اعذب غرام العاشقين

بارت ٢

#اعذب_غرام_العاشقين ،
-
فارس حرك سيارته وهمس : محتاجه شيء ولا اوصلك وامشي؟
ريماس بهدوء : محتاجه فلوس نبي نطلع نتمشى ،
فارس عقد حواجبه والتفت عليها : ومين ياخذكم؟
ريماس : عادي ناخذ تاكسي ،
فارس هز راسه بالنفي : متى ما بغيتوا تطلعون كلموني ،
ريماس قربت تبوس خده : اعشقك والله ،
فارس ضحك بخفه ووقف سيارته ونزلت ريماس و ركضت دخلت الشقه ومشت تدق الباب ،
البنات كانوا جالسين ياكلون الفشار ويتابعون مسلسل ،
غرام : ريوف افتحي الباب تكفين ،
ريوف : ماني قايمه قاعده ارسم ما تشوفيني!
غرام التفتت على جنان : جنان افتحي الباب تكفين ،
جنان هزت راسها بالايجاب ومشت فتحت الباب دخلت ريماس بعصبيه : ليه ما تفتحون بسرعه !
غرام : اقول فسخي جزمتك برا توي منظفه الارض ،
ريماس : طيب تجهزوا الليله نطلع نتعشى ،
جنان التفتت عليها : لا تستانسين ي عمري كل فلوسي طاروا ،
ريماس بصدمه : كيف! قلتي معك ست ميه!
ريوف رفعت نظرها : والايجار الجن يجي يدفعها صح؟
ريماس ضربت جبهتها بغباء : اوف نسيت بس تكفون لا تقولون عطيتو كل الست ميه ايجار !
غرام : وناقص بعد ي حبيبتي جالسين هنا ب الفين ،
ريوف : و زين انه وافق على الفين ولا كان عايشين بشارع ،
ريماس : خلاص انا معي فلوسي تكفينا كلنا للعشاء فقط ،
جنان هزت راسها بالنفي : عارفه تاخذين من اخوكِ ،
غرام رفعت نظرها لـ ريماس : اخذتي من فارس؟
ريماس : اوف بنات شفيكم عادي اخوي ترا ،
ريوف : اي يشتغل و يجمع راتبه و يصرف علينا صح؟
جنان : خلي المسكين يجمع مهره ويتزوج مانبي نتعشى ،
ريماس بصدمه : خير شفيكم ي بنات وش هالتفكير ترا نتعشى ب ميه وشوي مو ب مليون عشان تقولون هالكلام؟؟
جنان : والله انا رايحه ادور وظيفه ،
ريوف : و محل الدونات جدي يجي يشتغل فيها صح؟
جنان : شدعوه اداوم بالاثنين عادي ،
غرام تنهدت : جنان تكفين فكينا مو ناقصينك ،
ريوف : خليها تشتغل نشوف عارفه ماراح تتحمل تشوفها من الجامعه ولا من محل الدونات ولا من ايش بالضبط ،
ريماس : غرام خلينا منهم قومي انا وانتي نمشي ،
غرام : والله ماله داعي ي ريماس ،
ريوف بضحكه : شكله فارس اقنعك قال اهم شي غرام ،
غرام التفتت بحدها : ريوف !
ريوف بضحكه : اوف تخيلوا تتزوجون !
جنان كانت طالعه وسمعت كلامهم و ركضت : مين تتزوج!
ريوف : تخيلي معي فارس وغرام اوف ،
غرام ضربتها بالمخده : اذلفي ي ريوف وقحه ما تستحين ،
ريماس ضحكت وهمست : والله عيب عليكم اخوي مو كذا ،
غرام  وقفت وهمست : ريماس لا تهتمين لذي النذلة ،
ريوف : عاد ريماس اجلسي معنا وخلي غرام تروح تتعشى مع فارس يمكن في اعتراف منا ولا منا؟
ريماس ضحكت والتفتت على غرام الي تضرب ريوف ويضحكون ،
-
عزام جلس بهدوء قدام جده دخل فهد و اديب يصب القهوة،
الجد جراح بهدوء : اي فهد عساه خير ؟
فهد : اليوم كتب كتاب حنين يا ابوي وحضورك مهُم بيننا ،
عزام رفع نظره لـ اديب باستغراب : مين سعيد الحظ؟
اديب : خويي رباح ،
عزام هز راسه بالايجاب والتفت على جده يناظر فيه بصمت ،
الجد جراح : حنين كانت لـ سياف كيف ت..قاطعه فهد وهو يتنحنح : نقفل الماضي ي ابوي جراح و نكون في الحاضر افضل،
الجد جراح التفت على عزام : كلم سياف يجي الليله كتب كتاب حنين وسياف غير سياف يحرم عليها ،
فهد وقف بحده ونطق : انا عطيت كلمتي للرجال ي ابوي!
الجد جراح رفع نظره : تكسر كلمتك عشان ابوك ولا ماتقدر!
فهد هز راسه بالنفي : اعذرني ابوي ما اقدر ،
آديب التفت على ابوه بصدمه يطالع وكيف رد على الجد ،
وقف الجد جراح و رفع عكازته عند صدر فهد : طول عمرك تتسرع بقراراتك وتسمع لقلبك صدقني بيجي يوم وتندم ،
فهد رفع كفه يحك جبينه بخفه : اشرف الي يندم مو انا يحصل لولده انه يلقى لها وحده زي حنين ،
الجد جراح بسخريه : بدينا يا فهد بدينا ي ابوك؟
فهد بهدوء : ابوي انا تمنيت تكون متواجد بهاليوم ومعنا و اتمنى انك ما تفتح معي موضوع اشرف و ولده سياف و تخلينا ننبش بالماضي خلنا نقفل الموضوع ونعين من الله خير ،
الجد جراح سكت لثواني يطالع فيه ونطق : استاذنك ي فهد ،
وعطاه ظهره يمشي و عزام يلحقه لكن وقفوا بصدمه ،
فهد نطق : اذا مشيت من هنا ي ابوي بدون ما تكون متواجد بكتب كتاب بنتي ف قسم بالله يحرم علي وعلى بنتي اننا نجيك،
التفت الجد جراح بصدمه يطالع فيه : فهد!
