ذيبة سعد 18+

3

من الموصل؟ مات؟ اخوتي؟ تبقه هنا؟ ماعرفوا من شنو ينصدمون، جملتها مليانه صدمات، الكل بقه ساكت ميعرفون شلون يبدون وشنو يسألون وعن شنو يستفسرون
قاطع تفكيرهم دكت الباب تنذر عن وصول المحامي..
گام رعد فتحها ودخل المحامي وگعد بوسطهم
المحامي: همزين كلكم موجودين حته نقره الوصية هسه

كعد الكل ينتظرون المحامي يفتح الوصية، وأواز بقت موجوده تترقب شنو راح يگول وشنو راح يحجي، هيه نصدمت من عرفت جدها مات وهيه ماشايفته حته!! بس هيه أساساً جانت تكرهه ولو جان موجود جان طردها كبل من البيت وماخلاها تبقه بيه، يمكن وفاة ابو سعد جان بيها صالح الاواز

:الحجي ابو سعد خوش رجال وبالوصية مقسم كلشي بالتساوي على ولده وحته بنته الها مثل ما الاخوتها، الاربع عماير كل واحد مكتوب بأسمه عماره.. سعد ورعد ومهند ورغد سعد؟!!! سعد اله حصه بالورث... هذه جان تفكير الكل وعيونهم مفتوحه اما باقي الاملاك من محلات والصيدلية ف واردهم يتقسم عليكم كل شهر بالتساوي..

مهند: سعد ماله حصه بورث ابويه كام وكف ابويه متبري من سعد
رعد بعصبية: ولك سعد اخوك، وابويه ماگال سعد ماله حصه بورثه وهاي وصيته شنو تنكرها انته
المحامي: هدئوا شوي انتوا اخوان وهاي وصية الحجي ماجايب حجي بكيفي، الحجي كلش عادل وموزع كلشي بالتساوي

ابتسمت بخبث وهالشي زاد من ثقتها بنفسها اكثر.. هسه محد يكدر يطردها من البيت لو يحجي وياها كلمه صار الها ورث وفلوس وعماره بأسمها

أواز

ماانكر شگد فرحت مو بس لأن اكو ورث لابويه لا لان صارت هالمشاكل همين وجدي حرگ دمهم بهذه التصرف، مثل ما عيشونه عيشه كلها قهر وموت وحرب وبعدونه عنهم، يستاهلون المشاكل اللي راح تصيرلهم وجيتي لهنا بعد ما توفه بابا بمحلها خليني اكركب حياتهم شوي بدون ماسوي شي!!! مجرد وجودي هنا راح تصير بينهم مشاكل واني رجلي بالشمس

طلع المحامي والكل ساكت لحد ما حجت ام سعد
:احجيلي وين جنتوا وشنو صار من البداية لجيتج لهنا
وجهت حديثها الأزار اللي باوعتلها بكل برود، عدلت گعدتها وگالت بأستهزاء :اي يدللون بيبيتي وعمامي احجيلكم ليش لا...
شوفي بيبي اني لگيت روحي عايشين بالموصل اني وابويه وامي وبيبيتي ام امي عايشين ابيتها وحياتنه تخبل لا مشاكل ولا هوسه ابويه يحب امي وامي تحب ابويه، ماتت بيبيتي من صار عمري سنة وبقه البيت لأمي لان خالي بمصر وماطالب بيه
عدلت نبرتها تحاول تقوي نفسها من صار عمري ثمن سنوات وصارت الحرب بالموصل ابويه راح صار ضابط وبده يحارب وياهم .. بعد سنتين دخلونه، واخذوا امي گتلوها ما گدرت تگول سووها جاريه عدهم الافضل تگول ماتت رحنه عشنه ابيت صديق بابا اللي جان برتبة عميد.. بيته جان بمنطقه مقطوعه ومابيها غير بيته.. عايشين بيه ولده ثنين وبنته ومرته وعشنه يمهم وبدوا يدربوني وياهم عالقتال...
ولأن جانت عندي مهارة تصويب كلش عاليه اخذوني قناص... نرسمت ملامح الصدمة على الكل خاصه على البنات، ابتسمت بأستهزاء وكملت صرت قناص وياهم من عمري 12 سنة وصرت اروح للجبهه، يختلوني بمكان واصوب من بعيد وبهيج صرت معروفة بأسم ذيبة سعد لأن ابويه هيج يصيحلي ، وهيج خلصت حياتي.... اني مامكمله دراسه وما اعرف شي غير الاسلحة والقتال...
وگتلكم جينه هنا العرس صديق بابا وجانوا مستهدفيني بس صار غلط وفجروا سيارة بابا ومات الصبح واخواني سامر وسمر اختفوا فجأة ف اضطريت اخذ السياره واسوق لهنا.. لحد ما الگه اخواني لأن اني ماندل بيتنه اللي بالموصل