رجعت للبيت وانه التفكير موتني شسوي
شنو هالطلب الغريب من مصطفى زين اذا هو ما يسويله شي ليش يريد يعرفه
معقوله ما مصدگني ويريد يتأكد
ثاني يوم صادف جمعة اجتنا اختي مروة وهي صار عدها بنيه اسمها زينب
كملنا شغل وصلاة صبينا غده اتغدينه
بعدين گلت احسن شي افاتح مروة وامي بالسالفة
لگيتهن گاعدات بغرفة امي
گعدت يمهن وحچيتلهن كل شي بس مگلتهلن على الشرط اللي شرطه عليه مصطفى لأن هم عبالهم اني ما اعرف الشاب اللي اغتصبني
امي ضاجت لان انه حجيت السر اللي لازم محد يعرف بي
بس انه طمنتها وگلتلها الولد ثقة وخوش ولد وهو مشتريني
مروة : يمه لشوكت تضل ورود ساكته ولشوكت تبقه هيچ احنه هم خلي نفكر بيها شويه هي هم حالها حالنا تريد تعيش وتتزوج
خيه ورود اقبلي بالولد ما دام عرف اشبيچ ما بيچ وبعده رايدچ هذا يعني هو يحبچ وشاريچ
ورود : وره فتره قررت اروح انه ومصطفى المكان اقامتنه القديم وادلي على بيت الولد
وبيوم الردت اروح اضطريت اكذب على اهلي واگللهم عدنا سفره بالجامعه للأثار واليوم راح اتأخر بالرجعه
صعدت ويه مصطفى بالسيارة وصلنا دخلنا بالسيارة للفرع الچان بي المحل لگيت المحل موجود ومن شفته ضليت ابچي بدون وعي خفت گلتله مصطفى انت انزل هذا المحل گال شسمه الولد گلتله ما اعرفه بس وصفتله شكله
مصطفى : نزلت للمحل حته اشوف الولد اني جنت ناويله على نيه ورايد انتقم الورود بس قنعتها انو اني مجرد رايد احچي وياه
لگيت شاب يجي اصغر مني سألته عن الولد وگلتله چان يشتغل بهذا المحل قبل اكثر من 9 سنوات
الولد گالي اي هذا عمي
مصطفى : بلا زحمة ممكن اتدليني بيتهم
اريده بشغله
الولد صاحب المحل : والله يا خويه شگلك عمي متوفي صارله 8 سنوات
مصطفى : شلون اتوفه !!!؟
الولد : چان يصلح بالمبرده ولزمته الكهرباء وانطاك عمره
اتفظل ابيش اخدمك
مصطفى : الله يرحمه مشكور خويه ما تقصر في امان الله .
رجعت للسيارة لگيت ورود تبچي
ورود : ها مصطفى لگيته ؟
مصطفى : لا حرامات
ورود : ليش حرامات !!!!
مصطفى : ورود الولد ميت صارله 8 سنوات
جنت اتمنه الگاه حته اخذلچ حقچ بأيدي واقتله بس ربچ اخذه قبلي
ورود : من گالي مصطفى انو الولد ميت ارتاح گلبي وفرحت كلش بس زعلت من مصطفى لان هو كذب عليه وگال هو مناوي على قتله
وبعدها رجعنا بالسيارة
رجعت للبيت فرحانه واخيرآ راح ينتهي الكابوس اللي رافقني كل هذه المده
واخيرآ راح ارتاح واخلص من التفكير بمصيري المجهول
بيومها نمت وانه مرتاحه ما گعدت الا الساعه بالتسعه بالليل
رحت اركض على امي
يمه مصطفى يريد موعد حته يجي يخطبني
ام ورود : ميخالف يمه هلا بي بس خلي اخذ رأي عمامچ حته يستقبلون الولد
ثاني يوم راحت ام ورود على بيت عمام ورود كلهم گالو خلي يجي
الا عمها الكبير اعترض لأن هو چان رايد ورود لأبنه حسام
وما انطوها اله
ام ورود : خويه ابو حسام تره القرار الاول والاخير للبنيه هي تحسب حسام مثل اخوها وما تگدر تعيش وياه ويصير رجلها
ابو حسام : لا ام ورود اتردون ابن عمها من دمها ولحمها وترضون بالغريب
ابن عمها اولى بيها وهو ما جاز منها
من رفضتو اول مره گال ابقه متانيها تخلص كليتها وارجع اتقدملها مره ثانيه
انطو كومة نسوان بس هو هاوي بت عمه
وهي من حگه
حسام ما ناقصه شي حته ينرفض
الف وحده تتمناه
ام ورود : خويه ابو حسام انتم اهلها وتعرفون مصلحتها بس اني ابو ورود الله يرحمه وصاني على هالبنيه
وگال لا ترديلها طلب لأن هي عزيزة على گلبه كلش انت ينطيك گلبك اتزعل اخوك منك وهو بگبره.....
