"Be me with you" (ရပ်နား)

အပိုင်း - ၁၅

                       《Unicode》

    
 
      
         မနက်၄နာရီမှစကာ အ​ခြေအ​နေက ပိုတင်းမာလာသည်။ အ​ကြောင်းမှာ ပုလိပ်အဖွဲ့သည် အရပ်လူကြီးတချို့နှင့်အတူ ​ရောက်လာကာ သပိတ်တပ်အတွင်းသို့ လက်နက်ရှာဝရမ်းထုတ်ကြပြီး သပိတ်တပ်သားများကိုယ်၌ ရှာ​ဖွေကြ၏။ သို့ရာတွင် မနက်ညက ကြိုတင်ပြင်ဆင်ခဲ့ကြသဖြင့် လက်နက်မဆိုထားနှင့် အပ်တိုတစ်​ချောင်းပင် ရှာမ​တွေ့သွား။ သို့​သော် လူနာမည်စာရင်းတစ်ခုကို​တွေ့၍ ဖမ်းဖြစ်​အောင် ဖမ်းသွား​သေးသည်။

           သို့ရာတွင် ညကတည်းက စိတ်ပိုင်းဖြတ်ထားပြီးဖြစ်​သောသပိတ်တပ်ကြီးမှာ မနက်၆နာရီခွဲသည်နှင့် စချီတက်စဥ်ကအတိုင်း စည်းကမ်းတကျ နှစ်​ယောက်တစ်တွဲစီကာ မဲထီး​ကျောင်းတိုက်မှထွက်ဖို့ပြင်ကြ၏။ သို့​ပေသိ ​ကျောင်းဝတံခါး​ပေါက်၌ ပုလိပ်တပ်နှင့်မြင်းတပ်များ ​စောင့်ကြည့်​နေကြသဖြင့် အ​နောက်ဘက်လမ်း​ကျဥ်း​လေးမှ ထွက်ရာတွင်လည်း စစ်ပုလိပ်များက လာ​ရောက်တားဆီးကြသည်။ ထိုစဥ်အ​ပေါက်ဝတွင် ​စောင့်ကြပ်​နေကြ​သောပုလိပ်များအပြင် ရာဇဝတ်ဝန်၊ စစ်ဗိုလ်နှင့် မြို့အုပ်တို့ပင် ပါဝင်​နေကြပြီး မြို့အုပ်က သပိတ်တပ်သားများကို ​လေ​ပြေ​လေးဖြင့် တားဆီးရန်ပြင်၏။

            ​နောက်ပြန်ဆုတ်​ပေးရန်၊ ရန်ကုန်မသွားကြရန်နှင့် သပိတ်တပ်သားများ၏ကိစ္စအရပ်ရပ်ကို အထက်သို့တင်ပြ​ပေးမည်မို့ ကိုယ်စားလှယ်များသာ လွှတ်၍ ​တောင်းပါရန် အစရှိသဖြင့် ​ပြောဆိုတားဆီးပါ​သော်ငြား သပိတ်တပ်သားများမှာ မ​လျော့မ​ပေး။ သည်လို ချီတက်မလာခင်ကတည်းက ၁၁လတိုင်တိုင် ကိုယ်စားလှယ်လွှတ်ဖူးသည့်တိုင် အ​ကြောင်းမထူးခဲ့​ချေ။ သည့်ပြင် ​ရေနံကုမ္ပဏီဘီအိုစီမှ အလုပ်သမားများကို တန်းလျားများမှနှင်ထုတ်ထားသည်မို့ ​နေစရာလည်း မရှိ​တော့​ပေ။ သပိတ်တပ်သားတို့မှာ ဘုရင့်​နောင်​ဖောင်ဖျက်သလို လှည့်ပြန်စရာလမ်းမရှိ​တော့။  ပြန်ရင်လည်း​သေမည့်အတူတူ ​လမ်းမှာသေချင်​သေပါ​စေ​တော့ဟု ဆုံးဖြတ်ပြီး​ချေပြီ။

            ထိုသို့အ​ချေအတင်ဖြစ်​နေချိန်၌ လူမျိုးခြားဖြစ်သူ ရာဇဝတ်ဝန်နှင့်စစ်ဗိုလ်တို့က ဖိနပ်စီး၍ ဘုန်းကြီး​ကျောင်းဝိုင်းတွင်းသို့ဝင်လာရာ ရဟန်းပျိုအဖွဲ့က ကန့်ကွက်ကြ၏။ ပိုဆိုးသည်က ​ရှေ့ဆုံးမှအလံကိုင်ရသူနှင့် အခြားလူသုံး​ယောက်ကိုဖမ်းဆီးထားစဥ် ပုလိပ်သားတစ်​ယောက်က အလုပ်သမားအလံကို လိပ်ကာ အလံတိုင်ထိပ်တွင် ဖိနပ်​ဟောင်းတစ်ဖက်စွပ်ပြီး ​ထောင်ထား​လေရာ သပိတ်တပ်သားတို့မှာ မခံမရပ်နိုင်ဖြစ်ရသည်။ ဤသည်မှာ ဗမာတစ်နိုင်ငံလုံးရှိ အလုပ်သမားများကိုကိုယ်စားပြု​သော အလုပ်သမားအလံအား နယ်ချဲ့မျက်နှာဖြူတို့၏အ​စေခံသာသာလူက ​စော်ကားခြင်းဖြစ်သည်မို့ ဘယ်သူမှသည်းမခံနိုင်​တော့။