-تانيتك قصيدة براس شاعر مات…!!!
قصه:سنابل منكسره 🌾✨
بقلمي✍️:اسراء الصالحي 🤍✨
……………………………………
شادن:فتحت عيوني لكيت نفسي نايمه بحضن يامن غمضت عيوني واني اذكر البارحه شصار سحبت نفسي اخذت ملابس من الكنتور و رحت سبحت طلعتت من الحمام لكيت يامن توة كاعد
يامن:بوية شني هل جمال تكول سيسبانه
شادن:خصمت عيوني بتساؤل
:شنو سيسبانه
يامن:ما تعرفين السيسبانه؟
شادن:لا
يامن:زرعه صير شكله كلش حلو
شادن:هااا
يامن:تعايي
شادن:وين اجيي كوم البس ملابسك
يامن:هههه كايم
شادن:كام لبس ملابسه و اخذ ملابس من الكنتور و راح للحمام رحت للجربايه غيرت الفراش و الغطه و غيرت كلشي لبست حجابي و نزلت صبحت عليهم كلهم و رحت للمطبخ وي روان سوينه ريوك واني الضحكة شاكة حلكي حضرنه الريوك و مشة اليوم طبيعي مشت حياتي طبيعيه واني مرتاحة و يامن كل يوم يثبتلي هوه شكد يحبني حته ما يصيحلي بأسمي حتة كدام ابو و اخوانه كلة يكلي شريان روحي لحد مرة كعدت من نوم احس روحي مختنكة من الدنيه كله نزلت واني مالي خلك وانتر بأي احد يحاجيني كوة مشة اليوم احس روحي مقبوضة
صارت صلاة الضهر و لأول مرة اغلس عن صلاة و بدال ما اصلي رحت تمددت ع جرباية اني مستغربه من نفسي بس اكو شي يكلي يلا يومية انتي صلين بس اليوم انتضرت وقت الصلا يخلص حته انزل
غفيت بدون ما احس ع روحي احس جسمي يحترك بنار احد نايم ع صدري و يخنك بية احس روحي تريد تطلع كعدت يامن و روان فوك راسي جانت ايد يامن ع كصتي رأسا دفعته واني متنرفزة منه
:شبيككك انت غير نايمة شلون تخلي ايدك ع كصتي
يامن:شبيج شادن ترا جنتي مصخنه وردت اشوف اذا نزلت حرارتج
شادن:استغفرالله
عفتهم و كمت للحمام غسلت وجهي رجعت لكيتهم بعدهم بلغرفه منتضريني
:شبيكم شكو؟
روان:شادن شبيج ترا جنتي مصخنة و ترجفين وانتي نايمة ليش صيحين علينه
شادن:استغفرالله افتهمت كافي
ضلو يباوعولي بصدمة واني حته ما اهتميت الهم اريد بس اطلع من الغرفه احس احد لازمني من ركبتي واني هنا نزلت لجوة كعدت بالصالة نزلت روان راحت للمطبخ واني غلست ما رحت وراهه جسمي متكسر واريد بس انام بس ما اريد انام بلغرفة كرهته كلش ضليت بمكاني كاعده جابو عشه و تعشو واني ما رضيت اكل يامن كاعد و يخزر بية واني احس اكو شي بداخلي يكلي هجمي عليه و اكتلي احس روحي كارهته كلش كلمن راح الغرفته و فرغ البيت و صار هدوء واني ما تحركت من الصالة سمعت صوت يامن وهوه يصيحلي من فوك واني اصلا ما رديت ولا صعدت سمعت خطواتة وهوه ينزل
يامن:اني مو اصيحلججج
شادن:ما سمعتك
يامن:كومي يلا تعاي للغرفة
شادن:ما اريد
يامن:شنو ما تردين شعدج كاعده بلبرد وحدج
شادن:اني بكيفي
يامن:استغفرالله تردين سوين مشكله تعاي للغرفه مو هنا
شادن:زفرت بعصبيه
