قايد سكت يناظرها ثواني وكملت : ماعندك اجابه
قايد : ابوي السبب خايف من سمعته قدام الناس ولان رزان تصير اخت شيخ القبيله واي غلط يصير بيتغير مكانه ويسبب مشاكل مع القبيله ومعنا و هددني انه يتبراء مني وماكنت صاحي انا وش اسوي كان همي رضى ابوي مافكرت وش بيصير فيتس تصرفت على عماي
سكتت تناظره ثواني وتكلمت : والرجال الي قال انك توفيت في حادث ؟
رفع نظره عليها وتكلم : من ابوي مهو مني
ميلت شفايفها تناظره : لهدرجه رضى الناس اهم من اهلكم
قايد رفع كتوفه : انتي شفتي وش صار اليوم كل القبيله تجمعت عند بيت ابوي لان اي غلط يصير على طول يهرجون الاب ماكن الغلطان ولده
سكتت تناظره وناظرت نياف وسيف الي تقدمو يجلسون جنب ابوهم وكمل قايد : وقت جيتي انتي كانت رزان حامل في صقر ووقت رجعتس لجدتس ولدت ونسيتس والتهيت معهم كان نياف عمره سنتين
لفو يناظرون ابوهم وناظرو العنود الي تكلمت : وشفت ان ربي مارزقك منها بنات وجيت عندي
رفع راسه يناظرها وهز راسه بالنفي : التهيت ونسيتس ومرت الايام والسنين تدرين متى ذكرتس ؟
ناظروه وكمل : يوم جيتي مع جدتس على العشاء فتحت عيوني وذكرتس وعرفت اني غلطان ولازم اصلح غلطي
هزت راسها العنود : وجدي الله يرحمه من طلعنا من عندكم وهو مهو بخير حاولت اعرف وش فيه ورفض يقولي
سكتت من دمعت عيونها من تذكرت جدها واخذت نفس وكملت : لين توفى الله يرحمه وجيت وعرفت السبب
رفعت يدينها تمسح دموعها الي نزلت وصدت تاخذ بجامتها وتوقف تدخل الحمام تاركتهم
لفو يناظرون ابوهم الي يناظرهم وتكلم : غلطان لو اصلح غلطي
سيف : بكت من تذكرت جدها ؟
نياف هز راسه : الله يرحمه
همس قايد يدعي له ووقف يدخل غرفته ولف نياف على سيف : قم ندخل
سيف هز راسه : بجلس عندها ودي اتعرف عليها اكثر
نياف بتكشيره : ياخي مو وقتك انت شفتها كيف تغيرت حالتها قم بس والايام قدام يمديك تعرف عليها
وقف سيف يدخل مع نياف وناظرو صقر الي نايم وتكلم نياف : وين راكان ؟
سيف وهو يفرش فراشه : مدري يمكنه عند امي
سكت نياف يدخل في فراشه وتقدم سيف يصفي الانوار ويرجع ينام
طلعت بعد مالبست بجامتها وتقدمت تناظر البيت الي طفت انواره وصار هادي جلس عالكنبه واخذت جوالها من اتصل وردت : اهلن
بندر : هلا كيف الحال
العنود : تمام وانت
بندر : الحمدالله كيف الوضع عندك
العنود : زين
بندر : ماعندك نيه ترجعين ؟
العنود : انا قلت من قبل مارجع لين اخذ الي ابيه
بندر اخذ نفس : ترا مارتحت للقعدتك عندهم تكفين انتبهي لنفسك
العنود : لاتشيل هم انا بخير
بندر : تمام اذا بغيتي شي كلميني
العنود : زين باي
سكرت تناظر البيت وتفكر في قايد الي معبي وجهه الندم واخوانها الي زينين معها ومتقبلين الوضع بس المشكله مع عقاب هي تشك ان الفلوس الي انسرقت مع عقاب وابوها ماله دخل بس كيف طلع اسم ابوها في الايصال
سكرت تناظر البيت وتفكر في قايد الي معبي وجهه الندم واخوانها الي زينين معها ومتقبلين الوضع بس المشكله مع عقاب الوحيد الي مو متقبلها بيتهم هي تشك ان الفلوس الي انسرقت مع عقاب وابوها ماله دخل بس كيف طلع اسم ابوها في الايصال عقاب المسيطر عليهم ويمشون على كلامه بس مارح تخليه يمشي كلامه عليها
...................................
