وعد شرف

بارت 1

هلاو
اسمي اسراء عمري 25
نرجع 15 سنة ليورة نتذكر  ايام حياتي او بالاحرى لـ اجمل ايام حياتي قبل لاتتحول للاسوء؟
جنت طفلة الوحيدة لـ اهلي بيتنا قصر كبير واحنا من اغنياء العراق ومعروفين.
عائلتنة متكونة من المربية "حسنة" و الأب "مالك" واني فقط وامي متوفية .
جنت المدللة لااهلي بحيث شطلب يجيني بنفس اليوم ابوية يحبني يموت علية وحسنة اذا تمرضت لو انجرح تكعد تبجي وياي مثل الطفلة شفت انواع الحب والحنان والدلال منهم من اني وعيت ع الدنيا جنت المغرورة والمدللة بنظر الكل.
بين يوم ويوم نروح ارقى واغلى المطاعم وملابسي كلهن ماركات معروفة وبين فترة وفترة نسافر لدولة بحيث صار ملل من يكولون نطلع لو نسافر
جنت اتحجج اتوسل بيهم ابقى يم نورة.
(نورة صديقتي واختي وكلشي بالنسبة الية يومية لازم سوية نلعب هيا تجي يمي واني اروحلها قريبين على بعض)
ابو نورة من أصدقاء العائلة المقربين وبيناتنا روحة وجية وصديق ابوية 24 ساعة سوية وشغلهم سوية.