بقه ابو حسام على موقفه ومعترض على هذا الزواج
ورجعت ام ورود للبيت طبت للبيت لگت ورود منتضرتها ...
ورود : ها يمه بشري شگالو عمامي
ام ورود : يمه عمچ ابو حسام رايدچ الحسام ويگول ورود ما تصير للغريب هي بتنا وراح تبقه يمنه وغير حسام ما تتزوج
ورود : يمه وانتي شگلتيله مو تدرين بيه وتدرين بقصتي وبالصار بيه وهسه انه ما صدگت اكو احد راح يقبل بيه وهو يعرف كل شي وما معترض ويحبني وانه هم احبه
يمه انه غير مصطفى ما اتزوج .
ام ورود : يمه چا انه شبيدي شگدر احچي هذا عمچ الكبير وكلمته مسموعه ما گدرت ارادده گلتله يصير خير ومشيت
الله كريم يمه ان شاء الله نلگه حل لا تضوجين
ورود : من رجعت امي وحچت هذا الكلام رحت الغرفتي گعدت ابچي ومقهوره واناجي ربي
بلكي عمي يتراجع عن كلامه ويخليني اكمل حياتي على خير وسلامه
بهذه الاثناء اتصل عليه مصطفى ...
مصطفى: الو حبيبتي شلونج
ورود : هلا مصطفى شلونك انه زينه
مصطفى : ورود اشبي صوتچ چنتي تبچين ؟
اشبيچ منو محاچيچ
ورود : اوف مصطفى ما مكتوبلي افرح بحياتي الحمد لله
مصطفى : شكو احچي خبلتيني شصاير ؟!!
ورود : اليوم امي راحت على عمامي تاخذ منهم موعد حته انت تجينا بس واحد من عمامي معارض ورايدني لأبنه
مصطفى : ورود حبيبتي لو اعرف اسوي المستحيل
الغيري انتي ما تصيرين اخذيها كلمة وعد مني
انتي الي وبس مو عمچ ولا اي احد راح يمنع زواجي منچ لا تخافين حبيبتي اني وياچ ما اريد توگع ولا دمعه من عيونچ الحلوات "احبچ"
ورود : من سمعت كلام مصطفى اتطمنت وارتاح گلبي نهيت المكالمه
ورحت اتوضيت وگعدت اصلي وادعي الله يفرحني ويجمعني بالحلال باقرب وكت ويه مصطفى ان شاء الله .
مصطفى : چنت گاعد وافكر بمستقبلي ويه ورود وفرحان كلش واشتاقيتلها گلت خلي اتصل بيها
اتصلت جاوبتني صوتها مخنوگ وسولفتلي عن عمها وهو رافض فكرة انو ياخذها احد غريب اني طمنتها وگلتلها انتي الي والغيري مستحيل تصيرين
نهيت المكالمة وضجت كلش منين طلعلي عمها اني ما صدگت هي تقبل بيه بس مستحيل اخليها تروح من ايدي ورود الي هذا وعد قطعته على نفسي ....
ثاني يوم التقو ورود ومصطفى بالجامعه ..
مصطفى : هلو حبيبتي صباح الخير
ورود : هلو مصطفى صباح النور
مصطفى : ورود ليش ما تسمعيني كلمة حلوة
اتمنه اسمعچ ادگليلي "احبك " لو حبيبي
ورود خجلت ودنگت راسها ..
مصطفى والله استحي ما متعوده احچي هيچ كلام
مصطفى : انتي اتحبيني ؟
ورود : اي
مصطفى : شنو اي ؟!
ورود : اي احبك 💕
من گالت احبك مصطفى نضرلها بأبتسامه لطيفه
وفرحان كلش لأن اول مره يسمعها من ورود
اما ورود ضلت خجلانه وضحكت وخدودها صارن حمر ودنگت عيونها ع الارض ..
مصطفى : حبيبتي ورود اريد منچ اتعرفيني على ابن عمچ حسام
ورود : لا مصطفى فدوة لا تعرفه ولا تحچي وياه
انه احاول اقنع عمي
مصطفى : حبيبتي والله ما يصير شي احنه شباب وهو راح يفتهمني اكيد واني راح اجيبه بالسياسه
لا تخافين بس گليلي هو شكبره وشنو شيشتغل ووين الگاه ؟
ورود :مصطفى ابن عمي عمره 30 سنة خريج كلية ادارة واقتصاد وحاليآ عنده محل مال مواد انشائيه بالسوگ
مصطفى : اهاا حلو الولد بعده صغير ودارس يعني مثقف اكيد راح يفهم حبي الچ وان شاء الله يشيل فكرة الزواج منچ ...
يتبع...
وصلو التعليقات لل 300 اكمل