صحت على اصوت العيال الي يتهاوشون وعقدت حواجبها من صراخهم وجلست تناظرهم بفجعه ولفت من صرخت رزان : خلاص انت وياه
راكان : يمه تفاهمي معه
صقر : اقول على شحم بس انت البادي
رزان : خلاص انهبلت ماعاد اقدر اتحملكم اكثر اذلفو عن وجهي
دخل صقر بعد ماخذ فنيلته من راكان وجلس راكان يتحلطم عند رزان الي متخصره وتناظر العنود الي جالسه وتناظرها بصدمه اخذت نفس ولفت على راكان : انقلع
ناظرها راكان وضرب ركله بالارض وطلع من البيت بكبره
ومشت رزان تدخل المطبخ
اخذت جولها تشوف الساعه ورفعت حواجبها بصدمه وهمست : خمس الفجر وش مصحيهم هذول
رفعت راسها من تكلمت رزان باعلى صوتها وهي بالمطبخ : بمزاجنا نصحى محد له دخل فينا
رفعت حواجبها بصدمه من سمعتها ولفت تفتح شنطتها وبعد ماخذت اغراضها الي تحتاجها وقفت تدخل الحمام
وبعد دقايق طلعت بعد ماخذت شور وناظرت المرايه تمشط شعرها وترفع نصه وتترك الباقي فتحت شنطتها الصغيره تأخذ كريم ومرطب ولفت من وقفت رزان وبيدينها صينيه وتكلمت : محد بيناظر وجهتس مع هالصبح مايحتاج تزينين
صدت تناظر المرايه وتوزع الكريم وهي تسمعها ومن خلصت تكلمت : مالك دخل فيني
عقدت حواجبها رزان وطلعت بالفطور
وتكلم قايد : خلي الفطور داخل ماحنا رايحين
لفت تناظر الباب الي يفتح على بيت عقاب وكان مسكر ببلك وناظرت قايد الي يناظر الباب معصب ولفو من تقدمو نياف وصقر وسيف وتكلمو بصوت واحد : من سكره
رزان : جدكم
لفو يناظرون ابوهم الي تكلم : يالله داخل ماعادنا برايحين لهم وغدانا وعشانا في بيتنا
سكتو يدخلون معه ونزلت الفطور في الصاله وبدو يفطرون
تقدمت تناظرهم وبيدها كوب كبتشينو وتكلمت : مو متعودين تفطرون مع بعض
لفو يناظرونها وتنهدت رزان : هذا الي يعصى ابوه يستاهل مايجيه
ناظروها وتكلم قايد : اقصري الشر
ميلت شفايفها وتقدمت تجلس عالكنبه وتشرب من كوبها
لف عليها قايد وتكلم : تعالي افطري
هزت راسها تناظر جوالها : ماكل قرص
تنهدت رزان : الله يخلف
سكتو العيال يناظرون بعض ويفطرون
لفت تناظرهم جالسين يناظرون عقاب الي يفطر وتكلمت : الحين ارتحت وش الفايده فرقت بيني وبين ولدي واحفادي
عقاب : ولدتس ليا عقل وعرف يتصرف اما الحين ماهو بولدتس
حاكم : وش الفايده يابوي يعني سواتك هاذي تاتغير الناس وترجعهم زي قبل ماهي بمغيره شي
عقاب بعصبيه : بس عاد اقطعو طاريه ولعاد يدخل بيتي لاهو ولا عياله
الجده سلمى بعصبيه: بس منت بحارمني منه وبزوره كل يوم
لف يناظرها عقاب وسكت يكمل فطوره
ولف ذيب يناظر صالح الي يناظره وسكتو يكملون فطورهم
وتكلمت شيخه : رزان رجعت مرت علي الفجر
الجده سلمى : اكيد ترجع ولا وش تبي بالطلاق وعيالها اطول منها
سلمى : طيب جده اليوم الجمعه وبالعاده نتجمع كلنا ونستانس
ساره : اي والله اشتقت لهاليوم معليه نجتمع ونستانس وش رادتس
ترف : يعني يمه نبي بنت خالي قايد تجي ودنا نشوفها
الجده سلمى بضحكه : اجل الربايع مابيخلونها من الهرج ان جت
ساره : وش عليها منهن ابروح العصر واقولها تجي ومنها نتعرف عليها
شيخه : احسن من قعدتها وماعندها غير رزان
عاليه : كررهي رزان بتحارشها ماهي مخليتها
شادن بضحكه : هي ماخلتنا بتخليها
ساره : اجل وش تاتسون للجمعه ؟
سلمى : انا بسوي كيكت التمر وريم قالت لي امس تاتجيب مصابيب بعسل
ترف تكت : اجل انا وش اسوي ؟
ساره : معليتس انتي تعاونيني فالقرصان
شيخه : اجل قومي يشادن انتي وعاليه عاونوني في الفرش
شادن : يمه هاذي يسوونها ذيب وصالح
شيخه : اخوانتس بيعاونون ابوتس
هزت راسها شادن : اجل بنروح نطلعها
قامو البنات وساره وشيخه وتوزعو يشوفون اشغالهم
