العالم أماكن كتير جدًا في منها إللي بنستمتع برؤيتة وفي إللي بيعلي ضربات قلبنا من الخوف، بعد الحلقة دي أنتَ هتقوم ترمي كل عرايسك أنا متاكده، بلاش أطول عليك ويلا بينا .
تيجي النهارده أكلمك عن مكان في المكسيك مصنف ضمن الـ 10 أماكن خطوره في العالم "جزيرة الدمي في المكسيك" ممكن يجي في بالك دلوقتي إيه إللي ممكن يخوف في عرايس! خليني أقولك أن العرايس مسكن للشياطين وده معروف عنهم من زمان جدًا لآن أوقات كتير القطن إللي بيتحشي بيه العرايس بيبقي من مخلفات المستشفيات من المشارح وغيره
خلينا نرجع تاني لجزيرة الدمي .. بتبقي عبارة عن جزيرة عادية جدًا حوليها فروع شجر مرتفعة وعلي خصون الشجر عرايس مشنوقة وعليها نقط من الدم، في من العرايس دي إللي اديها مقطوعة وإللي رجليها وبيبقي فعلًا شكلهم مخيف جدًا، طول ما أنتَ ماشي هتلاقي رؤوس عرايس متقطعة مرمية حواليك وبصالك بطريقة تفزعك، ممكن لو جالك فرصة تزور المكان المرعب ده ممكن ترجع علي رجليك بسلامة ولكن لو مرجعتش فـ دي نهاية أي حد بيدخل المكان ده لأنه معروف عنة إنه بيسكن الدمي الشياطين السفلية ويعتبر العرايس مسكنهم للعالم بتاعنا.
الجزيرة دي فضلت لسنين طويلة محدش يعرف عنها حاجة إلا واحد فقط وهو إللي كان بيعيش علي الجزيرة دي لسنين طويلة وهو "چوليان سنتانة" الناس إللي كانت بتسكن القري إللي قريبة من الجزيرة كانت مسمية چوليان بالرجل غريب الأطور لأنة كان عنده بيت في القري زيه زي أي بني أدم طبيعي إلا إنه فضل العيش لوحده في جزيرة الدمي.
بترجع أصل حكاية الجزيرة أن كان في عائله رايحين في رحلة علي قارب وكان الأب جايب لبنتة عروسه جديده ولكن للأسف في وسط الرحلة والخروجة السعيده دي البنت كانت بتلعب جمب نهر قرب الجزيرة وللأسف ماتت غرقانة، ولغاية وقتنا ملقوش أي عظام للج*ثة، البنت وقت لعبها عللي النهر سابت العروسة بتاعتها علي القارب.
من وقتها الناس بتقول أن شبح البنت بيطلع كل يوم يدور علي عروستها
وفي سنة 1950 قرر چوليان إنه يزور الجزيرة بدافع الفضول، وفي وسط وقفته علي النهر يتأمل الجزيرة تحديدًا مكان ما البنت غرقت، بيقول إنه لمح طفلة صغيرة ماشية وسط الجزيرة، فضل يجري وراها لغاية ملاقاها بتقع في النهر ولما نزل عشان ينقذها بالفعل طلعها ولكن للأسف كانت عروسه عيونها زرقة وشعرها أشقر ودي كانت نفس مواصفات البنت إللي ماتت ، ولما چوليان راح للناس في القرية وحكي ليهم إللي حصل تلقائي الناس قالت إيه إللي وداك هناك؟! المكان ده مسكون وإللي أنتَ شوفته ده كان شبح البنت إللي ماتت.
يوميها چوليان رجع لبيتة من تاني ولكن من وقت الحادثة إللي حصلت وهو مبقاش علي بعضه نهائي بقي دايمًا ساكت ومتغير والضحكة مبتتلمحش علي وشه، شكل البنت إللي غرقت مش مفارقه عقلة وبقي دايمًا يحلم بيها إنها بتترجاه يرجع للجزيرة مره تانية.
وفي يوم صحي چوليان مقرر إنه هيروح الجزيرة يعيش فيها ومش هيرجع لعائلته مره تانية، وفعًلا راح للجزيرة وعاش هناك وعمل لنفسه بيت ينام في وبدأ يتعود أن دي هتبقي حياتة خلاص، السؤال الأهم إيه إللي خلاه يعمل كده؟! ﷲ أعلم
وفي يوم من الأيام راح چوليان لمكان النهر تاني وفضل مركز في علي أمل أن الدميه تظهرله تاني، وأثناء وقوفة علي النهر لقي دمية عايمه علي النهر ووقفت قدامة، وبكل بساطة خدت چوليان الدمية وعلقها علي أحد الأشجار، وروح لبيته مره تانية ولما عمل كده البنت مبقتش تجيله في أحلامه نهائي ولا بقت مسيطره علي تفكيره معني كده أن روح البنت هديت تمامًا.
قرر تاني يوم إنه يروح تاني لمكان النهر وكان حابب يفهم إيه إللي بيحصل وهل فعلًا روح البنت هديت لما علق الدمية؟! وفي نفس التوقيت لقي دمية تانية عايمه علي النهر .. وقتها فهم چوليان أن البنت بتوصلة رسالة بإنه يجمع أكبر قدر ممكن من العرايس عشان البنت تسيبة في حالة وفعًلا خد الدمية وعلقها علي شجرة تانية وفضل 50 سنة بحالهم يجمع في الدمي ويعلقها علي الأشجار في الجزيرة، چوليان كان كل يوم يجيب دمية ويحطها علي شجرة في الجزيرة ومكنش بيهمه الدمية دي شكلها إيه ولا عاملة ازاي وكان كل همه إن كل يوم يعلق دمية جديدة في الجزيرة لغاية ما بقي مجنون حرفيًا
وفي سنة 2001 لقوا ج*ثة چوليان عايمه علي النهر ولغاية دلوقتي محدش يعرف سبب وفاتة هل أنتحر ولا البنت قت*لته عشان مقدرش يوفر دمية جديدة؟ اسئله غامضه ومخيفه والعقل البشري ميستوعبش كل ده معظم الناس بتقول ان المكسيك عملت الموضوع عشان تنشط السياحة عندها والعالم يجي يزور جزيرة الدمي لآن الأنسان بطبعة فضولي، قولي بقي رايك إيه في الكلام ده؟
لو جتلك رحلة ببلاش لجزيرة الدمي هتوافق ولا هتفلت بجلدك؟
سلام يا صديقي♡
_روان خالد"
#5
