قرر مصطفى يروح على حسام ويحچي وياه
اخذ العنوان من ورود
ومن رجع من الكليه صار العصر راح بسيارته للسوگ على مود يلتقي بحسام
وصل للمحل لگه شاب گاعد يشبه الوصف اللي وصفته اله ورود طب مصطفى وسلم على حسام
مصطفى : السلام عليكم
حسام : وعليكم السلام اهلآ اخي اتفظل
مصطفى : انت حسام
حسام : اي خويه اني حسام ابيش اگدر اخدمك
مصطفى : خادم ربك اخوي العزيز جايك بشغله
وان شاء الله تخلصها الي
حسام : تدلل اذا يمي شغلتك محلوله ولا صغرآ بيك منو انت ومنين تعرفني ؟
مصطفى : اني صديق ورود بالكليه واتقدمتلها قبل كم يوم بس سمعت والدك الله يحفظه معارض هذا الزواج
وگايل حسام يريد ورود.
حسام : اهااا صديق ورود ..
اي اني ابن عمها ورايدها قبل لا انت تشوفها وتعرفها
بس هي رفضتني واني خليتها على مرامها گلت بس تخلص كليه اخذها بس ما چنت متوقع راح تحب وتسويها هاي عملتها
مصطفى : صديقي الله بالخير عليك تره الحب مو حرام ولا عيب وانت شاب مثقف وواعي وتعرف شنو جاي احچي بعدين الله شاهد صارلي سنة ورود حته ما معبرتني ولا گاعده وياي بس اني حبيتها
وقررت اخطبها وشفتها موافقه وبادلتني نفس الحب
هي معتبرتك مثل اخوها ما تگدر تقبل بيك والا لو تريدك چان قبلت من خطبتها اول مره
حسام بعصبيه ...وهسه شرايد ؟!!!!
مصطفى : خويه لا تصعبها عليه تره الرايده مبين
اني اريدك تترك ورود بحالها وادگول للوالد انو انت ما تريد ورود وتخليني اتقدملها
حسام بينه وبين نفسه ...الولد مبين يحب ورود حيل والا چان ما اتجرأ واجاني وهيچ يحچي هي صح ورود عاجبتني بس ما يوم شفت بعيونها نضرة حب اتجاهي استغفر الله ربي هسه هذا شگله ..
مصطفى : خويه حسام وين صافن انت مو گلت اذا الشغله يمك محلوله اعتبرني اخوك ولا ترجعني اني اريد اخذها بالطيب منكم
حسام : شوف يا ابن الناس اني معجب بورود بس ما حبيتها ولا گايللها اني معجب بيچ بس شفت بيها المواصفاة اللي اريدها بزوجتي المستقبليه ولهذا السبب اني تانيتها الهذا اليوم
بس الضاهر هي مو نصيبي وما دام نفسك بالبنيه وهي تحبك وانت اتحبها اعتبرها صارت مرتك .
مصطفى وهو فرحان : اني اشكرك وما اعرف شلون اجازيك انت ما خيبت ضني ربي يفرح گلبك مثل ما فرحت گلبي اني اترخص خويه في امان الله
حسام : في امان الله
طلع مصطفى من المحل والسعاده غامرته صعد بسيارته وقبل لا يحرك السيارة اتصل على ورود حته يبشرها
مصطفى : الو حبيبتي شلونج
ورود : هلو مصطفى انت شلونك انه بخير الحمد لله
مصطفى : عندي الچ خبر سار
ورود : ان شاء الله سار گول شنو فرحني وياك
مصطفى : عندي شرط اول شي
ورود : شنو شرطك
مصطفى : گليلي احبك واني اگلچ الخبر
ورود : اوف منك مصطفى ليش هيچ تسوي
عمي امري لـ الله احبك
مصطفى : شو هاي من وره خشمچ زعلت ما اريد
ورود : اشبيك حبيبي والله احبك
مصطفى : فدوة رحتلچ حبيبتي چنت يم حسام وگالي اخذ ورود وراح يحجي ويه عمچ حته ينطينا موعد ونجي
ورود وهي بحالة صدمة وفرحة : گول والله يعني حسام قبل الحمد لله احبك مصطفى احبك
راح اروح ابشر امي
مصطفى : اوك حبيبتي ديربالچ على نفسچ
بيباي .....
