من عينيك سُمِيتْ عاشقاً✨

الفصل الرابع عشر...

يوم الخميس المنتظر..
عند العم صالح كان جالس بالصالة ينتظر العيال عصب من تأخيرهم...
العم صالح: وينكم فادي يا هادي...
فادي وهو يزين الكبك: انا جاهز بس ليه نكشخ كذا ماني فاهم؟
العم صالح: بعدين تعرف، يا شموخ وين البخور يا بنت...
شموخ تحط العود على الجمر وفاحت ريحته: سم يبه جيت...
هادي كان يمشي ويعدل شماغة: اتركولي بخور ترا ما تبخرت...
فادي: طيب اخلص علينا...
هادي: يبه وش المناسبة دايم نروح لهم عادي فيه عندهم عزيمه شي؟
العم صالح بجمود: ايه...
فادي: طيب لو درينا من بدري رحنا نساعد اجل بسبقكم...
العم صالح بحده: انتظر نروح كلنا...
هادي: طيب يبه وش المناسبة...
العم صالح وهو يمسح على لحيته بعد البخور: بخري خوانتس بارك الله فيتس، التفت لهم، خطبة ريوف عسى الله يوفقها...
الكلمة كانت سبب بسقوط المبخرة من يد شموخ وهي تناظر فادي وهادي طاح عقاله منه بصدمه...
لكن فادي كان بعالم اخر حس بحراره جسمه عجز يستوعب الصدمه عرق وخاف يطيح قدام أبوه ويدري حاول يقرب للكنب بشويش لحد ما وصل وجلس...
العم صالح بعصبيه: وش بلاكم انتم؟
هادي بعدم تصديق: يبه قصدك رهف؟
العم صالح: ما تسمع انت؟ ريوف اليوم خطبتها يلا لا نتأخر...
فادي بهدوء: انا ما اقدر اروح تعبان...
العم صالح: ما فيه كلنا نروح ريوف بنتنا من يصب القهوة اذا جلست يلا محد بيجلس...
هادي برجاء: انا يبه اصب القهوة خليه يرتاح من الصبح هو تعبان...
العم صالح بعصبيه: مافيه الا العافيه يلا قم قم انت وياه قدامي واضبطوا أنفسكم...
استسلم فادي اللي ينتظر الكابوس ينتهي لكن حس بهادي جلس جنبه يتطمن عليه...
هادي: لا تروح انا بقدر على ابوي...
فادي: بتروح يا هادي بتروح مني سمعت وش يقول خطاب لريوف...
هادي بزعل على اخوه: يمكن نصيب...
فادي وقف والخوف بعظامه: لا والله ما تروح لغيري مشينا...
هادي مسك يده: وش ناوي تسوي؟ لا تفضح ابوك عند العرب...
فادي سحب يده بقوة ومشى بسرعه وهادي يركض وراه ويعدل شماغه يحاول يضبط اخوه صار ممشاهم بعد ابوهم بخطوه...
فادي يمشي خطوه ويتمنى يرجع عشر ورا وهادي خايف من رد فعله...
ــــــــــــــــــــــــــــــــــــــ
بيت الجدة...
كان الوضع استنفار كل شي صار جاهز عند الرجال وصل العم أبو مالك واخوه وزوج العمة روضة كان الكل ينتظر جيت العم صالح وعياله...
عبد المحسن يهمس لمتعب: متحمس ابغى اشوف شكل فادي مع مقلب عمي...
متعب: والله أخاف اخربها واضحك ويخرب كل شي...
ثنيان بهمس وهو يرص على اسنانه: لا باقي ارفعوا اصواتكم اكثر محد سمع...
أبو مالك: فيه شي وانا عمك؟
ثنيان بابتسامه: لا بس كنت اسأل اذا فيه شي باقي ما جهز...
أبو مالك بابتسامه: كل شي على ما تحب لا تشيل هم بس كنه طول عمك ماهي عاده...