فهد هز راسه : اي ي ابوي كلامي واضح ،
عزام اخذ نفس يمسح على كتفه جده يهديه قبل يعصب ،
الجد جراح التفت يطالع بـ اديب والتفت على عزام واخذ نفس وناظر لـ فهد : نمشي لبيت الشِعر هناك بيكون كتب كتابهم ،
فهد ابتسم بخفه ولانه الجد طلب يكون كتب كتاب حنين ببيت الشعر بالمكان الي يحبه حيل ويغليه بالمكان الي كان زواجه فيه بالمكان الي تزوج فيه من نوير المكان هناك نوعًا ما بر ،
ابتسم عزام بخفه من عرف انه ابوه رضى مجرد ما نطق وقال " بيت الشِعر " وهذا دليل انه راضي لانه معروف جراح بين عياله و احفاده وكيف يحب المكان وكيف يتجمعون فيه كل مره ،
ركبوا السياره والتفت الجد على عزام : كلمهم كلهم يجون هناك لا يجون بيتي يصلون الجمعه ونمشي لبيت الشِعر ،
عزام هز راسه بالايجاب : ابشر ي شيخ جراح حاضر ،
سكت الجد جراح لثواني والتفت وهمس : و زي ما قلتلك يا عزام انت المسؤول هناك عن البنات انت فقدت اختك وتعرف هالشعور ماعاد لقينا لها ولا اثر ف اكيد تفهم مقصدي دير بالك على هالموضوع و انتبه لبنات عمك هُم بحسبة خواتك والباقين لاهين ولا همهم محد يعرف شعور الفقد كثرك خطفو اختك وهي قد كفي ولا حتى شفتها خطفوها قبل..وسكت وصد وجهه يكتم غِصته ، عزام سكت بهدوء وهو يشد على كفه بقهر كل ما تذكر هالموضوع وكيف اخته انخطفت من المستشفى وهي توها مولوده ولا لقوا لها اي اثر ،
-
= في بيت الشِعر في البر بعد ما تجمعوا كلهم =
-
نزل اشرف من سيارته وبناته وراه اصايل و افنان وتوجهوا لمخيم الحريم و اشرف دخل عند ابوه داخل بالمجلس ،
الجد جراح عقد حواجبه : وين سياف ما جاء؟
اشرف هز راسه بالنفي : والله قال يخلص دوامه ويجي ،
الجد جراح : فهد جاي والليلة يتم كتب كتاب حنين و رباح ،
اشرف سكت ونطق : وليه كلمتني اجي ؟
الجد جراح : لا تنسى بنتك اصايل زوجة ولده اديب ،
اشرف سكت وصد وجهه يراقب السياره الي وقف ونزل فواز ومهرة معه ومشت لمخيم الحريم وفواز دخل وهمس : سلام،
الكل ردو السلام ، عزام مشى طلع وقف وهو ياخذ جواله من جيبه يتصل على سياف دقايق و رد وهمس : جاي؟
سياف كان واقف عند المرايه يعدل شعره وهمس : لا ،
عزام باستغراب : ليه؟ جدي راح يزعل منك والله ،
سياف : الانسانه الي كانت بتصير زوجتي تبغاني احضر كتب كتابها؟ صاحي انت يا عزام؟ اجي اتقهوى قهوة عرسها وانا امس كنت ماسك يدينها ونحلم ونخطط اسماء عيالنا؟
عزام : وش جاك قاعد تنبش في الماضي انت تركتها برضاك!
سياف : وانا ما انكر هالشيء صحيح تركتها و في ستين داهيه هي والي ماخذها بس انا اقدر العِشره الي بيننا وماني جاي ،
عزام : يكفي فلسفه تنتظرك لا تتاخر لا تثبت لاحد انك زعلان عليها و انها تتزوج من رباح ،
سياف بسخريه : رباح؟ حلو خوش اسم ،
عزام : مالك شغل باسمه حنا بانتظارك ،
سياف تنهد : اخلص مشواري وجايكم ،
عزام قفل منه و رفع نظره اخذ نفس و دخل المجلس ،
-
ام عزام : غريب ام اديب ما عطتنا خبر عن رباح و اهله؟
ام سياف : ماندري مين هُم ولا نعرفهم فجاه طلعوا بهالسالفه ،
ام عزام : ما ودي ادخل ب نيتهم لكن احس من قهرهم يزوجون بنتهم يبون يثبتون ما يفرق معاهم سياف ،
اصايل عقدت حواجبها : شدعوه خالتي لو كذا كان سوو هالحركه من زمان الحين ب يكملون سنتين مفترقين والبنت جاها نصيبها و وافقت !
ام سياف التفتت عليها : وخالتك صادقه ،
افنان : ست الحُسن ما ترضى على اهل زوجها يعمري ،
اصايل صدت وجهها : ما ينفع معاكم النقاش ،
سكتوا و رفعوا نظرهم يشوف دخلت ام اديب و حنين و ريحانة وتوجهوا يسلمون ويجلسون كلهم ،
ام سياف كانت تخز بنظراتها على ام اديب الي تسولف مع ام عزام توريها صور رباح ، وحنين تناظر ب ام سياف ،
افنان سكتت وهي تقوم حست بحرارة من نظراتهم لبعض وحقدهم ومشت طلعت برا المخيم ريحانة لحقتها وهي مبتسمه وهمست : هاي افنان ،
افنان التفتت عليها : توقعت انك زعلانه من ورا اختك ،
ريحانة : شدعوه ندرس بنفس الجامعه ونزعل!
