قصة في پارت واحد...مواقف حقيقية يجب ان تكتب

حوار مع النفس

بكل علاقة امر بيها وبكل صراحة وشفافيه احچي... يكون احساسي كالتالي..... احس نفسي كابتن قطار ويمشي ع سجة طويييييييله ومالها نهاية... ويضل يمشي بدون توقف اخير وماعنده  محطة اخيره ابدددد... بس يوگف بمحطات حته ينقل الناس الي همه ميعرفو ولا هوه يعرفهم مجرد الناس تصعد من فلان محطه حته توصل لفلان محطة.. اكو بعض الاشخاص ممكن يثيرون اهتمامي من خلال اسلوبهم تصرفاتهم وضعيتهم.. من يگعدون قريب مني .. وممكن اكو من ينعجبون بيه ع سلوكي وع اسلوبي وشخصيتي... وممكن يطور الامر للاعجاب.. وممكن يطور اكثر حته يكون قريب مني اكثر ونتبادل اطراف الحديث  وممكن نعيش اوقات جدا ممتعه الى ان يوصلون محطتهم..
بس اني وحسب معرفتي كل شخص واله محطه خالها اباله حته ينزل بيها... فممكن اسأل الشخص ع المحطه الي يريدها.. حته ينزل بيها.. ليكون ينساها بعد ما يتعمق ويايه... صادفت اشخاص هوايه .. منهم شخص وصل محطته الي يريدها وراح وبالف سلامه.. بيهم مراد ينزل بمحطته لان حب يقضي ويايه وقت اطول.. و بالمحطة الي بعدها نزل ورجع لمحطته.. وبالف سلامه..  وصادفت اشخاص عبرو محطتهم بهوايه.. ومهتمو  والي همهم يبقون ويايه ويكولون مو مشكله احنه نرجع... احاول اقنعهم بس همه عارفين شوكت ممكن ينزلون... وصادفت اشخاص.. الي كلش جانو صعبين عليه وحيل اثرو بيه .. الي هويه نست  المحطه الي تريدها ... وانشغلت بيه.. والاوقات الي وياها متنسي... وجنت احاول اخليها تنزل بمحطة حته تشوف حياتها. ..بس هية رفضت وبقت واصرت تبقة  ويايه.. اكولها يابه اكيد عبرتي محطتچ وكل منتقدم تصير ابعد.. تكول ميهمني شي بس وجودي وياك.. وبقينه نمشي واني محترك قهر .. عليها وعالوقت الي يفوت منها.. بس هيه حيل مرتاحة ويايه وتحس افضل مكان هيه بي وهيه تعرف اي نتيجة ماكو ويايه .. وصلنه لمرحله اعلمها امور وافهمها حته تعرف تختار.. وچانت ترفض...والسبب تكول ما ممكن الكة هيج شخص ويغنيني عن هوايه... الى ان وصلنه مسافه عن محطة... واني من قربي الها ولشخصيتها واعرف كلشي يخصها وبيها .. شفت هاي احسن محطه توالمها... وممكن تكمل حياتها هناك لان ممكن يكون اكو شي بالمستقبل.. وضليت احاول واحاول الى ان اقتنعت.. وصلنه للمحطه.. وبكل حب وعفويه متحاضنين ونبجي ونتذكر الوقت الي گضينا سوه طول هاي الفتره .. واني ودا اوصلها لباب القطار وهيه ع امل ان اطلب منها تبقه حته تبقه.. واني  دايس ع روحي وما اريد احچي هالحچايه حته ما اضلمها..وصلتها وراحت ودموعنه تنزل ونتذكر احله اوقاتنه.. وان شاءالله تكون بخير ( هذا الموضوع جزء بسيط من علاقة راح اكتبها بيوم من الايام)