قبل يجاوب ثنيان العم صالح بصوت جهوري: مسهم بالخير...
الكل وقف ويستقبل ويسلم بفرح عبد المحسن وثنيان ومتعب عيونهم على فادي اللي يتصنع الضحكه بالغصب وهادي يلتفت يناظر اذا فيه احد غريب او لا...
ثنيان يسلم على فادي: الله يسعدكم على جيتكم خفت تنشغلون ما تجون لخطبة ريوف...
شد بشكل ألي فادي على يد ثنيان كأنه ما يبيه يكمل حارب ابتسامته ثنيان وكمل: هذا اختكم وبنتكم بعد والله انه كفو اللي اخذها...
متعب كان واقف جنبهم ومسوي معصب عشان ما يضحك عبدالمحسن كان بين اللحظة والثانية يخبي وجهه او يسوي مشغول بالجوال عشان ما يبين ضحكه...
ـــــــــــــــــــــــــــ
عند الحريم...
كانت ريوف منهارة خوف وسعادة شعورها ملخبط كانت تجهز عشان بعد الخطبة بتكون النظرة الشرعية قبل تنزل جتها ريهام وطلبت من رهف وبنات عمها يطلعون...
ريهام بابتسامه: ما جت فرصة نتكلم الحين بقولك اللي بخاطري...
ريوف بعيون دامعة متمسكه بيد ريهام تنتظرها تكمل...
ريهام تكمل: انتي مو بس اختي انتي بنتي ربيتي على عيني ادري المفروض ما اعاقبك وأعالج الغلط بغلط اكبر منه لكن والله من خوفي عليك...
ريوف بامتنان: لو ما منعتيني وخوفتيني كان للحين نتراسل وما اخذ فادي هذي الخطوة بالعكس انتي صحيتيني على نفسي انا اللي اعتذر لأني غلط بحق نفسي قدام ربي قبل اغلط بحقكم...
حضنتها ريهام: الف مبروك يا اجمل عروس يا شبيهة الغالية...
ريوف بكت معها دخلت رهف كانت تبغى ريهام تنزل لجدتهم لكن انصدمت من منظرهم...
رهف بشهقه: يا بنتي ايش سويتي خربتي المكياج هذي وهي خطبه اجل وش بتسوي بالعرس لا كذا بنقول نكنسل احسن...
ريوف بضحكه وعيون دامعه: لااااا...
ريهام: ههههههههههههههههه لا تكفي الحين بتموت علينا...
رهف بزعل: انا اللي بصيح كلكم بتروحون...
ريوف: وين اللي تبغى تفتك منا؟
ريهام: ههههههههههه يحليلك والله بس كلام...
جلست رهف جنب ريوف وتحضنها...
ـــــــــــــــــــــــــــــــ
المستشفى...
قدر يتمسك طارق شوي لكن سارة كانت على حالها بغيبوبة
والدكتور قال ممكن تجلس سنة او سنين على وضعها كانت الزيارة بالأيام الأولى زحمة بدت تخف تدريجيا بقى مع سارة طارق و امه رجعت وحيدة حتى أطياف بعد اخر موقف صار مع ثنيان صارت تجي وقت قصير ونادر تجي خوف من مصادفة معه...
طارق لسانه ما تعب من كثر الدعاء يصحى كل يوم يجي يتطمن عليها على امل صحت كان يسولف عليها كل يوم بدون ملل...
طارق بصوت تعبان: وعد نروح شهر عسل لسويسرا مثل ما تتمنين وبوديك تأخذين عمره عن امك وعن سعود وبتكملين دراستك واللي تبينه نسويه...
قال بصوت غلبه الحنين: بس تكفين اصحي اشتقتلك...
حس بأمه حطت يدها على رأسه تكتم صوت بكائها: انت اللي تكفى شلعت قلبي ارحمني يمك ارحمني وارحم ضعفي...