راحت ورود على امها وبشرتها وام ورود فرحت لأن بتها فرحانه بعد كل سنين الحزن المرت عليها وكذلك حسام من رجع للبيت حچه ويه والده
حسام : يابه سمعت جايين خطابه على ورود وانت رافضهم
ابو حسام : اي وليدي انت رايدها وگلتلك ورود الك وانه بعدني عد كلمتي
حسام : بويه اني غيرت رأيي خلي البنيه تشوف حياتها هي ما هاويتني واني هم ما اريد اجبرها
والمرحوم ابوها وصاك عليها قبل لا يموت وانت تدري شگد يعزها
ابو حسام : ها بويه انت هيچ تشوف انه ما ناوي اخذها الك غصب بس وعدتك لا اليوم ولا امس وگلتلك البت الك
وما دام انت هونت وما تريدها بويه خل تاخذ التريده
والبنات العدنا خير من الله انت بس أشر ما يردك الا السانك
حسام : الله يحفظك بويه خلي ننطيهم خبر لأهل الولد حته يجون ونقره الفاتحه
وانطو خبر لأهل مصطفى وتحددت الخطوبه يوم جمعه
راحت ورود للصالون لبست بدله لون فوشي وخلت مكياج خفيف وسوت شعرها تسريحه نازله
طلعت مثل اللعابات
ومصطفى اجه لابس قاط نيلي وجواه قميص وردي فاتح
گعدو عقدلهم الشيخ والهلاهل ملت البيت الكل چانو حاضرين اخوات ورود واخوات مصطفى 2اصغر من عنده والاقارب كلهم ملتمين
عاشو ورود ومصطفى احلى فترة خطوبه وقررو يتزوجون بالعطله الصيفيه من يكملون الامتحانات
وصارت العطله واتحدد موعد الحنة والعرس
مصطفى حجز قاعة للحنة وقاعة للعرس
ورود راحت للصالون لبست بالحنة بدلة چويتي
وبالعرس طلعت عبالك اميره
من كملت الزفة راحو ورود ومصطفى بسيارة للبيت طبعآ مصطفى اشترى بيت حلو وصغير قريب على اهله
من رادو يفوتون للبيت ...
مصطفى : اوگفي ورود لا تفوتين
ورود : ليش حبيبي
مصطفى شال ورود وهي تضحك وادگوله نزلني لا يشوفونه الجوارين بس هو ما اهتم وبقه شايلها وفات بيها للبيت الحد ما وصلها الغرفة النوم ونزلها على الچربايه وگعد مقابيلها وهو يتأمل جمالها وعيونها وسحرها الخلاب
حبيبتي ورود احبچ انتي صرتي الي والله ما مصدگ
الفرحه الأني بيها والشعور الگاعد احس بي اول مره احسه
ورود : حبيبي الحمد لله الله وفقنا وجمعنا بالحلال خلي نگوم نصلي ركعتين شكر لله وندعي ربي يرزقنا السعاده والذرية الصالحه
مصطفى : اوك حبيبتي بس بشرط
ورود : اوف منك ولا تبطل من سوالفك گول شنو شرطك
مصطفى : اريد بوسه
ورود خجلت وضلت ساكته اتقرب عليها مصطفى واخذ بوسه من شفايفها
گامو صلو وراها بدة قصة حياتهم الزوجيه
وچانو متفاهمين ومصطفى چان يحب ورود الدرجة كبيرة والله رزقهم بعد ما اتخرجو من الجامعة بطفله سموها حياة .
اذا سلمت امرك الى الله وآمنت به سيفتح لك بابآ كنت تحسبه من شدة اليأس لم يخلق بمفتاح ..
النـهاااية.....
الي يريد حساب ورود يجي انستا 8sbb8
رأيكم بالقصه ،💥
