في اليوم التاني بعد صلاة العصر
حسن و عامر كانوا في الورشة و حسن مستغرب عامر اللي باين انه متوتر و عايز يقول حاجة
حسن كان تحت العربية بيصلح حاجة و عامر واقف جانبه
حسن : هات مفتاح عشرة
عامر مردش و باين انه سرحان....
حسن بحدة:مفتاح عشرة....
عامر :ها؟
حسن طلع و هو بيبصله بحدة و غيظ:
=مالك يا ابني لا عارف تشتغل و لا عايز تقول مالك أنجز أنا خلقي ضيق و الواحد صايم...
عامر :
=و لا حاجة يا حسن بس في موضوع شاغل عقلي
حسن :موضوع ايه؟
عامر : لا دا موضوع طويل و محتاج قاعدة طويلة و تفكير كتير علشان لو ظبط هنتنقل ناقلة تانية خالص بس المشكلة ان في حيتان كتير هيقفوا لينا في الزور.
حسن بارتياب :مش مرتاحلك يا عامر مش مرتاح لك بس وماله بليل ابقى عدي عليا في البيت بس دلوقتي خلينا نخلص العربية دي علشان صاحبها هيجي بكرا يستلمها
عامر :
=ماشي يا كبير....
حسن :طب بقولك ايه ما تيجي تفطر معايا النهاردة انت و عم عبد الرحمن
عامر بابتسامه :
=بلاش يا عم و بعدين البنات مش بيحبوا المفاجأت دي و المغرب قرب يأذن يعني لو قلت لمراتك دلوقتي أنك عازمني علي الفطار هتضايق و هتعمل منك كفته.
حسن بابتسامه خبيثة؛
=عيب عليك اخوك مسيطر...
عامر :
=ماشي يا عم المسيطر، بس خليها يوم تاني لسه الشهرة في أوله.
حسن :و الله الأيام الحلوة بتعدي بسرعة.
عامر:
_على رأيك....
في بيت حسن و نادرة
كانت بتعمل القطايف و هي بتتكلم مع مرجانة في الموبيل
نادرة : بقولك ايه صحيح هي نوال أخبارها ايه
مرجانة بحزن : أنا كنت عندها امبارح انا و ماما باين عليها أنها مش كويسة يا نادرة من ساعة ما نزلت الجنين و هي زعلانة و ساكته بس اقولك حاجة نوال ربنا رزقها براجل محترم اه و الله ماهر دا طيب و ابن حلال بس هي اللي مناخيرها في السماء و هتضيعه بطريقتها دي.
نادرة بتنهيدة:
=ربنا يهديها و يرزقها الذرية الصالحة
مرجانة:يارب و عقبال ما افرح بيكي أنتي كمان.
نادرة بسرعة:
=لسه بدري يا بنتي و بعدين أنا و حسن مبقلناش شهرين متجوزين لسه بدري اوي
مرجانة: يعني بذمتك مش نفسك تبقى مامي...
نادرة بابتسامة؛
=اكيد نفسي بس لسه بدري
مرجانة:
=ربنا يرزقك يا حبيبتي بولد زي القمر زيك
نادرة بتذمر :أنا عايزاه بنوته..
أنت تقرأ
نادرة قلبي🦋بقلم دعاء أحمد
Romanceخطُائها كبير، عنيدة لكن مرحة. رفضته و رفضت وجوده في حياتها لكن كان هو منقذها