افنان : ابد بس سالفة اخوي واختك ومن وقتها انتي متغيره ،
ريحانة : لا تنكرين ي افنان انتي الي تغيرتي علي! و لدرجه قمتي تحسسيني اخوكِ اخر رجال الارض و اختي خسرته !
افنان : الله يسعدك اذا حابه تسولفين بذي السوالف ف بمشي،
ريحانة مسكت كفوفها : خلينا نتمشى طيب اشتقت لك ،
افنان ابتسمت لها بخفه وتوجهوا يمشون حول البر ،
عزام طلع لبرا يتصل على غسان لكن وقف وعقد حواجبه وهو يشوف ريحانة و افنان بعيدين و يتمشون واخذ نفس بغضب وتوجه يمشي لعندهم لكن وقف بمكانه من وصل سيارة رباح ونزل رباح عمره ٣٠ مطلق ، و اخوه اسمه عذبي عمره ٢٣ ،
و ابوهم نزل وهو لابس البشت عزام توجه يرحب فيهم ،
و دخلوا لداخل وقاموا الرجال يرحبون فيهم ،
عزام التفت لـ عذبي : نورتو الدار والله ،
عذبي ابتسم بخفه : الدار منور ب اهله اسمح لي اطلع ادخن شوي ، عزام هز راسه بالايجاب ، وعذبي مشى يطلع ،
سياف وقف سيارته وعدل شماغه ونزل ونزل غسان معه و دخلوا سياف رفع نظره بهدوء وهمس : السلام عليكم ،
الجد جراح بهدوء : وعليكم السلام ، الكل ردو السلام ،
سياف مشى جلس و رفع نظره يشوف رباح وضحك بسخريه من شكله والتفت على غسان : شيك لي بالله على لحيته شكله رايح حلاق الي عند..سكت من ضربه غسان ب كتفه ،
سياف ضحك وصد وجهه نزل راسه يشرب من قهوته ،
رباح كان يطالع وعرف من نظرات سياف انه يحش فيه ،
_
افنان التفتت على ريحانة وهمست : اوف بردانه ،
نزلت طرحتها من فوق راسها وحطتها من عند كتوفها و رفعت شعرها تعدلهم وهمست : مافي احد عادي ليه تناظرين كذا؟
ريحانة : اكيد يدورونا و يمكن يجي احد من عيال عمي تغطي!
افنان : لو يجون راح نسمع صوت السياره اكيد ،
ريحانة سكتت وهي تناظر ، افنان ابتسمت بخفه وهي تعدل شعرها ونطقت : على فاضي استشورت ! وفزت و رفعت كفها من لمبة مصابيح السياره وقوة ضوءه ، عذبي وقف سيارته وهو يطالع كانت واقفه و شعرها متناثره على ظهرها وكتوفها و رافعه كفها تغطي على وجهها و ريحانة متنقبه وراها تناظر ،
عذبي سكت بصدمه يطالع وتجمد بمكانه وتوتر وهو يشوفها بذي الشكل لاول مره بحياته يشوف انسانه بهالشكل غير اخته ، ريحانة بحركه سريعه سحبت طرحة افنان وحطتها لها على راسها ، نزل عذبي وفتح الباب وهو يناظر ونطق : اركبوا ايش جابكم هنا؟
ريحانة رفعت نظرها بصدمه وهي تشوف عذبي وسكتت بهدوء،
افنان مشت وهي تركب ورا باحراج وانه شافها وشاف شعرها المتناثره ولمحها ومشت وهي تركب بتوتر وخايفه انه احد يعرف وكيف كانت قدام عذبي بدون حجاب ،
والتفتت على ريحانة وهمست بدموع : لا تعلمين احد تكفين،
ريحانة هزت راسها بالنفي : اكيد ماراح اعلم وشفيكِ تبكين؟
افنان : ومين هذا أصلًا اول مره اشوفه!
ريحانة : اخو خطيب حنين يعني اخو رباح خوي اديب ،
افنان سكتت بهدوء وهي تشد على عبايتها بتوتر و رفعت نظرها تشوفه ركب عذبي وهمس : اي لقيتهم معي ورا راكبين ،
عزام شد على كفوفه بقهر وكيف الغريب ياخذ بنات عمه وهم راكبين معه بنفس السياره : خلك بمكانك جاي انا اخذهم ،
عذبي : ي ابن الحلال قلت جاي انا !
عزام قفل الخط بوجهه بقهر ونزل جواله وهو ينتظره ،
غسان بهدوء : شافهم؟
عزام هز راسه بالايجاب : اي شافهم وجاي والبنات معه ،
غسان سكت لثواني والتفت بصدمه : اختي معه!
عزام : توك تصحصح!
غسان سكت والتفت من وقف سيارة عذبي ومشى عزام يفتح الباب ونطق : انزلوا بسرعه ،
افنان نزلت و ريحانة معها ، عذبي سكت بهدوء ومشى لداخل،
غسان توجه عند افنان : حماره انتي كم مره نفهمك!
افنان : ما رح..سكتت من غسان شد على يدها : ادخلي داخل لا اشوفك طالعه اكسر رجولك لو طلعتي مفهوم!
عزام التفت وهو يشوف ريحانه وعيونها والمكياج وصد بقهر كيف بنات عمه بكل هالزينه مع شخص غريب !
