في يوم الخميس و آخر يوم دراسة
لأن بعده راح تكون العطلة الكبيرة أو العطلة الصيفية
في بيت ابو سعد:
جمانه: حمد توديني انت صح؟
حمد : ايه بإذن الله ، بس نادي لجين اذا تبي تجي معنا
جمانه: ايه الحين بناديها و ترا يمكن انادي جواد و نوره و غياث لأن امس قالوا لي ان سيارة سلطان بالصناعية و ما يقدر يوديهم
حمد: ما يخالف يا جوجو نادي اللي تبين بس قولي لهم يستعجلون لأن الطابور بيبدأ بعد شوي
جمانه: كفو يا بعد كل من قام و قعد
حمد ضحك: هذي من وين تعلمتيها بعد؟
جمانه: سلطان قال لي اياها امس عشاني سويت له كيكة
حمد قال و هو غيران: ما شاء الله تسوين له كيكة
جمانه ضحكت و عرفت انه غار و راحت حضنته: بعد تسبدي حمود ما قبلك ولا بعدك احد
حمد باس راسها و هو يضحك: ايه اشوا
جمانه: يالله بروح انادي العفش حقنا و اجي
حمد : هههه يالله انتظرتس انتِ و عفشتس
(راحت جمانه و نادت عيال و بنات خالاتها اللي بيروحون معها)*لجين و نوره و جواد و غياث*
بعد ما ركبو للسيارة كان حمد يسوق و جواد بجنبه و جمانه و لجين و غياث و نوره وراء
جمانه: خلونا نغني احس اني طفشت و ترانا مطولين على ما نوصل
جواد: وش رأيك نغني حقت خالد عبد الرحمن؟
جمانه: ايييه حبيب قلبي خالد
حمد ناظرها نظرة فيها حدة و غيرة بالمراية : اقول اهجدي عيب هالكلام
(حمد حنون بس ما يمنع انه يغار على اخته)
جمانه انخرشت من نظرته: آسف جداً انا كنت حمارة شوي و اتراجع عن كلامي
(و جمانه ما تخاف من شيء الا حِدَّة حمد)
غياث ضحك: احذروا شر الحليم اذا غضب ههههه
جمانه ضحكت: لا و انت الصادز احذروا شر حمد اذا غضب هههه
حمد قعد يضحك معهم
و بعدها قعدوا يسولفون و يلعبون ...
حمد كان مستانس على وناستهم بس اضطر انه يقاطعهم: ما ودي انكد عليتس بس وصلنا مدرستتس
جمانه: عادي يا بعد تسبدي اصلاً اليوم آخر يوم مدرسة من غير شر ، يعني ما راح ينكد علي اي شيء بإذن الله
حمد : الحمد لله اجل يالله استودعتكم الله
جمانه باست راسه و نزلت بعد ما قعدت تحارش جواد شوي و نزلت وراها لجين...
بعدها حمد وصَّل نوره لجامعتها و جواد و غياث لمدرستهم
في المدرسة بعد ما طلعوا البنات من الاختبار وعند جمانه و لجين :
جمانه قاعدة تقامز من الفرح: لجين خلصنا خلااص جت الإجازة و أخيراً
أنت تقرأ
لك بين الحَنايا دار و دِيار يا واحدٍ بالقلب ما زاحمك حي
Romanceروايتنا تتكلَّم عن نَاصر و جُمانه و حياتهم بالزمن اللي كل أشياءه بسيطة و جميلة، من كانوا صغار و هم متعلقين ببعض، كيف راح تجمعهم الأيام بعد ما كبرت جمانه و صارت تتغَشَّى عن ناصر؟ الكاتبة | فَرد الجُمَان
