نادرة قلبي🦋بقلم دعاء أحمد

نادرة قلبي 29

بعد ثلاث أيام
نادرة كانت حاسة باكتئاب و حاسة بحاجة مش كويسة جواها بقيت عصبية أكتر و هي مش فاهمة مالها بس كل حاجه متلغبطة و كوابيس كتير بتهاجم دماغها، بقت تصحى من النوم مفزوعة و تعيط من أحلامها...

حسن كان مستغرب اللي وصلت ليه و بيقول ان عصبيتها دي بسبب الحمل و الضغط اللي هي حاسة بيه....
لكن لما بيتكلم معها بيحس انها مش عايزاه تقول كلمتين على بعض...و الغريب انه لما بيرجع البيت بتدخل تنام قبل حتى ما يتكلموا عن يومهم زي العادة

في صباح يوم جديد
نادرة كانت واقفه في المطبخ بتجهز الفطار و هي ساكته و سرحانة فاقت من شرودها و بدأت تجهز الفطار
لحد ما بحر خرجت من اوضتها و هي بتمسح وشها بكسل و نوم
بحر :صباح الخير يا نادرة
نادرة مردتش و هي بتقطع الخيار و بتحطه في الطبق..
بحر حست أنها زعلانة منها لأنها مش بتكلمها الفترة دي زي الاول
بحر بحزن : هو أنتي زعلانة مني يا نادرة؟
حسن خرج من اوضتهم لقاها واقفه و بحر بتكلمها و هي مش بترد كالعادة
بحر ابتسمت بحب و هي بتتكلم معها
=تعالي بقا سرحي لي شعري علشان نروح الحضانة انا مش عايزاه اتأخر النهاردة و مش عايزاه سندوتشات كتير زي اللي بتعمليها ليا... اه صحيح المس امبارح قالتلي اقولك ان في تطعيمات في الحضانة و أني هاخدها و...

نادرة بمقلطعة و عصبية حادة:
=بس بقا اسكتي انتي ايه متعرفيش تعملي حاجة غير الرغي صدعتيني... و بعدين ايه القرف اللي انا عملته دا امشي من ادامي

نادرة كانت بتتكلم بعصبية و حدة، رمت من ايدها السكينة اللي كانت ماسكها و خرجت من المطبخ و سابت بحر بتعيط و هي خايفه منها لان دي اول مرة تشوفها بالمنظر دا

حسن مكنش مستوعب كلامها و هو بيبصلها بذهول و بيبص لبحر اللي دخلت اوضتها بسرعة و هي بتعيط، حس انه متعصب من تصرفاتها و مش فاهم في ايه

دخل وراها الأوضة و هو بيزعق بعصبية
=اقفى عندك.... ايه الكلام اللي قولتيه دا

نادرة بغضب :
=و انت مالك يا حسن و بعدين أنا أصلا غلطانة اني جبت البنت المقرفه دي من الشارع هو انا ناقصة قرف

حسن مسك دراعها بعنف و غضب
=في ايه يا نادرة.... مالك؟ انا بقالي يومين مستحمل طريقتك و عصبيتك اللي مش مبررة دي بس بقول أكيد الحمل تعبها او يمكن في حاجة مضايقها
لكن أنها توصل للكلام بالشكل دا يبقى في حاجة و انا مش هسيبك الا لما اعرف في ايه و ازاي تكلمي بحر كدا... دا انتي اللي اصريتي اننا نربيها و نهتم بيها

نادرة بحدة:
=انا يا سيدي عيلة و رجعت في كلامي

حسن :هو ايه لعب العيال دا.... هو ايه اللي رجعتي في كلامك، نادرة أنتي واعية انتي بتقولي ايه
شايفه تصرفاتك اليومين اللي فاتوا كانوا عاملين ازاي
لا عارف اكلمك و لا اقعد معاكي و حتى الكلمه بينا بقيت خناق في ايه.... فهميني