طارق نزل رأسه ما قدر يمسك نفسه واجهش ببكاء مرير انتحب بحضن امه بتعب من فرحته اللي خربت من حبيبته اللي بين الحياة والموت...
طارق بصوت مكتوم: يمه سارة حياتي لا تروح مني الحياة سارة بدونها كل شي كئيب...
ام طارق: يمي لا تسوي كذا بنفسك لا تقنط من رحمة ربك ربك رحيم فيها...
طارق: المفروض الحين بشهر العسل كله مني يمه انا السبب...
شددت ام طارق على ولدها بين يدينها تحاول تخفف عنه...
ــــــــــــــــــــــــــــــــــــــــــــ
بيت الجدة عند الرجال..
كان الوضع هادي ثنيان والعيال ضابطين الدور مع العم صالح هادي كان حاس بشي غريب لما ابوه رفض يجلسون عند العيال وجلسهم بينه وبين ثنيان...
هادي بهمس: ابوك بيحرج علينا ولا وش؟ لا مخلينا نصب ولا نجلس مع العيال!
فادي بنرفزه مكتومه سمعها ثنيان: ماني فاضي لمزحك محد جاء للحين...
هادي: أي والله خير وش هالخطيب...
فادي بقهر: جعله ما يجي...
ثنيان بنفس مستوى الصوت: بسم الله عليه لا تدعي على زوج اختي...
فادي بقهر اكثر: زوجتوه على طول يمكن ماهو بكفو لها...
متعب قرب بنفس مستوى الصوت: لا ما عليك رجال كفو والنعم فيه وبيسعدها، التفت لثنيان وهو قاصد يزيدها عليه، اسمع النظره الشرعية وين؟
ثنيان يكبت ابتسامته: بالمجلس الداخلي...
فادي: نظرة شرعية خير من متى عندنا؟ طيب يمكن ما يكون فيه نصيب ويصير تكشف عليها...
هادي بفزعه: أي والله صادق...
ثنيان بنظرات جدية: لا ما عليك يحبها ويبيها لو بثوب روز...
التفت ثنيان على متعب كان ساند نفسه على ورا ويغطي وجهه يسوي نفسه يسولف مع عبد المحسن بعد ما شاف قهر فادي يحاولون يكتمون ضحكهم...
العم صالح: من متى اقولكم لا تتساسرون؟
ثنيان: لا يا عمي بس العيال يسألون عن المعرس متى يجي...
فادي بصوت جامد: امداه اعرس ترا للحين ما جاء يخطب زوجتوه؟
استغرب أبو مالك قرب يسأل العم صالح: هو ولدك وش بلاه؟
العم صالح همس بنفس المستوى: للحين ما علمناه انه المعرس خليه يتربى شوي...
ضحك أبو مالك: ما تجوز عن سوالفك يا صالح...
هادي بحمية: وش هالناس اللي ما عندهم ذوق اذا هذا أولها ينعاف تاليها انا أقول لا تزوجونه...
مالك وفيصل وابوه وعبد الله صاروا يناظرون بعض بتعجب من كلامهم بس مالك لما شاف كيف جالسين ومتعب وعبد المحسن وكيف يخبون وجيههم من الضحك حس فيه شي...
قرب لفيصل بهمس: احس فيه شي صح؟
فيصل: أي صح مو بس انا اللي ملاحظ؟ انا اللي اعرفه فادي يبيها ليه زعلان؟
مالك ناظر ابوه يضحك مع العم صالح ويسرقون النظر لفادي اللي كان مركز على الباب...
مالك بضحك: عمي والعيال شكلهم مسوين فيه مقلب يا أنهم ما قالوا له او شي ثاني...
فيصل بخبث: اما!!! وش رأيك نخرب عليهم؟
مالك: اركد بكره خطبتك لا تخربها مع ابوها ويقلبك على جنوبك بعصاه...
ضحك فيصل: أي والله صادق وش رأيك نشارك؟
مالك بابتسامة خبث: قدام...