افنان مشت لداخل ريحانة لحقتها ،
غسان التفت و دخلوا لداخل يبداون ب مراسم كتب الكتاب ،
بعد انتهاء كتب الكتاب الجد جراح رفع نظره يسمع لفهد الي نطق و ابتسم وهو يطالع : ي طويل العمر ما ودك عزيمة كتب الكتاب هنا؟ يعني ملكة حنين و رباح ، والتفت على سياف ،
سياف سكت و رفع نظره بحده وصد وجهه بهدوء وهو يشوف حركات فهد وكيف يحاول يستفز سياف وكانه يثبت له بنتي نصيبها ما وقفت عليك وجاها العوض ،
عزام عقد حواجبه وهمس : عمي فهد وش مقصده من نظراته؟ ليه احسه يحاول يقهرك ليه هالحركات بدال ما ينسى الماضي ويفكر بحياة بنته؟
سياف :  انت شف نسيبه بس الي يفتخر فيه ،
عزام تنهد وهو يقوم : خلنا نطلع نشم هواء ،
سياف وقف معه وتوجهوا يطلعون لبرا المجلس وقفوا..
سياف وقف معه وتوجهوا يطلعون لبرا المجلس وقفوا وهم يشوفون ظُلمة المكان وكيف البر هدوء وظلام وشغلوا اللمبات الي فوق المخيم وتوجهوا عند سيارتهم يجلسون فوقه ،
عزام التفت عليه : بذمتك خاطرك فيها للحين؟
سياف صد بسخريه : والله انها ما فرقت معي ولا هزة شعره من راسي ولو يدفعون لي مليون ما رجعت لها ،
عزام : اجل ليه تصرفاتك كذا مع رباح شدخلك فيه؟
سياف بحده : ما تشوف نظراته انت؟ تقول ذابح له اهله ،
عزام : ي رجال هد اعصابك وانسى الموضوع ،
سياف : والله انا بمشي ما جيت الا عشان جدي ،
عزام : راح يزعل اذا تمشي بدون ما تتعشى!
سياف : والله اني مشغول لازم الحق اخلص شغلي ،
عزام ابتسم بخفه : اجل يلا في امان الله ،
سياف : قبل امشي ارجع اكرر لك كلامي الي من سنين اكرره لك لا تصد عن ابوك يا عزام والله انهد حيله الرجال منك ،
عزام : لا تصير نفس جدي يرحم اهلك ي سياف ،
سياف : يخي فهمني انت شدخله هو شعرفه بذيك الليله راح تنخطف اختك ! هو طلع من المستشفى بسببك ،
عزام : كيف أصلًا ترك امي لوحدها وهو عارف انها تعبانه من بعد الولاده و اكيد راح تنام!
سياف : ما ينفع معك النقاش ، وصد مشى ركب سيارته ،
عزام تنهد وتوجه دخل لداخل وناظر كلهم جالسين يسولفون،
-
فارس كان يسوق بهدوء و رفع نظره للمرايه الي قدامه يطالع بـ عزام و ابتسم بخفه ووقف سيارته : هنا؟
ريماس التفتت على غرام : هذا بيتهم ؟
غرام هزت راسها بالايجاب : اي هنا تشتغل ماما اكلمها واجيكم ، ونزلت وقفت عند بيت سياف وابتسمت وهي تشوف البيت كبير عمرها ما دخلت داخل فقط تشوفه من برا كل ما توصل امها وتوجهت تدخل داخل وهي تلتفت يمين يسار تشوف البيت وفخامة البيت وقفت عند الباب تدق الجرس ،
نزيله كانت تنظف المطبخ بعد ما راحوا كل اهل البيت ، عقدت حواجبها باستغراب ومشت فتحت الباب وناظرت بصدمه ،
غرام ابتسمت قربت حضنتها : كيف المفاجاة؟
نزيله توترت وهي تطالع فيها و رجفت بخوف : وش جابك!
غرام : جيت اشوفك و ابي فلوس بطلع مع البنات ،
نزيله مدت يدها تطلع الفلوس من جيبها ومدت : روحي يلا،
غرام : بخاطري ادخل اشوف البيت احسه يجنن اذا صار عندنا فلوس نصمم نفس بيتهم يجنن ،
نزيله بحدها : اروهي قلتلك روحي بسرعه ،
غرام بقهر : اوف ماني رايحه لين تقولين غرام ،
نزيله اخذت نفس بغضب : غرام روحي قلت!
غرام سكتت بصدمه من عصبيتها وهمست : تمام رايحه،
توجهت مشت ركبت السياره مصدومه من امها ،
نزيله اخذت نفس وحطت يدها على قلبها بتوتر خايفه انها تنكشف رغم انها مستحيل تنكشف كيف راح يعرفونها ! استحاله يعرفونها وهي بهالعمر وكبرت و دخلت وهي تقفل الباب التفتت من رجع رن الجرس فتحت الباب بغضب : غرام..سكتت وهي تشوف سياف الي دخل مستغرب اول ما وصل شاف سياره مر من عند بيتهم : مين الي جاء؟
نزيله بتوتر : محد بس بنتي جت توصل لي الاغراض ،
سياف هز راسه وسكت ومشى لداخل ، نزيله قفلت الباب ومشت دخلت المطبخ سحبت المويا تشرب بعد الفجعه الي عاشته رفعت نظرها تراقب سياف الي مشى داخل طلع من الدرج متوجه لغرفته دخل بهدوء ومشى عند المرايه يوقف ويناظر بنفسه و سرح بافكاره و ذكرياته مع حنين كان مجرد امنية من امه وجدته انه ياخذ بنت عمه وفعلًا خطبها و استمروا اكثر من سنتين كان متواجد بينهم الحُب بعد الخطوبه لكن ماهو بزود حتى لقاءهم كان قليل و دايم حنين كانت تعاني منه وسبب انشغاله عنها ويتركها وكل همه شغله و افترقوا  من بعد مشاكل الاهل ، اخذ نفس والتفت مد يده ياخذ الجوال باستغراب من الرقم و رد : هلا ي جدتي ،
الجده نوير : سمعت من عزام انك رجعت للبيت؟
سياف تنهد وعرف تفكيرها : والله ما رجعت بسبب حنين ولا بسبب رباح رجعت عشان شغلي وهذا عزام ما يمسك لسانه!
