قصة في پارت واحد...مواقف حقيقية يجب ان تكتب

كيف اصبحت كاتبا هنا

فد مره من المرات چنت مسافر لدولة اسيوية.. سياحة وشغل هيج شي.. وچنت اعرف صديقة هناك.. وطلعنه وصارت مشكلة.. بيناتنه خربت السهرة والطلعه وكلشي... رجعنه كلمن لمكانه..
واني كاعد بالفيس اگلب اگلب  ضوووجة.. جان تصير كدامي گروبمال قصص واقعيه او هيج شي.. قريت قصة.. معجبتني.. قريت ثانيه.. شفت متستاهل هيج تفاعل.. شغلات شخصية لا عبره لا موقف لا شي.. يعني بس مجرد واحد ديثير الجدل بالطرح والفشار الماله داعي....
اشو تذكرت اللاء والي مر بيه.. طبعا اني ماعندي احد حاجيله القصة وضامها.. فگلت خلي اكتب الصار ويايه مادام عندي فراغ خيالي.. سويت كهوه وجان اكو بالكون كلش حلوه الاطلاله مالته والجو خيالي.. وكعد اسرح بذاكرتي وبديت اكتب.. اكتب وامسح واكتب واعدل واكتب واكتب... هذا الحجي دا اكتب منشور عالگروب.. اني ما اعرف من اكتب بالفيس ويصير الكلام هوايه... تتأخر الكتابه تصير مزعجه.. بس كلت خلص خلي اشوف وين اوصل.. المهم اشو بين خيط الصبح اشوف الوكت كلش مشه.. كلت كافي خلي انشر... ولا بارت ولا ارقام ولا عنوان ولا صوره ولا اي شي.. كتبت ونشرت.. اشو صار تجيني اشعارات ولايكات.. وبدت التعليقات.. كمل كمل .. اني تعجبت عالناس الهوايه الكاعده بهيج وقت.. واجتني طلبات صداقه وجتني رسائل وكلها تكول كمل.. اني كلش نعست.. كلت اول ما اكعد اكمل....
گعدت من النوم جريت الفون... اكو اشعارات هوايه اطب ماكو منشور.. اطب ع غير اشعار ماكو المنشور.. تخبلت ضجت عرفت انمسح.. دورت عالادمن راسلته كتله ليش ماسحين المنشور... اني هيج وهيج نشرت.. گال اعتذر احتمال بالغلط ممسوح.. كتله اخاف لان بجرائة دا اكتب.. كال لا اخذ راحتك وعيد النشر وبعد مينمسح.. كتله تمام.. كلللش ضجت.. مشه نهاري واجه الليل گلت ميخالف لخاطر الي ديراسلون ويريدون اكتب راح اعيده.. وبالفعل عدته واكتب وامسح واعدل.. واكول لازم اجيب الوصف نفس البارحة.. ماريد يتغير وقت المواقف.. وهم تقريبا وجه الصبح خلصت الپارت ونشرته.. وهم تعليقات وتفاعل وكمل وكمل.... صدك تونست... ثاني يوم گعدت ماكو المنشور نفس الشي.. تخبلت.... صدك چذب ماهمني المسح بگد ما مخليت ابالي هالشي والي كتبته ممنزله باي مكان.. يعني تعبي ديروح.. راسلت مجاوبني الادمن دزيت رساله للكروب.. اجتني رساله عالخاص من بنيه.. سلمت سلمت.. گالت يابه تره اني مسحت المنشور.. قصتك كلش حلوه بس مبين اول مره تكتب.. مسحتها حته لا ياخذوها الشباب وينشروها بغير اماكن وتصير حقوق الهم.. اني دخت بهالحجي وكلت هاي يمكن دتسويهن براسي.. كرهت الكتابه والقصه والكروب والفيس...؟وكلت اني ناقصتني دوخة حته ادوخ نفسي بهالشي..وتركت الموضوع للتالي .. وره يمكن شهر تقريبا.. اجتني رساله من حساب طلعت بنيه..بس غير حساب ذيج البنيه.. ما اعرف هيه لو لا.. سألتني عالقصه وكلتلي جانت كلش حلوه وين نشرتها اريد اقراها.. كلتلها منشرت ونسيت الموضوع.. گالتلي ليش .. كلتلها اني اتعب من اكتب وحيلي ينهد وتالي ينمسح.. فحچتلي عالوات باد .. عبالي تقصد واتس ابب.. كلتلها وين الواتس بي قصص.. كالتلي برنامج مال قصص وحقوق محفوظة وشي مرتب.. وعلمتني خطوه خطوه.. الى كتابة القصة.. ومنا من طلعلي عنوان القصه فكرت تقريبا  وبع ساعه يالله اختاريت اسم اول قصة الي هيه الدخول للمراهقة مبكرا.. وچنت ما اعرف شخلي عنون للپارت.. وره ما اكمل الكتابه.. اختار عنوان وتجي كدامي صوره للمواقف وابحث ع صوره حته اخليها.. وصرت اكتب هنااااا... طبعا اريد اشكر البنيه الي مسحت منشوري.. واشكر البنيه الي علمتني عالوات.. واتمناها تكون موجوده لان كالتلي راح اتابع قصتك.. وهيه اول وحده شافت القصه لان جيكتها.. بس ما اعرف هيه وين.. وكل الحب والتقدير لكل واحد كتبلي كلمه طيبه... # القصة الجايه راح احچيلكم شنو الي احسه واني بكل علاقه.. واتوقع الوصف رح يعجبكم.. تحياتي واحترامي