اني جنت اداوم ب ارقى مدرسة اهلية وجنت اشطر طالبة بالمدرسة ومشهورة كلها تتمنى تمشي وياي واني جنت لازكة بس بنورة وهيا كذلك مانفترق ابد.
حسنة الحنونة جنت ادلل عليها هواية وامرض نفسي حتى تدللني اكثر جنت احب احد يدللني اكثر.
ابوية مايجي يوم اذا ماجايبلي شي من يرجع من الشركة من العاب وهداية وكولشي بحيث صرت مااهتم من يجيب لان شبعت عيوني متروسة .
الي ماجنت احبة بيهم تشددهم وخوفهم علية بحيث ماكدر اخذ راحتي حرس باطرف البيت وسايق خاص يوديني للمدرسة ويجيبني جنت احسد حياة الفقراء لان ماخذين حريتهم بالطلعة وبالعب وكل الوقت يكدرون يطلعون بدون خوف اني ونورة جنا نفس المعاناة ونتمنى نطلع ونلعب وحدنة.
يوم من الايام جنا نلعب اني ونورة بغرفتي اجتني فكرة وجنت كولش مترددة جنت شكوللها توافق 
اسراء : نورة عندي فكرة شرئيج باجر نطلع وحدنة.
نورة : ياريت بس شون احنا نروح بسيارة ونجي بسيارة.
اسراء : اكول لبابا تجين وياية عل المدرسة حتى يبلغ السايق والصبح السايق اول مايوصلنا ننتضرة يمشي واحنا نطلع من المدرسة.
نورة : اي يلة بس اخاف اول مرة نطلع وحدنة
اسراء : احنا كبرنة لازم نكتشف الشارع.
قنعت نورة وبعدها لعبنا ورا مدة ابوها اجى اخذها واني تمددت بمكاني وطول الليل لازمني خوف ومغص من هاي الفكرة جنت كل دقيقة بقرار ورئي جنت بس اريد يجي الصبح.
طول الليل مانمت جنت حيل خايفة لانضيع ومانكدر نرجع.
اجى الصبح بدلت كالعادة عطري وشعري وكشختي ماتفارقني جنت مرتبة بشكل مايوصف..
الي بعمري عدهم لعب وعايشين طفولتهم واني بس اهتمامي ب مظهري ودراستي مامارست طفولتي ولا عندي غير صديقات بس نورة ويا صفنتي اسمع.
نورة : اسراء اسراء ماخلصتي اني انتضرج.
نزلت جوة تريكنا وطلعنا.
وصلنا السايق للمدرسة نزلنا بقينا شوية بالحديقة
نورة : دينا تدرين لحد هسه مانايمة من خوفي.
اسراء : ولا اني نمت بس احنا لازم نخطي هاي الخطوة اذا مو اليوم باجر وتريدين الصراحة اني هم كولش خايفة.
مرت مدة قليلة وطلعنا ركض ركض من فرع لفرع ومن شارع لشارع نخاف لااحد يشوفنا من السواق لو حراس المدرسة.
احلى شي سوينا بحياتنا اول مرة نكتشف الشوارع وحياة الناس البسطاء. بقينا نمشي مسافة شفنا مجموعة اطفال يلعبون
دينا : نورة شوفي شون يلعبون راسمين مربعات ويذبون حجارة ويكمزون تعاي تعاي
نورة : واي اسراء شوفي شكد حلو خلي نلعب وياهم
تقربنا كلتلهم شسم هاي اللعبة
ضحكو علية واحد منهم كال معقولة ماتعرفين
اسمها (خانة)
نورة : اريد اريد العب
اسراء : شون تلعبونها
وحدة منهم جاوبت اسمها زهراء
تذبين الحجر على رقم وتعبرين لازم ماتطخين الخط ومن تكملين تذبين الحجر على الرقم الثاني تبقين هيج لحد ماواحد منا يفوز
بدينا نلعب وياهم وعلمونا غير العاب دعبلة وغيرها من الالعاب الشعبية
تونسنا اني ونورة وياهم جان احلى يوم حسينا صدك ب طفولتنا
اسراء : نورة تاخرنا لازم نرجع
نورة : بس اصبري لعبة وحدة الله يخليج
اسراء : راح يخلص الدوام ترا ننكشف
رجعنا نورة تكول منا واني اكول منا تيهنا نفوت من فرع لفرع ولج ضعنا.
نورة بدت تبجي وخايفة واني اكوللها هسه نرجع لاتخافين ضلينا ساعات نفتر بنفس المكان ونخاف نسئل احد جان يوم مرعب لان اول مرة نطلع مكان وحدنة بعد مدة وقت السايق مبلغ بابا احنا ماكو كل الطلاب طلعو الا احنا.
بابا عاف شغلة واجى يدور ورا ساعات لكانة وجان كولش خايفة علية وصيح علية اول مرة اشوف بابا متعصب علية رجعنا ع البيت واني دموعي مانشفت مو لان ضعنا لا لان بابا جان قاسي علية سديت الباب علية بقت حسنة تدك بالباب ماماتي افتحي الباب لاتخوفيني عليج فتحتلها الباب حضنتها وابجي وتبوس بايدي وبراسي.
حسنة : ياعمري لاتبجين ترا بابا يخاف عليج وتعصب انتي غلطتي ويا وانتي تعرفين اعداء ابوج هواية لو احد خاطفج شجان سوينا.
اسراء : خالتو حسنة احجيلي شون جان شكل ماما وهم جانت تحبني.
حسنة : حبيبتي ماما جانت تحبج مثل حب ابوج حتى ماجانت تخليني اهتم بيج شكد ماجانت متعلقة بيج وكولش تحبج
اسراء : انتي من زمان اهنا
حسنة : اني ربيت ابوج بصغرة وهسه ربيت بنتة
اسراء : انتي هم عندج اطفال وزوج
حسنة : اني عندي بس انتو روحي من الدنيا
ضلينا نسولف ونحجي لحد مانمت
حسيت واحد يلعب بشعري ويبوس بايدية فتحت عيني لكيت بابا يم راسي
بابا : حبيبتي الزعلانة مني
درت ضهري ماجاوبتة
لزمني من بطني وبقى يدغدغ بية ويبوس كومي شوفي شجايبلج رفعت راسي شفت جايبلي مني كيك كولش احبة.
اسراء : بابا اني زعلانة عليك
بابا : اميرتي اني اخاف عليج خسرت امج وماريد اخسرج انتي مو مثل مامفكرة برا مو امان الج بس مادام تريدين تطلعين اني راح اخصصلج يوم اوديج برا
اسراء : ونورة هم؟
باباتي ماعرف اذا ابوها قبل لان نورة هم مثل وضعنا دائمآ عدنة أعداء بحكم عملنا ان شاء الله قريبآ راح تصيرين حرة وتسوين الي تريدينة
اسراء : يعني اكدر اطب واطلع عادي
بابا : اي بس مو هنا
بقيت افكر يعني وين مو اهنا
بعد كم يوم رحت يم نورة ابوها مايقبل تطلع وتروح للدوام عاقبها لان طلعنا بدون علمهم حتى ماخلاني اشوفها بدا يصيح علية بسببج بنتي جان راح يصيرلها شي الا امها تدخلت يلة سكت اني بقيت مصدومة بمكاني رجعت للبيت اني بس ابجي يعني معقولة هيج يسوي ابوها احنا اطفال مجرد حبينا نطلع برا ونشوف العالم الخارجي بعد فترة امها اجتي علينا كالت نورة مريضة تعالي العبي وياها رحت وياها شفت نورة غير نورة الي اعرفها ذبلانة ضعفانة اول ماشافتني دارت وجهة علية؟
نورة اني اسراء ليش ماتحجين وياية
نورة : اني وصلت لهاي الحالة بسببج لو مو انتي لعبتي بعقلي وخليتينا نطلع ماجان صار بية هيج
اسراء : والله ماجنت اعرف هيج يصير...
المهم بعد بجي وتواسيل كوة تصالحنا وبدينا نلعب مثل قبل وامها جابت حلويات واكل بقينا لليل نلعب سوية.
يتبع...