فيصل بجدية: أقول ثنيان انا سألت عنه والله رجال طيب بس فيه عذروب واحد...
ثنيان استغرب من كلامه تنح ثواني ومتعب عرف انهم فهموا اللعبه متعب: ما عليه الرجال ما يعيبه شي...
ثنيان عرف انهم دخلو معهم: وش عذروبه؟
مالك: والله يا أبو صالح انسجن سنه...
فادي بصدمه: تزوج اختك خريج سجون؟
مالك: بس رجال ما يعيبه شي والسجن يطلع رجال...
هادي: وش قضيته؟
فيصل: ما نقدر نقول الله يستر عليه...
فادي بانفعال: صاحين انتم ترمون البنت هذي الرمية؟
العم صالح بحده: وانت وشلك فيها هذا النصيب والرجال نعرفه...
هادي: بسـ..
أبو مالك: أخوانها أدرى بمصلحتها...
فيصل: صح كلامك يا عم...
اختفى صوت متعب مع عبد المحسن اللي ما نطق من كثر الضحك وجه صار احمر يغطيها بظهر متعب وبطرف شماغة وشاف أبو مالك وضع عيال اخوه محد بيقدر يصب قهوة...
أبو مالك: مالك وانا ابوك قهوينا من يمناك...
كتم ابتسامته مالك لما شاف العيال وقام يصبها...
لما وصل للعم صالح حط يده من حول رقبته وهمس باذنه: تكفى يا عمي يكفيه شوف كيف منشلع قلبه...
ابتسم العم صالح لما شاف كيف هادي معصب عشان اخوه وفادي كان وضعه جدا صعب واضح عليه الغضب ويفرك بيدينه اشر برأسه معنا يكفيه...
قبل يتكلم العم صالح الضابط عزام بصوت جهوري: السلام عليكم...
بسرعة وقف فادي بشكل هجومي مسكه ابوه: اركد يا ولد لا ادفنك بمكانك...
الكل قام يرحب ويسلم لما وصل عند فادي حس انه وده يذبحه استغرب سلامه عزام بس وصل لثنيان وهو يسلم...
عزام: وش بلاه فادي؟
ثنيان بضحك: عمي يربيه ههههههههههه...
عزام: الله يكفينا شر عمك بس وش دخلني انا؟
متعب يسحبه يسلم عليه: انت الضحية جيتك بوقت غلط بعدين نقولك...
عزام: والله؟ هههههههههههههههه
شاف عبد المحسن كيف وجهه: شكل الموضوع كبير من وجهك...
جلس عزام بين متعب وثنيان وشرب قهوته وكانت عيون فادي عليه وواضح الغضب فيها ومن بين السوالف...
عزام: كنت جاي بقابل ثنيان بس الحمدلله اللي جمعني فيكم يالوجيه الطيبه بس عسى اللي جمعكم خير!
أبو مالك: تفضل يا أبو شموخ...
العم صالح بابتسامه: حنا اليوم مجتمعين على شي باذن الله انه خير اليوم حنا جينا وطمعانين بنسبكم نبغى بنتكم ريوف لولدنا فادي...
فادي كان جالس بهدوء فز ومسك يد ابوه: سألتك بالله صادق؟
الكل انفجر يضحك على شكلة وردة فعله: ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه...
عبد المحسن بضحك: والله كسرت خاطري صار لك ساعه تدعي على نفسك يا عريس...
بسرعة باس رأس بوه ويبوس يدينه...
هادي بصدمه: من جدكم؟ لحظة لحظة كلكم متفقين؟
ثنيان: حد علمي فيكم ذيابه مدري وش صار فيكم اليوم!
العم صالح: اقعد انت وياه خل نكمل كلامنا...
فادي جلس وحاله تغير الابتسامة كانت واضحه من قلب التفت عليه العم صالح: بالهون على شدوقك خلاص اثقل فضحتنا عند العرب...
فادي بحماس: ما عليك يبه تكفى كمل...
