Summer Scent

loud summer days : 1

         you'll always be my summer boy

" uno "

အစိမ်းရောင် နံပါတ်၉ကို ချပြီးနောက် မက်သရူး လက်ထဲနောက်ဆုံးတစ်ကတ်သာ ကျန်တော့သည်မို့ စိတ်လှုပ်ရှားနေသည့် လေသံမပေါက်အောင် ပျင်းရိပျင်းတွဲအသံဆွဲကာ ပြောလိုက်သည် ။ ပွဲတစ်လျှောက်လေ့လာထားသလောက် ကစားနေသည့် လူဦးရေ၇ယောက်တွင် အစိမ်းရောင်ကတ်မရှိသဖြင့် တစ်ကတ်ထပ်မံဆွဲရသည့် လူဦးရေမှာ လေးယောက် ။ အထူးသဖြင့် မက်သရူး နိုင်မနိုင် အဆုံးဖြတ်ပေးမည့် ညာဘက်ကလူမှာလည်း အစိမ်းရောင်မရှိ ။ တိုက်ဆိုင်ချက်လေးတစ်မျှင်ကဖြင့် မက်သရူးလက်ထဲက နောက်ဆုံးကတ်ကလည်း အစိမ်း နံပါတ်၃ပင် ။

ဒါ့အပြင် တစ်ခါမှအနိုင်မရသေးသည့်လူက မက်သရူးတစ်ယောက်တည်းသာ ကျန်ရှိတော့သည်မို့ အတွင်းစိတ်ထဲက အနိုင်လိုချင်စိတ်ကို ကစားပွဲအပေါ်  စိတ်ပါဝင်စားမှုမရှိတဲ့ မျက်နှာသေနဲဲ့ ဖုံးကွယ်ထားမိလိုက်သည် ။

အလှည့်ကျချရသည့်ပုံစံက နာရီလက်တံ သွားပုံအတိုင်းမို့ သူ၏ဘယ်ဘက်ကဂျီအွန်းကို လှည့်တောင်မကြည့်မိဖြစ်ပါ ။ ယခုပွဲကစားနေသည့်ကာလတောက်လျှောက် အစိမ်းရောင်မရှိသည်မို့ ခဏခဏ ကတ်ဆွဲရဆုံးသူကိုပြပါဆိုရင် ကင်မ်ဂျီအွန်းပဲဖြစ်ပါသည် ။ မက်သရူး လုံးဝ စိတ်မပူဖြစ်တာ မဆန်းတော့ဟုထင်မိသည် ။

အစိမ်းမရှိတာ သိပါတယ် ၊ ဆွဲလိုက်ပါ မြန်မြန်လေး ။

မက်သရူး စိတ်ထဲက အားမလိုအားမရဖြစ်စွာ ရေရွတ်လိုက်ပြီး မြက်ခင်းနုပေါ်  မညီမညာပင်စုပုံထားသည့်ကတ်များထံ တန်းတန်းမတ်မတ်စိုက်ကြည့်နေရင်းနှင့် ဘေးကဂျီအွန်းရဲ့ နောက်တစ်ကတ်ထပ်ဆွဲရတော့မည့် သွယ်လျသောလက် ဆန့်တန်းထွက်လာမည့် အချိန်ကိုသာ တိတ်တဆိတ် စောင့်ဖြစ်တော့သည် ။

" အိုး "

ဂျီအွန်းက +4 တစ်ကတ်ကို အသာအယာချလိုက်ကာ စစ်အေးတိုက်ပွဲတစ်ခုကို စတင်လိုက်သည် ။ ထို့နောက် တစ်ဦးပြီးတစ်ဦး ကပြာကယာချနေကြသည့် +4 ကတ်များသည် မက်သရူးအလှည့်တွင် အနားယူသွားကြပြီ ။