نسل البارون (الجزء التالت من أحفاد البارون)

الحلقة التالتة حلقات خاصة

محدش يحكم على أمير لو سمحتم😂😂 في كومنتات حلوة بجد بخصوصه وعاليتيوب الناس متوقعة صح فعاوزة اشوف مين هيقول التوقع صح هنا...

#نسل_البارون
#أحفاد_البارون_ج٣
#بقلم_إيمان_جمال
#لؤلؤة_الكتابة

#لحظات_خاصة_٣

أمير قعد يفكر كتير مع نفسه لحد مازهق من التفكير وغير هدومه وراح القصر مع الباقيين، شوية وجه وقت حصة فهد الصغير ومعاه قصي و كارمن وكريم، وخديجة وماجد وأمجد ومكة وسليم ومراد وفيروز
نرمين قعدت قصادهم: يلا فين الــ homework؟
في اللحظة دي كارمن وكريم عايزين يهربوا من ادامها
نرمين بصت لماجد: هات كراستك ياماجد
ماجد: انا امجد مش ماجد
نرمين رجعت بصت لأمجد: طب هات انت ياماجد
امجد: انا امجد مش ماجد
نرمين بصوت عالي: يلا ياواد انت وهو طلعوا الواجب
الفهد الكبير جه عليهم: حقك عليا أنا يامس
الفهد بصلهم بنظرات هما عارفينها كويس: انا مش عايز شقاوة
أمجد: حاضر ياجدو
الفهد بص لكارمن وكريم وشايفهم قاعدين كدا مش على بعضهم: ايه ياحلوين فين الــ homework بتاعكم؟
كريم بخوف: أصل انا كنت بلعب بلاي ستيشن مع بابا
الفهد بغضب: هو انا مش قولت مافيش لعب زفت ايام الدراسة
الفهد بص لكارمن: وانتي بقى ياست كارمن معملتيش الواجب ليه؟
كارمن بطفولية: كنت بشجعهم ياجدو
نرمين فتحت بوقها من الصدمة وبصت للفهد: هو حضرتك متأكد انهم عندهم ست سنين
الفهد ضحك غصب عنه: والله أنا بدأت اشك
مهاب جه من بارة وقرب عليهم: ايه اخبار الولاد معاكي يامس؟
الفهد بصله ورد: انا مش قولت يامهاب بلاش لعب زفت بلايتسيشن في الدراسة؟
مهاب بص لكريم: انت قولت ايه يخربيتك
فهد الصغير: قال كل خير ياعمو
الفهد شد مهاب من قفاه: تعالى معايا وسيب المس تشوف شغلها

أمير قاعد لوحده في جمب بيفكر وقلقان وشهد قاعدة مع البنات وعنيها عليه
چويرية: مالك ياشوشو؟
شهد: مش عارفة ياچوري حاسة ان امير فيه حاجة او مخبي حاجة
رنا: ياحبيبتي ماتقلقيش نفسك اكيد حاجة في شغله
شهد يارب يبقى كدا فعلاً
هدى: بقولكم ايه يابنات، بما اننا بقالنا فترة مشغولين مع الولاد ماتيجو نعمل تغيير بدل ما الرجالة يبصوا بارة
حور ضحكت: بارة مين وعمو فهد موجود
سلمى: باردوا لازم نهتم بنفسنا شوية عشان الولاد شغلونا عنهم خالص

