتندم محدش مشي ورا موج وندم ولو ندمت ف دي مش اول مره يعني 😂😂😂 نتمنى لكم رحله قراءه ممتعه وسعيده في كتاب كلام مووج وكتاب مووو...
