لكل طالب أو خريج هقولك كلمتين غيري مكسوف إنه يخليك تعرفهم ويمكن أنت عارفهم بس لسه محتاج تصدق أكتر ف اسمعني لمصلحتك
أنت طبعاً عندك رغبة مستمرة 24 ساعة إنك تكون ف أحسن الأماكن
و تاخد أحسن الفرص و تعيش أحسن عيشة و شخصيتك تكون أحسن شخصية صح؟
كل دي من حقوقك اللي مش هتحصل عليها غير لما تطور من نفسك وتتعلم
وقتها هتبقي فعلاً قوي بالدرجة اللي تخليك تكسب فرص و فلوس و مكانة وكل حاجة أنت عايزها بمجهودك و إجتهادك أكيد
طيب أنت علشان تتطور و تتعلم قدامك طريقين ملهمش تالت،
يا تعمل كدا مجاناً اللي إحنا بنقول عليه ببلاش يا تعمل كدا بمقابل سواء كان المقابل فلوس أو خدمات....إلخ .
طيب أنا عايز أقولك إيه؟
عايز أقولك كفايه عكّ وكفايه استلواح وكفايه تضييع فرص مقابل فرص
الموضوع بسيط و الترتيبات سهلة لو أنت فهمتها
لو هتختار إنك تتعلم و تتطور مجاناً ببلاش من غير ما تدفع فلوس
ف قدامك Google أو Youtube دول عمرهم ما هيقولولك لأ ولا هيحرموك من معلومة وهتلاقي عليهم كل اللي تحتاجه ببلاش طالما أنت مش عايز تدفع فلوس أو مش معاك أصلاً فلوس تدفعها أو ياسيدي بتحب تتعلم مع نفسك بنفسك
ولكن خلي بالك إنك اه بتوفر فلوس بس بتتكلف حاجات تاني زي إنك أنت اللي بتدور ع المعلومة و المصدر وبتختارهم و أنت اللي هتذاكر و تفهم وتشرح لنفسك و تنظم وقتك و تتابع وتعمل كل اللي غيرك كان هيعملهولك ولكن هتعمله لنفسك بنفسك ببلاش.
أما لو هتختار إنك تتعلم و تتطور بالطريقة التانية بإنك تدفع فلوس أو تقدم خدمات...إلخ.
ف هتلاقي قدامك مصادر كتيرة جداً سواء أماكن شركات متخصصين مدربين وغيره وغيره كلهم عندهم المحتوي بتاعهم ف المجال اللي أنت محتاج تتعلمه أو تتطور فيه ف هتلاقي الحاجات اللي عايزها من شخص يشرحلك أو يعلم أو يتابع معاك وغيره من الخدمات كلها بتتقدملك ف مقابل الفلوس اللي بتدفعها أو الخدمات اللي بتقدمها ف هتتشال من عليك كل المسؤوليات ما عدا مسؤولية إنك تتعلم و تتطور باستمرار وبس .
فـ الخلاصة ياصاحبي ،
- لو ناوي تتعلم و تتطور علشان تلحق الفرص و التطور اللي بيحصل حواليك اختار اللي يناسبك حسب إمكانياتك من غير ما تكلف نفسك زيادة
- لو عايز تتعلم ببلاش شوف جوجل أو يوتيوب و استحمل الرحلة و وفّر فلوسك
- لو معاك وعايز تتعلم بفلوس شوف المصدر المناسب وتأكد منه قبل ما تطلع فلوسك من جيبك
وبلاش بلاش بلاش
- بلاش تقول مفيش فرص أتعلم و أتطور منها علشان أنت مش عارف
- بلاش تقول مش معايا فلوس ف مش هتعلم لحد ما ألاقي فلوس وأنت عندك فرص تتعلم منها ف يا تتعلم ببلاش يا تحوّش فلوس و تتعلم بعدها
- بلاش تروح لأماكن أو أشخاص بيقدموا خدماتهم بفلوس وتطلبها منهم ببلاش لأن ده رزقهم و أكل عيشهم اللي مينفعش رغبتك ف التعلم و التطور تعطل إنهم يكسبوا من اللي بيقدموه ليك
ركز و ركز و ركز لأن الفرص كتير ولكن أنت اللي مش عارف تختار صح .
بتمنالك التوفيق 🤍
