ချိုချိုအီအီ အုန်းသီးရနံ့မှာ ချမ်းအေးနေသော မနက်ခင်းကို နွေးထွေးလာစေသည်။ ရင်ခွင်ထဲရှိ အုန်းသီးရနံ့လေးက သူ၏ pheromones များကို ထုတ်လွှတ်လာအောင် မသိမသာ လှုံ့ဆော်ပေးသည်။
ထို့ကြောင့် သူမသိလိုက်ပါဘဲ pheromones များကို ၂ဆ မက ထုတ်လွှတ်မိတော့ မွှေးအီလှသည့် အုန်းသီးရနံ့မှာလည်း လေထုထဲတွင် ပိုမိုများပြားလာပြီး သူ့ရင်ခွင်တွင်းရှိ တစ်စုံတစ်ရာမှာလည်း သူ့ရင်ခွင်တွင်းသို့ ပိုမိုတိုးဝင်ကာ တင်းတင်းကျပ်ကျပ် ဖက်လာလေသည်။
"တီတီ...တီတီ... တီတီ..."
ကုတင်ဘေးရှိ စားပွဲပေါ်မှ နှိုးစက်က သာယာလှသော အိပ်ချိန်ကို စတင် ဖျက်ဆီးလာ၍ အကျင့်ဖြစ်နေသော မျက်လုံးတို့က ပွင့်လာပြီး နှိုးစက်ကို ပိတ်ဖို့ပြင်တော့ လက်မောင်းတစ်ဖက်က ဖိခံထားရ၍ အောင့်သလိုခံစားလာရသောကြောင့် ကြည့်မိလိုက်လေရာ သူ့လက်ကိုခေါင်းအုံးရင်း သူ့ရင်ခွင်တွင်းတွင် သူ့ကိုဖက်ကာ ခွေခွေလေး အိပ်နေသည့် ကျန်းဟာအိုကို မြင်လိုက်ရသည်မို့ တစ်ဖန်ပြန်အိပ်ချင်နေသည့် စိတ်လေးများပါ ပျောက်သွားရသည်။
နှိုးစက်ကို လှမ်းပိတ်လိုက်ပြီး ထဖို့ပြင်တော့ ကျန်းဟာအိုက သူ့ခါးကို ပိုမိုတင်းကျပ်စွာ ဖက်လာသည်မို့ အိပ်ရာပေါ် ပြန်လှဲချလိုက်ရင်း အလိုက်သင့်နေပေးလိုက်ကာ ဖြစ်ပျက်ခဲ့သည့် အကြောင်းအရာတို့အား တစ်ဖန် ပြန် စဥ်းစားခန်း ဖွင့်ရသည်။
သူမှတ်မိသည်က မနေ့ညက ၂ယောက်သား ညစာအတူစားခဲ့ကြပြီး ၂ယောက်စာဆိုရာ၌ ပဲခေါက်ဆွဲရော ပင်လယ်စာခေါက်ဆွဲပါ မကျန် ကျန်းဟာအို၏ ဗိုက်တွင်းသို့ အကုန်ရောက်သွားပြီးနောက် သူမစားလိုက်ရသည့်အတွက် ပန်းကန်ကိုတော့ သူဆေးသင့် ငါဆေးသင့် ငြင်းခုံကြရင်း ပန်းကန် ၁ချပ်ကွဲသွားခဲ့ရသည်မို့ ကျန်းဟာအိုကို တစ်ချက်ငေါက်လိုက်မိသည့်အကြောင်းသာ။
ကံကောင်းသွား၍ ပန်းကန်မှာ အစိတ်စိတ် အမွှာမွှာ ကွဲမသွားဘဲ သုံးပိုင်းသာ ကွဲသွားသည်မို့ သူကပဲ လှည်းကျင်းကာ သန့်ရှင်းရေး လုပ်ခဲ့ရသေးသည်။ အပြစ်လုပ်ထားသူကတော့ လေအဟုန်လို အခန်းတွင်းဝင်ဖို့ ပြင်နေသည်မို့ မနက်စောစောထရန် တစ်ချက် လှမ်းအော် သတိပေးခဲ့ရသေးသည်။