هيه شنو اريد اسوي مشكلة كوة اني ما اريد اروح للغرفه ما ارريد
يامن:مو بكيفج هيه
شادن:اجة بأتجاهي سحبني من ايدي و اني اطفر اريد يهدني ماكو لحد ما عضيته من ايدة لزم اديه و شالني دخل للغرفه سد الباب وقفلة نزلني
يامن:يلا نامي و بلا عناد والله اطيح حضج
شادن:ما انام ما اريد افهم اختنكت اريد اطلع افتح الباب
يامن:هيه شنو اختنكتييي باردة برة باردة تعاي نامي
شادن:استغفرالله كوة هيه ولك ما اريد انام ما اريدد افهم اريد اطلع اختنكتت عيفني ما اريدك
اباوعله خنزر عليه
يامن:انتي تردين ارجع اضربج؟
جلدج يحكج لو شنووو هاااا فهميني تردين نتعارك؟
شادن:اهووووو هم كال اضربج ولكك عوفني
يامن:لا تكولين ولك
شادن:اباوعله المفتاح عدة و ما يقبل يفتح الباب واني احس روحي راحت اختنكت كلش عيوني دمعت ضليت افرك بيهن ما اريد ابين انو اريد ابجي رحت للحمام سديت باب الحمام عليه وكعدت بي ضل هوه يدك بلباب واني عبالك ما اسمع ما اريد اروح يمة حته صوته ينرفزني
يامن:شااادن افتحي الباب ترة والله اكسرة
شادن:هسه هيه كوة عيفني شبيك انته
يامن:شنو اعيفجج شعدج بلحمام وحدج
شادن:استغفرالله بكيفي
يامن:بكيفج موو
شادن:سكت للحضات و نطفة ضوة الحمام احس روحي راحت من الخوف رأسا فتحت باب الحمام لكيته واكف كدامي مخنزر بعصبيه
يامن:انتي شنو من بشر الة بلكتل تمشين لو شنووو تردين اضربج؟
شادن:لا ما اريد
يامن:جا ليش ما تمشين عدل ليش تعاندين
شادن:يامن والله مختنكة ما اريدك
يامن:شنووو ما ترديني بكيفجج هيه ما ترديني شنووو
هسه تروحين تنامين لا والله احطج واكتلج كتله من هاي الزينه يلا كدامي
شادن:ما اروح
هجم عليه وهوه يصيح و يفشر ضربني وسحبني من شعري للجرباية نيمني غصبا عني نمت واني الدمعه بخدي ليش ما يفهمني والله احس مختنكة ما اريدة كوة هيه سكتت حته ما يرجع يضربني مرة ثانيه غفيت بدون ما ادري بنفسي
احس بيامن يخنك بية اريد افتح عيوني ما اكدر اريد اجر النفس ما اكدر فتحت عيوني لكيت يامن كاعد بصفي و بيدة جكارة رأسا دفعته
يامن:شبيجججج
شادن:ليش تخنكنييي واني نايمة
يامن:يابة والله ما خانكج شبيج انتي
شادن:لا جذب والله حسيت بيك تخنكني تريد تموتني
يامن:والله ما خانج اصلا جنت كاعد ضايج لأن ضربتج
شادن:سكتت مبين ما يجذب يمكن جنت اتحلم رجعت تمددت توني غمضت عيوني احس ياامن وكف فوك راسي ورجع خنكني رأسا كمت ضربته راشدي
لزم خدة وهوه مصدوم
يامن:شبيججج انتي تخبلتيييي
شادن:انت الي تخبلتت مو انييي ليش جاي تخنكنييي
يامن:ولج والله ما خنكتج اصلا ما تحركت من مكاني
شادن:لا تجذب حسيت بيك فوك راسي خنكتني
يامن:ولج والله ما كمت شبيج انتي
شادن:ما انام يمك اليوم والله ولا انام هنا
يامن:هاي جذبة حته تروحين برة تنامين موو برة ماكو نوم هنا تنامين