الفهد شايف أمير وراح قعد معاه
فهد: قاعد لوحدك ليه؟
أمير: أبداً ياعمي مافيش
فهد بصله: لا فيه وباين من وشك انها حاجة كبيرة كمان
أمير بص على شهد من بعيد وبص لفهد: هحكيلك لأن حقيقي مش عارف أعمل إيه
أمير حكاله عن المريضة اللي نفس ظروف شهد تقريباً وعايز يساعدها ومش عارف يقول لشهد إيه ولا يتصرف ازاي
فهد بهدوء: خد رأي شهد الأول
أمير: خايف من ردة فعلها
فهد: جرب مش يمكن توافقك على اللي انت عايز تعمله
أمير: خايف ياعمو أوي
فهد إبتسم: شهد عاقلة وأكيد هتقف جمبك
عمر وسامر كانوا لسة جايين وشافوهم قاعدين فقعدوا معاهم
الفهد بصلهم: اهلا بالاساتذة اللي مش ناويين يفرحوني بيهم
عمر: حضرتك ياعمو عارف ان اول ما نقابل اللي هيناسبونا هتفرح بينا على طول
سامر: وبعدين ياعمو حضرتك زهقت مننا ولا إيه
فهد لسة هيرد بس فهد الصغير جه وسمع الكلام ورد: مش حكاية زهق ياعمو سامر بس انا عايز البس بدلة واحضر فرح في العيلة دي
سامر ضحك: معلش يافهد باشا
فهد بص لجده: انا خلصت درسي
الفهد: ايوا وبعدين؟
فهد قرب منه كدا واتكلم: عايز الاعبك شطرنج
الفهد بصله: مش انت عارف ان ابوك هو اللي بيلعب معايا انا وادهم بس؟
فهد: ايوا عارف بس دا مايمنعش اني العب مع حضرتك
أمير بصله وابتسم: فهد حبيبي تعالى العب معايا انا وسيب ليث وجدو يلعبوا سوا
فهد بعناد: لا
ليث جه وقرب عليهم: يلا يافهد باشا
فهد الصغير بصله: يلا على فين؟
ليث بصله بهدوء: انا بكلم ابويا مش انت
فهد الصغير قرب منه: ابقى حدد يابابا انهي باشا فينا وبعدين عايز جدو ليه
ليث بصله بغضب: يعني ايه عايزه في ايه وانت مالك
فهد الصغير: لا مالي اصل انا رايح الاعب جدو شطرنج
ليث بعصبية: مبقاش الا انت ياشبر ونص تلعب مكاني
فهد الصغير بهدوء: والله دلوقتي اكبر واطول وابقى متر مش شبر
عمر غصب عنه ضحك، والفهد نفسه مقدرش يمسك نفسه من الضحك
امير وقف وبص لليث وبيضحك: انا بقول نقوم عشان نتغدا احسن مايحصل مصيبة
ليث قرب من ابنه: اسمع ياواد انت لو انت فاكر انك ممكن تاخد مكاني تبقى غلطان انا هنا غيرك وانا الكل في الكل ماتجيش انت تعملي فيها كبير
فهد الصغير: الكبير مش بالسن يابابا الكبير بالعقل
ليث بغضب: هو انت عندك عقل
فهد الصغير: ايوا عندي تحب تشوفه
ليث بإستنكار: ودا هشوفه ازاي بقى
فهد: تلاعبني شطرنج
ليث بتحدي: وانا موافق
الفهد بصلهم: خلصتوا كلامكم؟
ليث: المفروض ايوا
الفهد قام وبص لفهد: عايز تلاعب ابوك؟
فهد: ايوا
الفهد: تمام عشان تلاعبه يبقى في شروط؟
ليث: شروط ايه؟
الفهد: اصبر انت بس.....وبص لفهد: موافق تسمع شروطي؟
فهد: اه اتفضل
الفهد مشي خطوتين وبصلهم: ان لو انت خسرت يافهد ماتدخلش في اي حاجة ماتخصكش
فهد: ذي ايه مثلا؟
الفهد: شغل الشركة ملكش دعوة بالقرارات اللي ياخدها أبوك، ولا تدخل في شغله ولا تعدل عليه مفهوم؟
فهد: طب الشروط دي لو انا خسرت طب لو انا كسبت هيحصل ايه؟
ليث رد بعصبية: وهو انت فاكر انك هتكسب؟
فهد بصله بتحدي: اه يابابا هكسبك ودلوقتي هتشوف الشبر ونص هيعمل ايه وتعرف اذا كان عندي عقل ولا لا
ليث بص لإبنه بتحدي: تمام يلا نشوف مين فينا اللي هيكسب
فهد: تمام بس لازم أعرف لو كسبت هيحصل إيه؟
الفهد: هيحصل اللي انت عايزه يافهد
فهد تمام أنا موافق
امير دخل يجيب الشطرنج من المكتب واللعبة ابتدت والكل قعد بيتفرج والأولاد خلصوا الدرس، فهد قاعد ادام ابوه بتحدي وبيلعب بتركيز والفهد شايف نفسه فيه، ليث كل مايفكر في حل يلاقي ابنه قفل اللعبة عليه
عمر بص لليث: انا بقول ياليث تنسحب احسن
ليث بتحدي: استحالة
اكمل(الكبير) ضحك: شكلك هتعملها ياحبيب جدو وتكسب
فهد رد وعينه على اللعبة: انا مش بقول هعمل ايه انا بعمل بس
الفهد ضحك وبص لأدهم: سمعني صوتك
أدهم قاعد بيتفرج بهدوء: انا مستني اشوف هيحصل ايه
وبعد محاولات من ليث اللعبة انتهت بفوزه
ليث بص لإبنه: ماتعملش فيها أبو العريف تاني
فهد بصله بتحدي: مش يمكن انا اللي خليت حضرتك تكسب عشان شكلك ادامهم
ليل ضحكت: كفاية يافهد ياحبيبي كدا ابوك هيتجنن
ملك: كدا ليث كسب إيه اللي هيحصل بقى
ليث اللي رد وقال: بابا قال ان الاستاذ لو خسر مايدخلش في أي حاجة متخصهوش
الأدهم: بص يافهد من هنا ورايح مالكش دعوة بتصرفات أبوك وماتدخلش في أي حاجة
فهد بحزن: بس حضرتك ياجدو باللي بتقوله دا بتلغي شخصيتي
جاسر: لا يافهد انت لسة صغير على الأمور دي
فهد قام وبصلهم وبص لجده الفهد واتكلم بحزن: طالما حضرتك شايف كدا تمام
فهد سابهم ودخل جوا.....نوح بص للفهد: على فكرة ياجدو فهد زعل
مهاب: نوح عنده حق ياخالي
الفهد بص لليث: بص ياليث انا سمعت كلامكم ومعاكم ان فهد مالوش دعوة بحاجة اكبر من سنه بس مش عاجبني إنه يزعل بالشكل دا
ليث: عادي هيزعل شوية وبعدها هيمشي
هدى: بيتهيألك ياليث، إبنك سابق سنه وباللي بتعمله دا هتزعله منك
چويرية أخيرا إتكلمت: أنا ساكتة عشان اشوف هيحصل إيه بس إبني زعلان وأوي كمان ولازم نلاقي حل لليث، عشان بكدا ليث وفهد هيفضلوا ذي القط والفار
ليث: انا لا قط ولا هو فار، هو اللي شاغل نفسه باللي مايخصهوش
أمير: انا هروح أتكلم معاه
أمير سابهم وراح يتكلم مع فهد