الجده نوير : انتظرك تعال عندي البيت ،
سياف بصدمه : رجعتوا؟
الجده نوير : مين قايل لك اني كنت بينكم في بيت الشِعر؟ انا في البيت انتظركم تجوني كلكم و كلمت الشغالات ينظفون غرفتكم واحد واحد و تجلسون عندي الويكند كله ،
سياف تنهد وهو يحك جبينه : يعني اسبوع كامل عندك؟
الجده نوير : اي عندي الاسبوع كامل وسمعت البنات بعد عندهم اجازه من الجامعه ف تجلسون كلكم عندي ،
سياف ابتسم بخفه : ان شاء الله ي ست الكُل تامرين امر ،
الجده نوير : جالسه لوحدي اتقهوى جهز اغراضك وتعال عندي،
-
افنان كانت جالسه وبيدها الفنجان تشرب من القهوة و سرحانه تتذكر الانسان الي شافها وشاف شعرها المتناثره على كتوفها وظهرها اخذت و رفعت نظرها تشوف مرام اخت رباح وعذبي تسولف عمرها ١٨ وهمست : افنان وينك سرحانه؟
افنان ضحكت بخفه : ابد قاعده اسمع سوالفكم ،
حنين نزلت نظرها من شافت رساله من اديب : العشاء يلا،
-
غرام كانت جالسه بالسياره ورا و ريماس قدام جنب فارس ،
وفارس فاتح شباك سيارته يطلب لهم الاكل ،
ريماس التفتت ورا على غرام : ناخذ الاكل ونرجع البيت؟
غرام هزت راسها بالايجاب : اي ريوف تنتظرنا و جنان راحت ،
ريماس : جنان لقت وظيفه؟
غرام : ما كلمتها والله ،  وفارس كان ساكت سوالفهم وعينه على جواله ،
غرام تنهدت : لو بيدي ادور لي وظيفه عارفه انها تشتغل و شايله همها و هم ريوف مالهم احد انا عالاقل امي موجوده
ريماس : حتى راتبها كله طارو ب ايجار البيت ،
فارس عقد حواجبه والتفت على ريماس : ايجار بيتهم كم؟
ريماس : الفين والحين اعتقد دفعوا ست ميه بس ،
غرام هزت راسها بالنفي بخوف انه فارس يدفع : لا دفعنا كله ،
ريماس التفتت بصدمه : متى دفعتوا كله ؟
فارس رفع نظره يطالع بالمرايه الاماميه ل غرام ،
غرام : اي اليوم دفعنا ونسينا نعلمك ، و رفعت يدها تحك جبينها بتوتر فارس لاحظ لكن سكت ومد يده ياخذ الطلب ،
-
عذبي كان جالس والتفت وهو يشوف يطلعون العشاء العيال ووقف بهدوء يطلع من بيت الشِعر وقف برا والتفت على مخيم الحريم وهو يناظر وسكت من تذكر افنان وشكلها وشعرها الكيرلي واخذ نفس يبتسم بخفه ومحد يلومه ليه تطري على باله كل دقيقه؟ لانها فعلا كانت آية من الجمال لونها وشعرها الكيرلي البُني ،
والتفت من سمع صوت رباح يناديه : العشاء وانا اخوك ،
وهز راسه وهو مبتسم ومشى لعنده : والله مالي نفس ،
رباح عقد حواجبه : وش جاك؟
عذبي تنهد : والله ما جاني شي بس مالي نفس و ودي اسالك،
رباح بهدوء : سم اسال ؟
عذبي : يدرون آنك مطلق غريب محد اعترض حتى جدهم؟
رباح رفع كتوفه : يمكن ما علمو احد اظن ،
عذبي : وانا اعتقد ظنك صحيح ولا مستحيل يسكتون خصوصًا جدها كيف يرضى حفيدتها تاخذ واحد اكبر منها بكثير؟
رباح اخذ نفس وهو يحك لحيته : ما شافوا الشيب اجل؟
عذبي ضحك بخفه و رباح ضربه على كتفه و دخلوا داخل ،
-
افنان كانت واقفه عند المخيم تناظر من بعيد تشوف عذبي و رباح والتفتت وهي تحس بمغص واخذت نفس ومشت وهي تجلس بعيد عن البنات و تسند ظهرها لورا و سرحت بتفكيرها وهي تلعب بشعرها وتتذكر كيف كانت واقفه وشعرها متناثره على ظهرها وكتوفها وغمضت عيونها تاخذ نفس وتتذكر شكل عذبي قاطعت تفكيرها ريحانة وهي تجلس : ايش تفكرين؟
افنان التفتت عليها : خايفه احد من اخواني يعرف بشيء !
ريحانه : مستحيل يعرفون ما اظن انه هو يعلمهم ،
افنان : ماني مرتاحه وخايفه وليتنا ما رحنا وجلسنا بمكاننا ،
ريحانه التفتت وهي تشوف مرام : اختهم عسوله اكيد انهم زي اختهم ومالهم بسوالف الفضايح ،
افنان : مو سالفة الفضيحه خايفه يظن فيني ظن ثاني ،
ريحانه : ما فهمت عليكِ ظن ايش بالضبط ؟
افنان صدت : ولاشي خلينا نقوم نتعشى ،
-
سياف ابتسم وهو يحط شنطته و اغراضه وقرب يبوس جبينها ويقبل يدينها ويجلس جنبها ويفتح اللابتوب : والله شغل ضروري ي شيخه نوير لازم اخلص جيتك ركض ،
الجده نوير ابتسمت ومدت يدها تمسح على ظهره وتدعي له وهمست : الله يوفقك يارب يا امي انت ،
سياف ابتسم ونطق : امين الله يسمع منك بس دوري لي عروسه بالله ،
الجده نوير ضحكت وهي تصب له القهوة : ناوي تتزوج
سياف قفل اللابتوب بعد ما رسل الملفات لخويه واخذ القهوة من يد جدته وهو يطالع فيها : على ذوقك ابي العروسه ،
الجده نوير بتفكير : شرايك ببنت عمك ر..قاطعها سياف وهو يهز راسه بالنفي : تكفين الا بنات عمي ماني ماخذ منهم ،
الجده نوير تنهدت : شكلك تبت من بعد حنين؟
سياف سكت لثواني وهمس : كم عمره رباح ؟
الجده صدت وجهها : اصغر منك ،
سياف بسخريه : والشيب الي ب لحيته ؟
الجده التفتت عليه وهمست : اي صغير الشيب ما يحدد عمر الانسان جدك كان عمره بالعشرينات والشيب يملي راسه ،
سياف سكت يطالع فيها : اعترفي زوجة عمي فهد حلفتك!