شادن:ولكك انتة جاي تخبث علية ما تخليني انام عوفني
يامن:ماكو نوم برة
شادن:نزلت من الجرباية رحت اخذت فراشي الجنت انام عليه فرشتة بلكاع و نمت توني جاي اغمض طفت الكهرباء احس روحي راحت من الخوف احس بيامن يتحرك يمي حسيتة لمس رجلي يريد يخوفني لحد ما حسيته سحب رجلي كمت اصرخ
اسمع صوتة يصيح شبيج شبيج
اريد بس تجي الكهرباء متت من الخوف لميت رجلية الصدري واني ابجي فتح فلاش تلفونه واجة يمي
يامن:شبيجج شادن؟
شادن:وخر عني والله حقير مثلك ما شفت
يامن:ولج شكووو شسويتلج
شادن:شلون تسحب رجليه واني نايمة وتخوفني
يامن:شنو
شادن:شنو شنو انته سحبت رجلي واني نايمة تخوفني حتة اجي يمك مو
يامن:والله ما مسوي هيج
شادن:جذاب لا تحلف انته سحبت رجلي
احجي ويا واشهك ندك الباب راح هوه فتحة دخلت روان
روان:شبيج شادن ليش صرخين
شادن:روان حبابة خل انام يمج يامن بس يخوف بية
روان:يامن ليش تخوفه
يامن:ولج والله ما وصلتله هيه مدري شبيه
روان:تدري صريخه وصل لوين مبينه خايفه شوفه شلون تبجي
يامن:والله ما جسته
روان:خليه تنام يمي
يامن:استغفرالله بس اليوم
روان:اي بس اليوم
شادن:اخذت فراشي و كمت وياهه من طلعتت من الغرفة احس تنفست وكدرت ارجع طبيعيه فرشت ونمت يم روان بس الخوفة بعدهي بيه
اكلج روان
روان:هاا
شادن:اطيني ايدج والله خايفه
روان:هههه هاج زعطوطة انتي؟
شادن:لا بس ونبي احس كلبي يرجف
روان:اسم الله ع كلبج نامي اني بعدني كاعده يمج
شادن:لزمت ايده مثل الطفلة و نمت من حسيت بلأمان
حلمت عبالك اني اركض بطريق مجهول و اسمع اصوات ناس صرخخ عليه اسمع اسمي بصوتهم اصوات اعرفه اركض اريد اوصل للصوت و احس الطريق يبتعد فزيت من النوم ع صوت يامن وهوه يكعدني
يامن:اسم الله شبيج شادن
شادن:استغفرالله يامن انته شبيك تريد تموتني من الخوف شتريد مني انتة
يامن:ولجج شبيج كعدتج لأن طولتي بلنوم ترة الساعه ب 12 ضهر صلاة صارت كومي صلي
شادن:ما عليك بيه خليني انام
يامن:استغفرالله اي ما عليه بيج بس كومي صلي
شادن:ما اريد اصلي
يامن:ليش عندج عذر؟
شادن:درت وجهي مخنزرة عليه انته شو ما تستحي شنو هل حجي لا ماعندي عذر بس اني ما اريد اصلي
يامن:تمام تمام
شادن:عفته ورجعت نمت من حسيت بي طلع كمت لبست حجابي و طلعت غسلت مشة اليوم واني احس كلهم يكرهوني واني هم اكرهمم ما اطيق اي احد بيهم مشت الأيام واني بلأسوء الأكل كطعته وصرت عبالك مومياء يوكلوني كوة عليه واذا اكل رأسا استفرغ احس روحي تريد تطلع يامن اذا اشوفه اتخبل اضل اعيط كلش كمت اكرهه و ما اريدة اغلب وقتي بغرفه روان وطبعا هاي الأيام و المعانات ما تخلة من كلام رنا و رفل دوم اسمعهن يكولن المخبلة تخبلت طردوهه هاي المخبلة بس ما ارد عليهن!!