ناجي وسيد كانوا في شركة الحراسة ورجعوا عشان الغدا
سلمى قابلت سيد بكل حب: وحشتني
سيذ ابتسم وباس ايديها: إنتي أكتر ياعمري
ماجد جه من وراه: بتعمل إيه يابابا؟
سيد بخضة: هو إنت يا ابني بتطلعلي منين
سيد شاله وباسه: اهلا بحبيب قلب بابا
امجد جه هو كمان: وأنا إيه ياسي بابا
سيد ضحك وبص لسلمى: بقولك إيه خدي العيال دي انا رايح اغير هدومي وراجع
سلمى: تحب أجي معاك؟
سيد: لا ياقلبي خليكي
سيد سابها وراح الڤيلا يغير هدومه ودخل ياخد دش

سفيان بيلعب مع تالا وضربها، ايه اللي يحصل بقى يجي نوح ويضربه😂
سفيان بغضب طفولي: بتضربني يانوح؟
نوح بيصالح تالا وبيبصله: اه عشان بتضرب حبيبتي
الفهد جه من وراهم وواقف حاطت ايده في جيبه: هو انا مش قولت قبل كدا بلاش حد يضرب التاني
سفيان بإحترام: هي جات تلعب بحاجتي ياجدو
الفهد: وايه يعني
نوح: ثوفت (شوفت) ياجدو الحمار دا
الفهد بغضب: عيب يانوح تاني مرة ماتقولش على اخوك كدا
نوح: لا دا مش اخويا دا ابن عمي
الفهد بغضب وبصوت عالي: انتو كلكم هنا اخوات محدش يقول كدا تاني انتوا سامعين واتفضلوا ادخلوا جوا عقاب اسبوع من اي لعب يلا
سفيان بص لنوح بغضب انه السبب في العقاب دا ودخلوا جوا وتالا فضلت مكانها
الفهد قرب منها وشالها: مش انا قولت محدش يلعب بلعب الولاد
تالا بطفولة: بحب العب مع سفن ياجدو
الفهد غصب عنه ضحك عشان تالا رغم سنها الاربع سنين بس لسة لحد دلوقتي مش عارفة تنطق سفيان صح....قرب من خدودها وباسها ونزلها على الأرض: طب يلا على جوا
تالا دخلت وليل جات وقفت ادامه: هتتعب معاهم اوي
الفهد لسة هيرد بس شاف ادهم جاي عليهم: ماهو الباشا سايبني اتصرف لوحدي
ادهم بصله: لا بقولك ايه احنا طلع عنينا مع الاساتذة الكبار ماتجيش تقولي نعاني تاني مع ولادهم
ليل ضحكت: انا ببشركم بأيام سودا هيعلموكم الأدب بصحيح
الفهد بص لأهم وغمزله: هيرجعونا لأيام الشقاوة تاني

وهنا بقا انتهت الحلقات الخاصة انتظروا الحلقات الأساسية اللي هنعيش معاهم من تاني بس الحلقات اللي جايا طبعاً تكملة للحلقات الخاصة عشان محدش يقول اكيد هيكبروا😂😂😂😂 #انتظروني