رفقاً بالقوارير

الـبـارت الـسـابـع

#رفــقــاً_بالــقــواريـر

#بــقــلــم_بـتـول_حـسـيـن

            للتواصل حساب الانستا 7bt_5y

               يوزر وحساب الواتباد Batol99Hussein

#الـبـارت_الـسـابـع

مساء الخير حبايبي اترجاكم ما تتجاوزون على اي شخصية بالقصة انتقدو وانطو رئيكم وتوقعكم بس ياريت بدون تجاوز + احبكم ❤️

>>>>>>>>>>>>>>----<<<<<<<<<<<<<<<

مابية حيل ارفع جفن
ذبلان جسمي من الحزن
ولدمع من كد مانزل
ماخلة لون برمشي

>>>>>>>>>>>>>>----<<<<<<<<<<<<<<

سـارة ::- فكرت هواي اطلع بيت وحدي بس ماعندي فلوس منين اوفر فلوس أجار بيت ومصرف للبيت وللاطفال اني گاعدة وياهم واگلي اني وجهالي وياهم

وگوه مدبرة فلوس مصرفنا اذا واحد تمرض او ردنا ملابس او احتاجينا شي والخياطة شبه نقرضت لان الاغلبيه تشتري جاهز

فكرت هواي ودورت بمواقع التواصل على شغل بس ماكو اني عندي شهادة ابتدائي وكلها تريد شهادات جامعية وبكلوريوس ،،،،، كلش احس ضاقت الارض بيه واحتاريت

صدفة اجتني مرة من جوارينا متوسطة بالعمر بس متروسة شوية لهذا ملابسها كلها تفصال وتخيط يمي دائماً لان خياطي كله صار لنسوان كبار بالعمر

گعدت بالصالة وصارت تراويني قطع القماش واني انزل من اليوتيوب والگوگل صور فصالات دائماً اشوفهم وبكيفهن يختارن ضلت تختار وتسولف وياي

::- اگلج شعجب لحد الان حزينة على زوجج الله يرحمة ماما بعدج زغيرة كلش وحلوة وألف واحد يتمناج

سـارة ::- صدگ تحچين خالة صار سنتين من توفه حتى مو فترة طويله

::- العمر يركض ركض وبعدج زغيرة واشوفج مشلوعة گلب ذبي الاسود الحزن بالگلب واذا اجاج ابن حلال وخوش قسمة لا تفكرين مرتين وافقي وعيشي بعدج زغيرة

سـارة ::- نزلن دموعي واني اتذكر سندي وحبيبي خالد غصه صارت بگلبي واختنگت واحس النفس يرفض اتنفسه ،،،، ما اگدر حتى اتخيل اصير ملك شخص غيرة شلون افكر عقلي وگلبي رافضين حتى التفكير

::- الله يساعدج ويبرد گلبج بس هي هاي الدنيا فكري بجهالج وخليلهم سند من هسه

سـارة ::- حسيتها بعد عدها كلام بس سكتت وشگيت تريد تخطبني بس اني اعرف ولدها كلهم مزوجين وعدهم اطفال ومستقرين ببيوت وحدهم وماعدهم اي مشاكل