تعدل وعدل غترته المجلس كله يضحكون عليه...
كمل العم صالح: الولد جاهز وظيفة والبيت باذن الله بيجهز وبنتنا ريوف تشرط باللي تبي والمهر اللي تبي ابد لا يردها شي...
ثنيان: تفضل يا عمي البنت بنتك، كان يقصد العم أبو مالك اللي بدوره تكلم...
العم أبو مالك: ابد المهر ما يكثر عن 50 حنا نشتري الرجال والبنت ما عندها شروط والبنت لولدكم...
الكلمة هذي كانت مثل البلسم على قلب فادي واضح عليه الفرح بعد المباركة وكلام كثير والتوصيات اللي جاته تذكر فادي كلام ثنيان...
قرب فادي لثنيان بهمس وحماس: متى النظرة؟
ثنيان بعبط: أي نظرة!
فادي: وش بلاك نسيت النظرة الشرعية؟
ثنيان بنذاله: اها لا هذي كانت بس كلامك صح فكرت فيه لو ما وافقت تكون تكشفت عليك...
فادي: بس هي وافقت...
متعب: عيب تكشف على محارمنا...
مالك جلس بين متعب وعبد المحسن وفيصل جلس بين فادي وهادي بعد الرسميات صاروا يضحكون ويطقطقون على فادي...
فادي بسخرية: يا حظكم لقيتوا لكم شي يسليكم سنة قدام...
ثنيان: مشينا يا فادي؟
فادي بحماس: وين؟
ثنيان: ما تبي النظرة؟
فادي: الا يلا، قام بسرعة قبل ثنيان...
العم صالح وهو يشوف اللي صار: وجرح تسبدي جرحاه مابك طب ما تثقل ابد...
ما كمل كلامه لا ومتعب ومالك كانوا يشربون قهوة طلعت من خشومهم من الضحك عبد المحسن وفيصل كل واحد يغطي وجهه بشماغه وفادي ما كان همه شي اهم شي بيشوف ريوف...
أبو مالك: خليه يستانس يا صالح يكفيكم شلعتوا قلبه عليها...
طلع فادي وثنيان للمجلس الداخلي علشان النظرة والعيال كلهم يضحكون...
نزل متعب فنجاله: بروح اغثه شوي...
عبد المحسن: خذني معك...
فيصل بصوت عالي: لا تخلون شي بخاطركم...
ــــــــــــــــــــــــــــــــــــــ
عند الحريم..
بعد وصول راضية وشموخ...
شموخ: والله ابوي ماهو هين مسكين فادي كان شوي ويصيح...
العمه سمر: ههههههههههههههههههه مسكين والله اجل اكلها...
ريهام: عمي صالح مرات عليه افكار تصدم...
شموخ: والله ما تشوفينه كيف ما قدر يمشي ولا هادي يا حياتي يقنع ابوي ان فادي ما يروح وانه بيغطي مكانه كان خايف عليه...
غيم برحمة: يا عمري يا فادي...
صرخت بعد كلامها لما جتها قرصه خفيه من ريوف...
ريوف وهي مستحيه ما تبي احد يحس: لا تقولين عمري وجع...
طيف بضحكه: هههههههههههههههههههههههه من الحين بدت الغيرة...
ريوف: لا بس عيب...
رهف بغمزه: علينااااا؟؟
بعد وصف شموخ للموقف تحت مسامع ريوف اللي كانت خجلانه ومبسوطة من حب فادي لها وانه قدر يوفي بوعده ارتفع صوت ثنيان ينادي على ريهام...
ثنيان: وين حلوتنا؟
ريهام بابتسامه وعيون دامعه: داخل...
ثنيان: يا قلبي ليه الدموع الحين؟
ريهام: كنت متطمنه ان البنات مع بعض الحين رهف بتكون لحالها...
ثنيان: وحنا وين رحنا وترا ما يعني انكم تتزوجون تقطعونا اكيد بتجون وغير كذا عندها عمتي سمر ويمه وعمتي راضية...