لحد مرة كاعدين اني وروان صارت صلاة
روان:شادن كومي صلا
شادن:ما اصلي
روان:ليش عدج عذر؟
شادن:لا اني ما اريد اصلي
روان:اكلج انتي صار شكد ما جايتج
شادن:ما ادري
روان:ذكري ليمته اخر مرة اجتج
شادن:يمكن صار تلث اشهر ما جايتني
روان:يا غبيةة ولج خاف انتي حامل
شادن:لا شنو حامل
روان:كومي كلي ليامن خل ياخذج حته تحللين يمكن حامل
شادن:دولي روان انتي والله عطلانه اذا حامل وين بطني
روان:شادن ترا مو رأسا صير عندج بطن اذا حامل و هسه شبيج شوفيي
شادن:ما احاجي يامن اني
روان:اني اكلة بس ما اكلة خاف حامل اكلة اخذه حلل اله خاف عده فقر دم
شادن:هزيت راسي وسكتت مالي خلك احجي راحت هيه صلت اني احس بأوقات الصلا روحي تنقبض وصلت بيه اريد اشرد من هل بيت هاذ احس كلشي يخنكني راحت روان كلت ليامن و كله العصر اخذه و فعلا اجة العصر كلي يلا بدلي اخذج للدكتور رحت لبست بس حجاب و عباة حته ما مهتمه لمضهري رحنه و سويت تحليل دم و فعلا طلعت حامل. يامن ما مصدك و الضحكة شاكة حلكه اله اني كلش كارهه هل شي و ما اريد لا طفل ولا شي اصلا اني اريد اكل ليامن حته يطلكني مو نوب احبل
وصلنه للبيت وهوه ما خلة احد ما كلاله شادن حامل الفرحة ما سايعته اني اصلا ما هتميت للموضوع صعدت فوك نزعت حجابي و عباتي ضليت كاعده افكر شلون اكلة حته يطلكني لازم اول شي اسوي انو اموت الطفل بس شلون يموت باوعت لجرباية روان اذا اطفر منه ينزل الطفل صعدت عليه و طفرت رجعت صعدت وطفرت ضليت كساع اصعد و اطفر لحد ما تعبت كعدت ع جربايه ألهث و كوة اسحب النفس دخل يامن وعيونه مخنزرة اجة بأتجاهي
يامن:جنتي تطفرين؟
شادن:شنو؟
يامن:جنتي طفرين حته تموتين الطفل مووو
شادن:انصدمت شمدري
لا لا شنو اطفر حته اوكع الطفل حرام هاي روح
كز ع اسنانة و لف جفة ع ركبتي وهوه يخنكني
يامن:باعي ولججج اني مو غبي صار ساعه اسمعج وانتي دبجين اني جوة واسمع صوت رجلج وهيه تنضرب بلكاع اذا صار لأبني شي تدرين شسوي اكتلج وراا ما اخليج عايشة و ربج
شادن:ادفع بأيدة اريدة بس يهدني اختنكت
بس وخر ايدة تنفست براحه عفتة و لبست حجابي نزلت لاكتني رفل
رفل:هله بلمخبله
شادن:سدي حلكج لا اني اسدة الج بطريقتي
رفل:هههه بيج خير عود الكي حل لروحج شوفي نفسج شلون صايرة هم تعتبرين روحج بشر و عود مكيفه لأن حامل شتخلفين هم مخبل مثلج و تعوفي وشردين كتلي ابنج احسن من ما باجر عكبة ينولد ويكبر وهوه يسمع انو امة شردت وتركته لو امة وحده مخبله
شادن:احس تجمعت الدموع بعيني لأول مرة احس نفسي ما اكدر ارد عليه اختنكت كلش وين انطي وجهي هسه شسوي ياربي ساعدني لازم اموت الطفل اذا يضل عايش يصير مثلي و هم يتهجول بلبيوت لازم يموت بس شلون شسوي!!!
رحت للحمام دخلت و سديت الباب باوعت اريد شي اضرب بي بطني شي كون قوي
اباوع ماكو شي قوي شلون اموت هل طفل هاذ لازم ما يعيش ضربت بطني بأيدي واني ابجي تعبت من كلشي ياربي اخذ روحي بعد ما اكتفيت من البجي و الضرب غسلت وجعي وطلعت رحت للدرج بدون ما يحس احد ضليت اصعد و انزل اصعد و انزل لحد ما تعبت و صعدت نمت
حلمت عبالك اديه مقيدة واكو مرة كاعدة يم رجلية و كأنو اكو طفل بحضني من قيدتني المرة الي فوك راسي المرة الي يم رجلي سحبت الطفل من حضني واني اصرخ و مفرفحه اريد الطفل المرة جانت تخوف ما عده ملامح كله سودة فزيت مخترعه ع صوت روان
روان:كومي شادن شبيج
شادن:كعدت احس اكو شي بملابسي وخرت الغطه شهكنه اني وروان نفس الوقت الدم مالي الفراش ركضت روان صاحت ليامن
يامن:شبيجججج شنهاي شسويتي بروحج احجي
شادن:والله ما سويت ونبي هيه المرة مو اني هيه اخذته ما عليه
يامن:شجاي تحجين يا مرة استغفرالله روان جيبي عباا بسرعه لبسيه خل اخذهه للمستشفى
شادن:اجت روان و جابت عبا الي لبستني اخذني يامن واني احس بطني تتكطع من الوجع رحنة للمستشفى دخلنه ردهة النساء فحصتني الدكتورة
الدكتورة: للأسف بنتي الطفل مات الله يعوضج
شادن:اباوعله مصدومه معقوله بسببي مات لو بسبب المرة
الدكتور:نامي عدل امي خل انضفج
شادن:عدلت نومتي و غفيت بدون ما ادري فتحت عيوني واني احس بأبرة المغذي تخترق جلدي يامن فوك راسي
رمشت مرتين حته توضح الصورة احس كلشي مغوش عبالك كلشي حلم دنك يامن لمستواي
يامن:الله يعوضج ولو انتي مهتمه!!