الجده تغيرت ملامح وجهها وهمست : لا عيب وش هالكلام!
سياف بضحكه : والله و صرتي تكذبين يا شيخه نوير ،
الجده نوير تنهدت : ما يبون جدك يعرف ب عمره وانت ايش تبغى في عمره ! ليه مهتم !
سياف : ماني مهتم مجرد سوال سالت وبنفسي اعلم جدي واشوف مين الي يحاول يقهر الثاني ،
الجده التفتت بصدمه : حلفتك بالله ما تعلم جدك!
سياف : الا اعلمه عمي فهد مو مهتم لفارق العمر الي بين حنين وبين رباح بس يحاول يقهرني ونصيب حنين ما وقف علي! اجل خليني انا بعد اقهره و اعلم جدي ،
الجده مسكت كفوفه : صارحني تحب حنين!
سياف سحب كفوفه منها : اقوم اجيب قران و احلف! قسم بايات الله مافي بداخلي اي شعور اتجاهها ولا افكر فيها ولا تهمني زيها زي افنان و اصايل ،
الجده نوير : بعد كل هالحُب بينكم تقول زيها زي افنان؟
سياف صد وجهه : لا تخليني امشي ولا ارجع اتكلم معكِ!
الجده سكتت وهي تطالع فيه بهدوء وسياف ساكت و رجع التفت عليها ومسك كفوفها : اوعديني تقفلين هالموضوع !
الجده هزت راسها بالايجاب : ان شاء الله ،
سياف سكت وهو يسحب المخده ويتكئ : شغلي لنا مسلسل،
الجده ناظرت فيه : طيب ادور لك عروسه؟
سياف ابتسم ومد يده يحك جبينه : بشرط ،
الجده عقدت حواجبها : ايش شرطك ؟
سياف التفت عليها وضحك وهز راسه بالنفي : لا عيب اعلمك،
الجده ناظرت بصدمه : ايش الي عيب لا يكون تفكيرك..قاطعها سياف وهو يضحك : والله عيب يا شيخه نوير مقصدي تكون انسانه تخاف ربها وتصلي صلواتها بوقته ،
الجده : وش اتوقع منك دامك حفيد جراح قليل ادب زي جدك،
سياف ابتسم وهمس : بالله ايش قال لك جدي بليلة العرس؟
الجده صدت وجهها وهي تضحك سياف التفت من سمع صوت الباب دخل سعد وهو يصارخ : لولولوش حنين تزوجت يعني ناكل مفطح بالعرس و..سكت وهو يشوف سياف وعض على لسانه و رفع يده يحك راسه : مادريت انك هنا ،
سياف فهم مقصده وعرف تفكيره انه سكت وما كمل كلامه عشان سياف متوقع انه مايعرف شي عن حنين ، سعد يصير خاله عمره ٢٠ و دايم ميانه معاهم ،
سياف : اي تاكل مفطح بعرس حنين و رباح ان شاء الله ،
سعد بصدمه : وما همك؟
سياف اخذ نفس بغضب وصد وجهه يقوم : رايح اشم هواء،
سعد سكت وهو يجلس بمكان سياف جنب الجده نوير ومستغرب ونطق : جبت العيد قدامه؟
الجده نوير هزت راسها بالنفي : لا هو كان عندهم وقت كتب الكتاب وشاف رباح ويعرف بكل شيء ،
سعد بصدمه : ولا همه؟ توقعت يعصب و يزعل و ينقهر ،
الجده : يحلف ما بداخله اي شعور اتجاه حنين ،
سعد سكت باستغراب : الله اكبر والخطوبة الي كان بينهم؟
الجده نوير : خلاص خلوهم كل واحد بطريقه وهي اليوم وقعت وتزوجت من رباح ماعاد ينفع الكلام ضيعوا بعض ،
سعد بتفكير : طيب ايش ردة فعل سياف لما شاف رباح؟
الجده نوير : ولا همه ولا يفرق معه شيء ،
سعد : والله عجيب خليني اقوم اشوفه ،
الجده نوير ابتسمت بخفه ، سعد مشى طلع وقف وهو يشوف سياف واقف عند قفص الطير ويطالع فيهم ومبتسم بخفه ،
سعد حط يده على كتف سياف يناظر : مجروح؟
سياف التفت عليه : تخسي ،
سعد بضحكه : والله وطلعت كفو مانت مهتم سهل عندك تتخطى تكفى عطني دروس كيف اتخطى معلمة الدين ،
سياف التفت باستغراب : معلمة الدين ؟
سعد هز راسه بالايجاب : والله انها فتنت قلبي بعيونها صادفتها عند المدرسه كنت ماخذ يوسف ولد اختك لمدرسته وصادفت استاذة الدين والله عيونها ساحره ،
سياف مد يده عطاه بوكس ببطنه : انقلع بالوسخ ،
سعد ضحك ونطق : ماني متزوج غيرها حطيتها براسي ،
سياف : بالله يا سعد شرايك تنقلع من قدامي؟
سعد : احترمني تراي  خالك!