متعب: وعمتي روضة بعد بتجي...
ثنيان: بسم الله متى جيت؟ ليه تجي!
متعب بضحكه: متوحمه على عبد لله تبغى تطلقه...
ريهام بصدمه: هههههههههههههههه اما كيف عرفت؟
متعب: كلمت يمه وحنا راجعين من بيت عمي عبد الرحمن حاولت فيها يمه لما عجزت عنها قفلت بوجهها ههههههههههه...
ثنيان بضحك: والله ينخاف منهم شيبنا واحد يمقلب ولده والثانية تقفل بوجه بنتها...
ريهام: هههههههههههههههه أي والله كلنا رحمنا فادي...
متعب: على طاري فادي استعجلوا ترا منشلع قلبه وعبدالمحسن بيكمل عليه...
ثنيان: والله كنت حاس ما راح تفوتونها عليكم...
ريهام: بروح انادي ريوف...
راحت وجت معها ريوف بعد موجه توصيات من البنات صارت ترجف متوترة وخايف حاول ثنيان ومتعب يخففون توترها قبل تدخل...
متعب بلعانه: وش رأيك نمقلب فادي...
ثنيان: لا حرام اللي جاه من عمي يكفيه...
متعب برجاء: والله بس نخبيها ورانا ونقول رفضت...
ثنيان جازت له الفكرة بس رحم فادي: مدري والله...
متعب برجاء: تكفى...
ثنيان بابتسامه: يلا...
دخلوا وكانت ريوف وراهم ما بينت بسبب فارق الطول واجسامهم العريضة بالنسبه لحجم جسمها الناعم...
ثنيان بتمثيل: والله مدري وش أقول بس البنت سحاوية رفضت وبكت لما اصرينا...
فادي كان مصدوم ما تكلم عبد المحسن كان مثل فادي صدقهم...
متعب: ما نقدر نجبرها...
فادي حس انه انكسح: لا عادي اهم شي وافقت ورضت الزم ما علي راحتها...
ثنيان: وتقول تبغى العرس بعد التخرج يعني بعد ثلاث او اربع سنين على حسب دراستها...
فادي برجاء: لا الله يسعدكم خلينا نعجل بالعرس ولا تشيل هم دراستها بساعدها فيها...
متعب: اذا تسمع نصيحتي اهرب دام ما ملكت تراها عبد المحسن بدون شنب روح خذلك اجنبية مزيونه...
عبد المحسن بصدمه: وش فيك قلبت على اختك...
ثنيان: لا عادي الا ريوف...
صرخ متعب من قرصتها خلته يبعد ويبين نص ريوف وبخجل عفوي تخبت ورا ثنيان...
عبد المحسن: نصابين...
فادي بسرعة تغيرت تعابير وجه لابتسامه وصدح صوت ضحك ثنيان ومتعب على فادي وغيرة ريوف...
سحبها ثنيان من وراه وحضنها باس رأسها وجلسها جنب فادي...
ثنيان: يلا جبناه لك وربيناه بعد...
فادي: مو بس ربيتوني لا خليتوا قلبي ينشلع كنتم بتجلطوني...
متعب: يلا عبد المحسن نتركهم مع ثنيان...
عبد المحسن: ماشاء الله اخته لحاله حتى انا بجلس بشوف...
متعب سحبه وطلع وثنيان جلس معهم كانت ريوف ماهي قادره ترفع رأسها من الخجل وفادي طاير من الفرحة بعد مرور ربع ساعة ...
ثنيان: اعتقد كذا كفاية يلا...
فادي: لحظة لحظة، صار يتلمس جيوبه استغرب ثنيان منه ماهي الا ثواني والتفت لريوف، ما كنت ادري يا غلا الروح انها خطبتنا ما جبت لك هدية لكن هذي الاسواره حقتي احبها واعزها لكن ماهي اعز منك بكون سعيد لو تقبلينها وابشري بالهدية اللي تليق فيك...
