تذكر
من جنت تزعل
اذا ادخن
وجنت تكلي
بالك على الجكاره
تحن اشو
هسه التتن لاعب
بصدري لعوب
صورك والجكاير
بيهن مسلطن
الدكتور : بابا انتي بيج نقص فيتامينات ونقص دم وين جنتي ولحد الان ممراجعه لو باقيه بعد كم يوم جان نمتي مستشفى عندج هواي نقص فيتامينات ودمج سته يعيني لو متأخره بعد كم يوم جان دخلتي مستشفى وشعرج يتساقط ونفسيتج التعبانة والنحول الي عندج هذا كله بسبب نقص الدم وكذالك الفيتامينات كلش يأثرن على صحتج بابا مايصير هيج لازم تهتمين لصحتج
انشالله عمو بس اهم شي شعري يرجع
لا تخافين بنيتي راح اكتبلج علاج وتستمرين عليه مده شهر وترجعيلي ونشوف التطور الي يصير
كتبلي الدكتور علاج ومن ضمن العلاج شامبو ويا الدهن مالت الشعر طلعنه من الدكتور ومن بعد نصائح علمود الاكل ولازم اكل لان دمي كلش نازل وكفنه مقابيل الصيدليه الي يم عياده الدكتور ونفس الصيدلاني الي شفته يباوعلي راح نشتري من عنده
تقدمت عمتي انطته الوصفه مالت العلاج وانطانه العلاج وجان يكول لعمتي رخصتلكم من السعر يحجي ويباوعلي بنظرات شيطانيه
طلعنه من العياده وعمتي ام حسام اتصلت على ابنها الشفيه اجه وصلنه للبيت وطول الطريق يحاول يفتح وياي مواضيع بس اني ابد مطايقته يعني من جنت مريضه وصحتي تعبانه حتا مكالي شلونج
وصلنه للبيت نزلت من السياره اني وعمتي وحسام فر السياره بسرعه وطلع
عمتي : وشبيج ماتحجين ويا حسام حتا وجهج معقوج يحاول يفتح سوالف وياج وانتي مغلسه ست رميم
عمه فدوه اروحلج مالي خلك احجي عوفيني ادخل للبيت وارتاح
اي روحي شعليج انتي الي ماتهتمين وابني الي مشلوع كلبه يمه يرحولك فدوه ذوليج الوادم
اجيت اريد اتعده من يمها شمرت علي علاكه العلاج دنكت اخذتها وكملت دربي
دخلت للغرفه تعبانه حيللل ومن بعد استجواب بيبي على العلاج وعلى الفلوس ذبيت روح على الجربايه صفنت على الجاي يصير وياي
باوعت على العلاج مالتي وكلت لازم أسند نفسي بنفسي ماريد احد يساعدني كمت نضفت الغرفه بس كوه نضفتها وأجر بروحي جر لان من صدك نقص الدم يتعب وفوك كل هذا الدوخه وماتشتهي تاكل
كملت تنضيف الغرفه وبخرتها واخذت ملابس وتوجهت للحمام اسبح
كملت سبح وطلعت لكيت مروه جاي تسوي عشه فديت الي يعرف بيه ماكدر اسوي عشه لان تعبانه ودايخه
مروه الانسانه الوحيده الي ماعرف شلون اشكرها بحياتي لان هيه الي تفهمني وهيه الي تساعدني واذا تصير عندي مشكله اروحلها وبكل ثقه احجيله عن أسراري وشنو الي يصير وياي.