سياف هز راسه : والنعم فيك يالثور قم انقلع من قدامي ،
سعد طلع جواله : خلني اتصل على افنان اكلمها تجيب لي شي من توزيعات كتب كتاب حنين و رباح تجيب اي شي ،
سياف سكت وهو يطالع بصمت للطير الي بالقفص ،
افنان كانت جالسه تسولف مع مرام ونزلت نظرها من رن جوالها و ردت : هلا خالي ،
سعد ابتسم : يا اهلين ببنت اختي جالسين ولا راجعين؟
افنان : والله الى الان جالسين نسولف ايش بغيت؟
سعد : بالله افنان جيبي لي من توزيعات شوكلاته اي شي ،
افنان بضحكه : ابشر الحين اقوم اقش لك من التوزيعات ،
سعد : اي بالله لا تقصرين ،
افنان : ابشر ماعليكِ وعقبال ما اجهز توزيعات عرسك انت ومعلمة الدين و نفرح فيكم ،
سعد حط يده على قلبه ونطق : على الجرح قسم بالله ي افنان،
افنان بضحكه : ليتني اعرف شكلها كان رحت خطبتها لك ،
سعد رفع يده يحك جبينه : علمتكم كل شي بس خبيت سر ،
سياف التفت على كلامه يطالع فيه ، ونطقت افنان : ايش؟
سعد اخذ نفس : كانت حامل شكلها يوحي كذا ،
افنان شهقت : يا خالي صاحي انت ! سعد طاح الجوال منه من مسكه سياف من ياقته ونطق بصدمه : بذمتك ما تستحي!
سعد بضحكه : ي ابن الحلال القلب وما يهوى مو بيدي ،
سياف دفه للجدار : ما ودي اتفل عليك احترامًا انك خالي ،
سعد : انت بقيت فيه احترام! الي يشوف يقول انت خالي مو انا الي خالك ،
سياف : انتظر بس تجي امي والله لا افضحك يالوسخ ،
سعد بضحكه : والله ي انها تسوي لي محاضره وتشتكي لابوي ،
سياف عقد حواجبه من رن جواله وطلعه يناظر للاسم و رد وهو مبتسم : ياهلا يا عزام ،
عزام : اتصلت بغيتك تروح لجدتي لانها لوحدها تنتظرنا ،
سياف : والله طال عمرك حنا عند جدتك انا و سعد ،
عزام : وش جابه سعد مو قال انه يسافر لابهاء؟ ولا رجع يدور معلمة الدين ،
سياف بضحكه : شكلك ما تدري انها معلمة الدين حامل ،
سعد رفع نظره بصدمه : سلامات مين سمح لكم تتكلمون عن زوجتي؟ يخي قسم بالله مافيكم ذرة احترام ،
عزام : ي حيفي بس خلني اقفل جدي ينتظرني وقفل منه ،
سياف : تفل عليك عزام الحمدلله برد حرتي ،
سعد : انا خالكم وهذا احترامي عندكم صح؟
سياف : صح و الحقني جدتي لوحدها امش يالهطف ،
-
افنان وقفت وهي تلبس عبايتها على السريع و تلبس النقاب وقربت تحضن مرام : استانست معك والله ،
مرام طلعت جوالها : قبل تهربين عطيني رقمك حبيتك والله ،
حنين كانت واقفه بهدوء تناظر لافنان الي متغيره عليها تغيرت من بعد فراق حنين وسياف وتغيرت على حنين مره ،
اصايل : يمه انتم روحوا انا ارجع ل بيتي مع اديب ،
ريحانه التفتت عليها : اي والله اشتقنا لك و ل يوسف ،
ام سياف : تمام ي امي استودعتك الله انتي و يوسف ،
افنان ودعت البنات ومشت طلعت و ام سياف ودعت الحريم وتوجهوا يطلعون من المخيم وكلهم يلبسون عباياتهم كلهم بيرجعون والسيارات برا ينتظرون العيال كلهم واقفين برا ،
افنان وقفت وهي تدور بعيونه على غسان اخوها ،
عزام التفت يطالع وعرف خالته وهمس : غسان قدام ، و رفع كفه ياشر بيده ، افنان مسكت يد امها وتوجهوا لسيارة غسان،
طلعت مهرة ام عزام وابتسمت تشوف عزام واقف ومشت تركب سيارته عزام كان واقف ينتظر كلهم يطلعون ويقفل الانوار ويطمن على الوضع و يمشي بعدهم ،
غسان حرك سيارته ونطق : اصايل مو جايه ؟
ام سياف : لا قالت تروح مع اديب خلاص ترجع ل بيتها ،
غسان عقد حواجبه : بس جدتي تنتظرنا نروح عندها ،
ام سياف : توقعت نجي هنا خلاص ما نروح بيت جدك !
غسان : والله ماني عارف سياف عندها وسعد بعد ،
افنان رفعت نظرها ونطقت : اوف ما جبت كل اغراضي ،
غسان رفع نظره بحده يطالع فيها من مرايه الامامي وسكت واخذ نفس وهمس : بسالك يا افنان كم مره نبهتك ما تطلعين من المخيم لا انتي ولا وحده من البنات!
افنان بخوف : غسان وربي ما كنت عارفه يصير كذا ،
غسان هز راسه : يصير خير لو وصل العلم ل سياف و..قاطعته افنان بقهر : غسان والله ماراح اعيد هالحركه توبه خلاص ،
غسان : افنان انتي اكثر وحده عارفه خالتي مهره وعمي فواز كيف قاعدين يعيشون شعور فقد بنتهم تبين نجرب شعورهم!
ام سياف شهقت : بسم الله بعيد الشر ي امي شفيك تقول كذا!
غسان بعصبيه : انا الي مو عارف ي امي بنتك وش تبغى ثاني مره تكرر الحركه والبر كله ذئب وكلاب لو صار فيها شي وش نقدر نسوي وقته!
