العروس البديلة

02

12 ڤوت و12 كومنت حلقة جديدة
~~~~~~~~~~~~~~

ناضت بعد نومه ساعتين على الكنبة بعد ماقاللها الكلام أمس ركب فوق ومعاش جي كلمها ولا هي قدرت تتحرك من مكانها كانت طول الوقت سارحه ومهمومه اليوم المحضر خايفه بشكل مش طبيعي أمه وضحت مشاعرها ناحيتها وهذا زادها ألم

ناضت تمسد في رقبتها  وللحظه تصنمت لما سمعت صوت جرس الباب قلبها ضرب بخوف سمعت صوت خطوات خلتها تلف رأسها لجيهة الدروج تشبح فيه نازل وهوا بس لابس سروال قطني رصاصي وتيشرت ابيض مشي طول لباب بدون مايشبحلها حتى بنظرة

طبست رأسها وهي تنحي في الكاب الرزين من عليها تبي الحمام باش ادوش  وتبي تركب غرفة النوم باش تفتح الشناطي يلي هي جابتهم لحوش اختها يلي تحول لحوشها

خطوات وراها وصوت مرأة خلاها توقف في مكانها شدت ڤيلوها وهي ترعش بخوف هوا واقف وراها جنبه أمه مكانتش مستعده للحظه هاذي شخصين ضدها حيحاسبوها على شي هي ماليهاش علاقة فيه بس كانت ضحية فيه

سعاد : لفيلي وتعالي قعمزي بندوي معاك

سكرت عيونها بألم وهي بس من يوم وصبح لحظت شخصية الراجل والام شبهين ببعض من التأمر

لفت ليليا  وهي لقت امه مقعمزه وهوا قعد واقف حاط يده خصره ويشبحلها بإستغراب ويشبح في رعشتها وخوفها

قعمزت على الكرسي الفردي وهي تحاول تسيطر على رعشت يديها

سعاد : اني مش فاضيه نقعد نحققك  معك ونسألك اني علاش اختك دارت عملتها لان كان لازم مانعرف انها واحده صايعه بطريقة يلي تعرفت عليها بولدي ....

غصه تجمعت في رقبتها ونظرات الاستحقار من سعاد كفيله انها تخليها نفسها تتزعزع

سعاد : اني توا وراي محضر وهذا يلي بنهتم بيه اني ننستر قدام ناسي فقط  طلما اسمك ليليا حنقولوا ان اسمك في الكتيب ليليا وانتِ من صغيره متعودين ان ينادوك لينا طبعا تفاصيل اختك تعرفيهم وين تقراء وكم عمرها  بتجاوبي على اساس اختك منبيش ننفضح قدام عيلتي بسبب عمايلكم وقلة تربيتكم

دموعها حصلوا في عيونها عمرها مافي حد هزبها وطاح فيها وفي عيلتها  وهي تعيش هذا الشعور لاول مره بسبب اختها

هزت رأسها بانها موافقه ومش قادره تتكلم بكل

سعاد : كان حد سئلك جاوبي مانبيش تقعدي ساكته وجو الكابة والحزن هذا حولي من على وجهك نبي نشوف ضحكتك من الطق لطق وفرحانه

ناضت وقفت وهي تشبح لولدها يلي كان طول الوقت ساكت ويشبح لي ليليا

سعاد : هي اني ماشيه بوك يستنه فيا البرا ومتنساش ترفعها المزين اختك بعتتلك مسج بكل الحاجات يلي لازم تعرفها