العروس البديلة

01

10ڤوت و12 كومنت حلقة جديدة
~~~~~~~~~~~~~~~~~~~~~~~~~~~~

صوت عياط امي وراي وهي تخبط على رجليها .....عماتي يلي يلبسوا فيا البودري بوجه اصفر و واحده منهم تزغرط ....خالتي مقعمزه ادربك وتبي تعيشني الفرحة وخالتي التانية تغنيلي واني حاسه نفسي وسط دوخه مش قادره نطلع منها ملامحي جامده في الصدمه وقلبي يضرب كاني طايحه من السمي للارض

ممكن تتوقعوا ان اليوم عرسي وفرحتي وحنتزوج من شريك حياتي وحبيبي والشخص يلي رايدته بس لا اني مجرد عروسه بديله بعد الفاجعة يلي دارتها اختي

اختي هربت قبل فاتحتها ب 3 ساعات خوتي و وبوي وعمامي وخوالي قعدوا يدوروا عليها مالقولهاش اثر وباش بوي راسه مايطيحش بسببها اني حطوني في وجه المدفع

عمتي شبحتلي وهي تلبسلي في سوار ذهب يلي كان مفروض اختي تلبسه حطت يديها على خدودي وهي تمسح في دموع يلي نزلوا من عيوني زي النار

عمتي لطيفه : بالك هذا نصيبك يابينتي

شهقه حار طلعت من صوتي كتمتها من الصبح حطيت يدي على قلبي نبي نخفف وجعه على حالتي

صوت الدربيك والغني اختفي ومش فاضيه نشبح لحتى واحد من الالم يلي نحس بيه حد حضني ومكانش الا حضن عمتي لطيفه يلي صفاتها زي اسمها نبكي بحراره مش هكي متخايله عرسي ولا هكي متخيله طلتي وعمري ولا فرحتي تكون ماسمهاش فرحه لا هذا حزن هذا عزي

~~~~~~~~~~~~~~

ببدلتة العربية قدام الجامع يلي كان مفروض يقراء فتاحته هني على حبيبته بس كان مصدوم وهوا يشوف في المسج يلي بعتتهوله

( ربي يوفقك في حياتك)

حاط يده على راسه وماشي جاي يتصل بيها مش فاهم شي شن معناها هاذي اكيد تبصر عليه ولا!!! كان هذا علاش متردش قام رأسه فوق وهوا يشبح لبوها يلي خاش هوا والتريس بوجه مش مفهم

وليد : يوسف تعالى نبيك في كلمة

يوسف هنى تاكد ان فعلا صايره حاجة خدي بعضه ومشي مع وليد خوها

يوسف : ان شاء الله خير وليد صاير حاجة

وليد بصوت يرعش وقهر في داخله : لينا هربت

صعقه نزلت على رأسها مستحيل كيف تهرب حبيبته تهرب لا مستحيل تسيبه عمر هي وياه مستحيل اكيد هاذي بصره منها هي وخوها ضحك بصدمة : شن تقول وليد لو ناوي تتسهوك مش وقت تسهويك بكل

علي كان يشبح من بعيد بعد ما كان واقف مع بو يوسف ويرحب بيه بحرارة قدم من وليد وهني يوسف لف لعلي

علي : سامحني ياولدي شكلي ماربيتش كويس

يوسف قعد ساكت ولسانه معقود لف يشبح لبوه والتريس المتجمعة شن الكذبه يلي حيقلوها كيف حيستر وضعه : شن الكذبه يلي بطلعوها توا