ام عذبه : سمعيني تستوين بنت سنعه وتعدلين من عمرج وبيتج وتجابلين ريلج وتشلين من راسه فكره الزواج من الثانيه انا ما ابي الناس تقعد تتكلم عنج ويقولون ريلها ماخذ عليها من اليوم تغيرين من نفسج وعمرج واهم شي قلبج يكون نظيف واللي حابتنه وخاشتنه عني هالمره بسكت انا بس ان سمعتج مره تتكلمين عن سلطان بالشينه علومج بتوصل عند ابوج هو الوحيد اللي قادر عليج ويلا الحين رجعي بيت خالتج عند ريلج
عذبه قعدت : مابا اسير عندهم كلهم يكرهوني ومايبوني ليش اسير عندهم !
ام عذبه : وانا ما ابيج تقعدين عندي في البيت قومي اشووف انا بسير معاج بشوف شو سالفتهم يبون يزوجونه الثانيه قومي اشووف معاي يلااا
عذبه طلعت مع امها رايحين صوب بيت اهل سلطان ، وصلوا ودخلوا مع بعض
ام سلطان : حيالله اختي ماقلتي لي يايه جان زهبت لج العشى
ام عذبه : مب يايه اكل عندج شو سالفتكم تبون تاخذون لسلطان الثانيه
ام سلطان طالعت عذبه : الريال مب مكتفي بنتج مقصره وايد معاه وهو قادر انه يفتح بيت لـ الاثنين وان شاء الله انا اوعدج بيعدل من بينهم ومابتصير مشاكل لانه مياسه ياحلوها طيبه وماتسمعين حسها ومالها في المشاكل
ام عذبه : يعني انتو خلاص مصرين ومخططين عالثانيه !!
ام سلطان : نحن بالاول والاخير مالنا رايي سلطان عاطنا كلمه يا انزوجه وحده نعرفها او بييب لنا وحده من برع و مانعرفها ونحن مانبي الغريب يدخل بيتنا وشفنا مياسه مناسبه له
ام عذبه : واذا ولدج قال جي خلاص بتاخذون ع رايه وبتسوون اللي يبيه؟
ام سلطان : شو تبينا نسوي الريال مصر وحاط ف راسه
ام عذبه : واذا ريلج يابلج الثانيه عادي عندج؟
ام سلطان عقدت حواجبها : انا مب مقصره مع بوسلطان عيوني اللي اشوفها معطتنه الحمدلله بس بنتج شو قدمت لولدي من تزوجته؟ حتى اهتمام ماشافه منها وطول الوقت منفسه عليه والله اعلم باللي كان يدور من بينهم في الغرفه روحهم خلني ساكته بس
ام عذبه : يا اختي يا حبيبتي لا تدخلين حرمة من بينهم انا بسنعها له وبخليها تتسنع وتجابل ريلها
ام سلطان: والله انا بحاول انه مايتزوجها وعاد هي خ تساعدني اذا تبا سلطان لها روحها ، عذبه تبين ريلج ياخذ عليج؟
عذبه : مب هامني
ام عذبه قرصتها : تبيه بس تتغلى عليكم لانكم بتزوجونه ، بس ان شاء الله سلطان بيكون لج روحج ، يلا ياختي انا برووح عنكم
ام سلطان: وين سايره توج يايه
ام عذبه : يايبه لكم البنت بس يلا فمان الله