ابتسمت ريوف ولا تكلمت مدت يدها ولبسها وطلع ثنيان وفادي اللي من الفرح يحس نفسه بيطير...
ــــــــــــــــــــــــ
بمجلس الرجال..
بعد ما اتفق العم صالح مع أبو مالك وأبو فيصل على الملكة والعرس بيكون بالعطلة طلع العم صالح وعياله وراح العم أبو مالك والعم أبو فيصل لريوف عشان يباركون لها ويجلسون مع امهم والبنات...
تمت خطبة شموخ وفيصل واتفق العم صالح وأبو فيصل تكون الملكة والزواج مع فادي وريوف الكل كان مبسوط ما كانت ام فيصل راضيه وتشوف ولدها كثير على شموخ لكن بعد اخر موقف بينه وبين ابوه بسببها وفرح فيصل تنازلت شوي...
مر أول الشهر بتجهيز ريوف وشموخ وريهام كان متعب او هادي يودونهم يجهزون مع بعض واتفق الكل على كل شي...
ـــــــــــــــــــــــــــــــــــ
بالمستشفى..
كان جالس ثنيان ورا مكتبه وقباله جالس عزام...
عزام: ما في حل الا اقابلك بالمستشفى؟
ثنيان بضحك: والله مره انشغلت...
عزام: معذور وانا اخوك بس قولي اخبار طارق؟
ثنيان تنهد: على حالة ماني قادر اطلعه من اللي فيه شكلي اذا طلعت باخذه معي بريطانيا بس عسى يطيع صارت حياته بالمستشفى حتى بمناوباته ما يركز نغطي عليه قد ما نقدرعشان ما يفصلونه...
عزام: الله يعين ويصبره ويشفيه وانت متى بتروح؟
ثنيان: للحين ما حددت...
عزام: اهم شي تحضر عرسي...
ثنيان بصدمه: بتتزوج؟
عزام: ان شاء الله
ثنيان بفرح: مبرروووك عسى الله يتمم لك من بنته؟
عزام: الصدق للحين ما خطبت ابيك تتوسط لي...
ثنيان: انا؟ عند مين؟
عزام: انا نويت اخطب كريمتكم أطياف بنت عمك عبدالله...
ثنيان بصدمه: عمي أبو مالك ما غيره؟
عزام: أي نعم قلت اقولك واتأكد اذا محد متكلم يبيها او مخطوبه...
ثنيان ابتسم: ابد الله يحيك وزين ما اخترت بنت عمي والنعم فيها وتستاهل واحد مثلك وشرواك...
ارتاح عزام بعد كلام ثنيان وقرر يروح بعد ما ثنيان يكلم عمه يخطبون بشكل رسمي...
فرح ثنيان من فرح صديقة عزام اللي كان يجهل مثل ما يجهل ثنيان ان أطياف هي حبيبته بنت عمه اللي يدور عليها...
عزام: وانت متى ناوي؟ ما لقيت سندريلا للحين؟
ثنيان بضحك: لا والله للحين اختفت ما عاد جت...
عزام: الله يسوقها لك ويطرح فيها البركة...
ثنيان: اللهم امين...
ــــــــــــــــــــــــــــــــ
ملك فادي وفيصل والكل كان سعيد الكل يجهز للعرس بيكون بعد شهرين وزواج ريهام بيكون بعد شهر بدت الاختبارات وبدا الضغط بين الدراسة والتجهيز الكل فرحان الشي اللي ساعد اكثر وجود روضة عند أمها اللي رافضة ترجع بيت زوجها بسبب الوحام...
ثنيان كان مع طارق ينتظر سارة تصحى كل يوم ويراقب حاله لكن كان يجهل ان مالك يتطمن عليها كل يوم بدون احد يحس كان زعلان عليها اكثر منهم يدعي ويتصدق يبها بس تصحى وتعيش بخير بعيد عنه إحساس تأنيب الضمير يعوره يحس دعوته السبب...
