كل ما جيت أبتدي فيك إنتهيت .. و كل ما جيت أنتهي شفتك بداية !

الفصل اربعه وخمسين

طلع عمر ومعاه الدكتور..
طلال بسرعه: ها طمنا
الدكتور: تطمن اهي بخير وصحتها ممتازه بس عندها كسور بأيدها اليسرى ورجلها اليمنى وكدمات بالوجه ..وإن شاء الله مع الملاحظه تقوم بالسلامه
طلال ارتاح:انزين والدم حق شنو
عمر تكلم: الضربه يت على بطنها وحصل معاها نزيف شديد
بس الحمدلله وقفناه وكيس الدم اللي تبرعت فيه الأخت أمل يا بالوقت المناسب..
طلال: الحمدلله يارب..الحمدلله
مشكوره يابنتي مشكوره والله جميلج هذا ما أنساه لج..
أمل وقفت وابتسمت: العفو يا عمي بنتك حسبة أختي وأنا ما سويت إلا الواجب
صمود بفرحه: حفلت عليج ما تروحين إلا لما نروح البيت ونتغدى سوا..وإذا على أهلج دقي عليهم
أمل بشكر: لكن ياخالتـــــــي آ..
طلال ووجدان: ها لا تعارضين..
أمل ابتسمت: خلاص اللي تشوفونه ما أقدر أسوي شي..

عامر: خلاص ياطلال دلال تحت
رعايتي..روح وارتاح أصلا الحين بينقلونها الجناح وبتنام..
طلال ابتسم: يلا عيل امشوا نروح عندي البيت..
بعدها طلعت أمل مع صمود وطلال وراحوا البيت..ووجدان قالت بتلحقهم مع زياد بسيارته..
ـــــــــــــــــــــــــــــــــــــــــ

بفيلا سعود محمد الـــ..أبو محمد..
الساعه 1:30

بالصاله..

ناديه نزلت ركض وراحت لمشعل وفواز اللي جوا مع محمد المخيم..: مشعل فواز مشعـــــــل
محمد ابتسم: خير خير شعندج تصارخين..
ناديه تلهث: دق عمي طلال ويقولك تعال أنت وأخوك..دلال دعمتها سياره واهم طالعين من فرع الجمعيه وراحوا المستشفى
مشعل وفواز انصدموا: دلااال دعمتها سياره..
الجده أم عمر ضربت صدرها: يمه بنت ولدي..قوم يامحمد قول لأبوك نروح لهم بسرعه

ناديه: تطمني يديده عمي يقول
أنها بخير بس طلع معاها كسر بأيدها اليسار وريلها اليمين..وأنها
نزفت بس فيه بنت اسمها أمل تبرعت لها بكيس دم وإهي الحين بخير..وأن أهو وعمتي والبنت كلهم مجتمعين هناك..

الجده اخترعت زياده: قوموا ودني قوموا
عبدالعزيز بسرعه: قلت لأبوي قال الحين بيلبس ونروح..
ـــــــــــــــــــــــــــــــــــــــــ
بفيلا فهد سعد الــ..أبو راكان..
الساعه 1:30..

بغرفة النووم..

فهد كان قاعد على مكتبه ومستغرق برسم شكل هندسي
لمجمع يديد..
دخلت عليه أبرار مبتسمه ولابسه
بنطلون بيج وفوقه بلوزه شيفون
سودا فيها ورود زيتيه طولها لنص الفخذ..ابتسمت وراحت عند المرايه عدلت الروج اللحمي
ورشت عطر يحبه فهد..وراحت له..انحنت لرقبته وباستها: حبيبي
هلكت نفسك..اترك عنك هالشغل شوي..
فهد ابتسم ومسك إيدينها وباسها: شسوي حبيبتي عندي مشروع يديد..
أبرار بتردد: فهد أنت زعلان مني
..
فهد بجديه: ليش هالسؤال؟..
أبرار نزلت راسها: ما أدري..أمس لما كنا ببيت سعود ويا زياد
حسيت الكل وجه نظراته لي أنا وفجر بس عشان أحنا خوات الوليد..حتى أنت لاحظت نظرتك
بس ما فهتمها..وبالليل لما كنت نايم كنت أحس بأنفاسك حاره
مو نفس اللي تعودت عليها..
فهد سكت..ظل يطالعها شلون منزلها راسها وترجف..رفع راسها بهدوء ومسك وجهها بيده:
أبرار..طالعي بعيوني وشوفي شنو فيها..
أبرار طالعت بعيونه بعيون تلمع:
أشوف فيها الحب والأمان..أشوف فهد اللي حبيته..فهد اللي
زرع فيني السعاده والأمل..فهد
اللي أنا أم عياله..
وحضنته بقووه..
فهد حضنها وابتسم وخربط شعرها: خلاص عيل لا تفكرين
بهالخرابيط مره ثانيه..والوليد أخوج بس أنتي مالج شغل فيه أنا زعلت على أريج أختي..أنا أدري أنها مظلومه ووليد ماكل حقها حتى عياله وخاصة فارس
أحس الكل ما يطيقه مع أنه طيب وقلبه ونظيف ويحب الكل..
بس زين طلعوا العيال يحبونه..الكبار عاذرينهم..فهمتي..