♥كلام موووج♥

💔💔

وها قد جاءنا العيد ولنا تحت التراب احبه اللهم ارحم من كنا نحب العيد بوجودهم اللهم اجعل قبره روضه من رياض الجنه

طبعا و ك اي بنوته صغيره كانت يوم العيد تلبس وتتشيك وتفرد شعرها علي ضهرها وتكون ماسكه الشنطه الي بتلك فيها العديه والنضاره الي كانت لازم نبقي بلون الطقم 

وكانت تروح تصلي العيد مع باباها وكانت بتصلي ف وسط الرجاله وتبص عليهم وهما بيصلوا وتبتسم وكانت السعاده مش سايعاها بمعني الكلمة بعد الصلاه كنت باخد العديه منه وياخدني واروح السوبر ماركت يشتريلي شيبسي وشوكولاته وحجات كتيره قوي 

وبعد كدا نروح عند قرايبنا وكان طول الطريق بيبقا يتغزل فيا ويقولي اي القمر دا بس انا عايزك تلبسي طرحه وتبني شعرك دا وتغطيه أقوله ي بابا انا لسه صغيره وانهارده عيد فكها بقا ومتزعلش وبعدين انا مش هلبس الطرحه غير لما ادخل اولي اعدادي 

يقولي طب خلاص حتي لمي شعرك بتوكه متخليهوش مفرود كدا 

وانا ازعل وأمد بوزي زي العيال الصغيره وهيا زعلانه يضحك ويقولي خلاص خلاص متزعليش بس انا والله خايف عليكي 

كنت مش مدركه خوفه دا بسبب اني لسه صغيره ولما كبرت عرفت أن كان معاه حق جدا لما كان يزعقلي علي الهدوم الضيقه والقصيره الي كنت بلبسها وانا صغيره عرفت أن هو كان ضهري وسندي وحصن منيع مانع عني اي حاجه وحشه وحاميني من اي حد واي حاجه

كنت الدلوعه بتاعته عشان كنت اخر العنقود واصغر واحده كانت روحه فيا بمعني الكلمة 

أما كان يقابلني ف الشارع صدفه وانا رايحه اشتري حاجه من السوبرماركت الاقيه يقولي خلي فلوسك معاكي 

ويروح شاري ليا حجات كتيره اوووووووي وزياده عن الي انا طالباه 

طب والله العظيم والله العظيم كنا بنقف ف السوبرماركت اكتر من ساعه وهو بيشتريلي الحجات ويقولي اجبلك دا طب دا حلو البسكوت دا اجيبه بتحبي شوكولاته ولا ڤانليه 

حرفيا الواحد حاسس ان من ساعت م اتوفي ومبقاش العيد حلو 

كنت اقعد احسب العديه واقول دابابا اكتر واحد عطاني عديه 

حقيقي والله الواحد حاسس ان ضهره محني ومكسور مش عارفه لي عندي دايما احساس ان ناقصني حد وناصني حاجه مع ان حواليا ناس كتير جدا والحمدلله من ناقصني حاجه

بس بيبقا احساس صعب قوي انك تفقد حد عزيز عليك ونفس الوقت كنت متعلق بيه لدرجه الجنون 

حد يتخيل أن هو لما كان ف المستشفي وتعبان قال ل اخويا وعمي لما اموت ادي تليفوني ل مي ومحدش ياخده غيرها 

محدش عرف يفتحه غيري انا واخويا قعد يحاول معرفش وانا الي فتحته ولما عملت الباسورد واتفتح اخويا مكنش مصدق أن هو انفتح معايا عشان قالي انا كنت عامل الباسورد كدا ومرضيش يفتح 

حقيقي انا لحد اليوم دا مش عارفه اتخطي ولا عارفه اتعايش مع غيابه دا تاني عيد وهو مش معايا ومش عارفه ومش هعرف انسا 

احساس يكسرك ويخليك حاسس بالنقص مع إن مافيش حاجه نقصاك احساس وحش ربنا مايكتبه علي حد ابدا ويرحم كل اب متوفي