ـــــــــــــــــــــــــــــــــ
بيت الجدة..
عند متعب يقنع جدته تخطب له طيف لكن الجدة كانت ترفض زواج أقارب...
متعب برجاء: تكفين يمه ما اشوف احد من بنات حوا غيرها يا تزوجيني طيف يا لا تطرين لي العرس...
الجدة بغضب: انا قلت لك قبل ولخوانك لا تفكرون ببنات عمانكم ثنيان لقيت عروسة خلود بنت عبد الكريم...
ثنيان دخل وقت ننقاشهم وسمع اخر كلام جدته...
ثنيان: ولا لك لوى يمه انا فبالي غيرها...
الجدة: لا تقول بنت عم او بنت خال...
ثنيان: لا ابشرتس مدري من بنته...
الجدة بصدمه: ما تدري من بنته؟ كيف؟
متعب: صادق انت؟
ثنيان: أي والله إني عند ربي صادق شفتها مرتين بالمستشفى ولا اقدر اظلم بنات الناس ابيها ولا ابي غيرها...
الجدة: بس توك تقول ما تعرفها كيف بتلقاها؟
ثنيان: انا ادور عليها وانا قلت عشان ما تخططين وتخطبين بدون لا ادري...
الجدة: واذا ما لقيتها ولا كانت متزوجة؟
ثنيان: بعدها لك اللي تبين...
الجدة: وانت يا متعب دور غير بنت عمك...
ثنيان: يمه الله يهديك الولد مشلوع قلبه على بنت عمه لا تحرمينه...
الجدة بحده: انا من البداية قلت لكم لا تنتظرون أوافق على زواج قرايب...
متعب: يمه الحب ماهو بيدينا ولا هو حرام...
ثنيان بأقناع: يمه الله يخليك لنا ادري خايفة يتكرر موضوع اخوك لكن الحين الطب تطور اذا ما يتناسبون بتحليل الزواج قبل ما كان فيه علشان كذا ما كان يعيش لهم ولد...
الجدة بصوت باكي: والله كان يتقطع قلبي عليه وانا اشوفه يفقد ضناه كل مره مات ما نفعه الحب ما عقب له ولد...
ثنيان: هذا قدر ومكتوب والانسان ما يقدر يمنع نصيبه خليه يجرب اذا ماهي بنصيبه ما راح يتم شي ولو ما تطابق تحليلهم ما راح نزوجهم...
الجدة: امسك شاربك وقولها...
ثنيان: بدون لا امسك شاربي وعد رجال...
سكت متعب ما يبي يندفع قدام جدته اتفق ثنيان مع جدته يروحون بكره يخطبونها له مع العم صالح...
ـــــــــــــــــــــ
من بكره في بيت أبو مالك...
كان ثنيان وخوانه والعم صالح وعياله متحمسين أكثر من متعب كان هادي يناظر عبد المحسن ويأشر بعيونه على متعب اللي من الحماس بيطلع من ملابسه بعد القهوة والسوالف...
العم صالح بابتسامه: اليوم يا أبو مالك ما جيناك حتى نكسب شوفتك بس لا جينا وطمعانين بنسبك لواحد من عيالنا...
العم أبو مالك جاء فباله أطياف وثنيان رد بفرح: الشرف لنا يا صالح اسلم(بمعنى كمل)
العم صالح: جينا نطلب يد بنتك على سنة الله ورسوله طيف لولدنا متعب...
تغيرت ملامح العم أبو مالك وبان عليه الصدمة وصار يتلعثم بالكلام ...
العم صالح: فيه شي يا عبد الله؟
أبو مالك: والله مدري وش أقول متعب ولدنا وطيف بنتكم والشرف لنا ومتعب رجال والنعم فيه والله يرزقه بالنصيب الأحسن طيف خطبها قبل أسبوع ولد خالها ولو كنت ادري ان له خاطر ما تروح لغيره لكن النصيب....

*********