افنان قربت ومدت يدها على كتفه : اسفه والله ،
غسان رفع كتفه يدف يدها عن كتفه : ابعدي بس ،
افنان : اوف والله اسفه غسان ترا راح اصيح!
ام سياف بضحكه : خلاص ياولدي سامحها لا تصيح علينا ،
غسان سكت ومد يده لورا افنان ضحكت ومسكت كفوفه بيدها وهمست : اوف احبك احلى اخ بالدنيا والله ،
غسان ابتسم بخفه ونطق : لا تلعبين علي بهالكلام ،
-
اديب حرك سيارته و اصايل جنبه على المقعد ويوسف بحضنها وهمس : نمشي عند جدتي ياروحي اتصلت تنتظرنا.
اصايل : اوف تعبانه اديب خلنا نروح البيت نرتاح ،
حنين كانت جالسه معاهم ورا : صادقه اصول خلنا نرجع ،
اديب : مو مشكله بنرجع للبيت و بكره نروح لها ،
حنين : بس ياخوفي تزعل!
اديب هز راسه بالنفي : لا ما اعتقد تزعل كلهم رايحين لها ،
-
الجده نوير رفعت نظرها وهي مبتسمه تشوف عزام وسياف جالسين يسولفون والجد جراح جالس مع اشرف وفواز ،
ونطقت باستغراب : فهد وعياله مو جاين ؟
عزام : والله اديب اتصل يعتذر يقولون يجون بكره ،
الجده بهدوء : ان شاء الله خير الله يجيبهم بالسلامه ،
الجد جراح رفع نظره لـ سعد : اليوم ما شفتك في المسجد وقت صلاة الجمعه فين كنت ؟
عزام قرب من سياف ونطق : ودي اقول كان عند معلمة الدين،
غسان سمع والتفت بصدمه على عزام وهو يضحك ،
سعد بتوتر : الا كنت موجود ورا الفلبيني ،
الجد جراح : انا اول الناس دخلت المسجد و راقبت واحد واحد الي يدخلون والي يطلعون ما شفتك ولا لمحت ظلك ،
غسان : لانه ما جاء اكيد ما تشوفه ولا تلمح ظله ي شيخ جراح،
سعد دق بكتفه على غسان : كنت معزوم ب مسجد ثاني ،
اشرف رفع نظره : ما شاء الله في عزايم بالمساجد بعد !
سياف : اي يبه دخلنا ٢٠٢٣ صار في عزايم بالمسجد وهالميزه فقط عند سعد الله يحفظه ،
الجد جراح : اي يا سعد ما جيت المسجد ؟
سعد سكت وهو يحك جبينه وكلهم يطقطقون عليه واخذ نفس ونطق : والله كنت نايم يا جدي ،
غسان كان جالس جنب سعد ونطق : استغفرالله ،
عزام : والعياذ بالله ننام وقت الصلاة استغفرالله صدق ،
اشرف : اي يبه اسال من غسان بعد وين كان وقت صلاة العصر ؟ ، الجده نوير ضحكت و توجهت تمشي عند البنات ،
غسان : والله اني صليت في البيت يا جدي ،
فواز كان ساكت يطالع ويضحك بخفه ،
الجد جراح : ليه ياولدي المساجد في ايش مقصرين تصلي في البيت ؟ عطوني جواب منطقي ،
سعد بضحكه : اي دخلنا ٢٠٢٣ ياجدي وهالميزه بس عند غس..سكت من قاطعه الجد و رفع عكازه : اسكت انت ،
عزام بضحكه : اح ي سعد ،
سياف كتم ضحكته وهو يغطي وجهه من الفشله عن سعد ،
سعد التفت يشوف العيال يضحكون عليه ،
اشرف بضحكه : قوموا صبو القهوة بس ،
سياف وقف وهمس : اروح اشوف امي كانت تبيني ، وتوجه يمشي مشى دخل الغرفه وناظر مهره ام عزام كانت واقفه تطلع العدسات و افنان على السرير تعلم جدتها بكل شيء صار ،
و نوال ام سياف كانت تمسح مكياجها وتسولف مع مهره ،
دخل سياف ونطق : السلام عليكم ، الكل ردو السلام ،
سياف ناظر لـ افنان : ليه اصايل ما جت ؟
افنان : راحت مع زوجها بتجي بكره قالت ،
سياف سكت وهو يجلس على الكنب ويتكئ يناظر والتفت من دخلوا سعد وغسان الا عزام ما جاء بسبب افنان موجوده ،
سعد مشى عند افنان : ايش طلبت منك انا؟
افنان اخذت شنطتها تطلع له من التوزيعات ومدت له سعد ابتسم واخذ منها ونطقت افنان : ماما جابت لك رز بعد ،
سعد رمى من حلاوة التوزيعات على سياف : خذ ،
سياف نزل نظره من طاح الجوكليت بحضنه وناظر مكتوب على الجوكليت " حنين & رباح ، وسكت بهدوء ياخذ الجوكليت و يحطه ورا الكنب وناظر بهدوء لامه الي مشت ،
-
= في الشقه عند البنات =
-
ريوف بضحكه : بشري تشتغلين ب اكثر من مكان؟
جنان  بقهر : اوف اسكتي رجولي تتكسر اهخ بس ،
غرام وقفت وهي تضحك : يلا بنات استاذنكم بمشي ،
ريوف : انتبهي على نفسك حبيبتي و تعالي بدري للفطور ،
غرام : والله يمكن افطر مع ماما ماعندها دوام بكره ،
جنان : اجل حنا نجي نفطر عندك اشتهينا طبخ امك ،
غرام ابتسمت : حياكم تم راح انتظركم ،
ريوف : ونجيب معانا ريماس واكيد فارس يجيبها وغمزت ،
غرام : يا وقحه ي ريوف والله بجلدك !
ريوف بضحكه : لا خلاص اسفه ما بتكلم ،
جنان : والله ي ريوف قليلة ادب ما تستحين ،
-
"