شادن:رفعت عيوني ابوعله شنو قصدة
طلعت السستر الي جانت تخليلي المغذي تقرب يمي
يامن:ليش كتلتي شسويتي وكتلتي هسه تكليلي
شادن:مو مو اني كلشي ما سويت
يامن:شنو كلشي ما سويتيييي و التطفر مالتججج هااا احجي شسويتييي ليش موتي
شادن:والله مو اني والله هيه المرة اخذته مني
يامن:يا مرة انتي شطاي تخربطين
شادن:صفنت احس نسيت شجنت احجي استغفرالله اريد اذكر ع منو جنت اقصد عصرت دماغي اذكرت الحلم
يامن:هااا راح ضلين صافنه لباجر احجييي
شادن:بلحلم والله مرة هيه سحبته مني مو اني مو اني اني صح طفرت و صعدت الدرج و ضربت روحي بس مو حيل ادري هل اشياء ما تأثر
اباوعله تشخصت ملامحه بعصبيه
يامن:اي ابد ما تأثررر شلون ما تأثر وانتي ضاربة روحج شلووووون
شادن:يامن مو حيل هيج ع كيف هيه هيه اخذته ليش ما تصدك
يامن:استغفرالله ولج منيههه
شادن:المرة شبيك
يامن:يا مرة انتي تخبلتيييي يا مرة
شادن:والله حلمت بيه هيه
يامن:شنو حلمتي بلا؟
شادن:حلمت اني جنت حاضنه طفل و وحدة لزمت ايدي و الثانيه اخذته مني والله ادري مو اني سبب هنه اخذن ابني مني
اباوعله صفن يفكر هز راسه
يامن:يلا خلصي المغذي و خل نرجع للبيت واني اعرف شسوي
شادن:سكتت منتضره المغدي يخلص و اقنع بروحي اني مالي دخل النسوان هنه خذن ابني مني و مو اني الي كتلته خلصت مغذي و اجتي السستر و خرته من ايدي سندني يامن و طلعنه من المستشفى ركبنه السيارة و اتجهنه للبيت بس وصلنه صاح الروان سندتني و راح هوه يركض للغرفه مالتنه صعدت ع كيف اني وروان للغرفه
روان:راح اخذج الغرفتي
شادن:لا لا اخذيني ورة يامن شعندة بلغرفه ليش هيج ركض
روان:تمام
شادن:اتجهنه للغرفه فتحت الباب يامن ساحب الجرباية من مكانه و يدور جواهه سحب الميز و يدور عيوني تراقبه و اني جاهله ع شنو يدور لحد ما جاب كرسي و صعد يريد يشوف التاج مال الجربايه رفع راسة للساعه الي فوك جربايتنه و اتسعت عيونه بصدمه نزل الساعه كلبه جان مربوط ع اخيره شي فتحه و رفعه طلع هيج شي مثل الحرز …يتبع
……………………………………
هلا شونكم بنوتات طبعا بارت اليوم مو حلو اني اعرف بهل شي و وقته ابدا مو مناسب بس اسفه كلش جنت طالعه و ميته نعاس لزكته تلزيك اعذروني ما حبيته لا سردة ولا احداثه انشالله اعوضكم بلبارتات الجاية احبكم لا تنسون التصويت و التعليق اختم انا واياكم البارت التاسع و العشرون دمتم بحفض الرحمن 🤍✨
أنت تقرأ
سنابل منكسرة 🌾
Romanceبنت عراقيه في عمر صغير تنخذل من الجميع حتى والدها الذي من المفترض ان يكون هوه سندها وقوتها تقرر الهرب من الواقع لتستعيد قوتها فتجد نفسها في احد المنازل العراقيه لا تعرفهم ولا تريد التعرف عليهم لاكن القدر اجبرها ان تتحمل غيضهم وكرههم لها هل ستجد من ي...
